செமிகண்டக்டர் உற்பத்தியில் இனி தமிழ்நாடுதான் டாப்! சென்னைக்கு என்ட்ரி கொடுத்த தைவான் கம்பெனி!

சென்னை: தைவானைச் சேர்ந்த ஏடேட்டா டெக்னாலஜி நிறுவனம், தமிழகத்தில் தனது உற்பத்தி நடவடிக்கைகளைத் தொடங்கியுள்ளது. இதன் துணை நிறுவனமான ஏடேட்டா செமிகண்டக்டர் பிரைவேட் லிமிடெட் மூலம் இந்த ஆலை நிறுவப்பட்டுள்ளது.

ஸ்ரீபெரும்புதூர் சிப்காட் தொழிற்பேட்டையில் டி.ஆர்.ஏ.எம் மெமரி மாடுல்கள் மற்றும் ஃபிளாஷ் டிரைவ்களைத் தயாரிக்கும் இந்த புதிய ஆலைக்கு கடந்த வியாழக்கிழமை அடிக்கல் நாட்டப்பட்டது. இந்த நிகழ்ச்சியில் முதலமைச்சர் மு.க. ஸ்டாலின் மற்றும் தொழில்துறை அமைச்சர் டி.ஆர்.பி. ராஜா ஆகியோர் கலந்துகொண்டனர்.

கடந்த 2024ம் ஆண்டு ஜனவரி மாதம் 8ம் தேதியன்று மாநில அரசுடன் கையெழுத்தான புரிந்துணர்வு ஒப்பந்தத்தைத் தொடர்ந்து இந்த திட்டம் தொடங்கப்பட்டுள்ளது. ₹931 கோடி முதலீட்டில், 823 உயர்தர வேலைவாய்ப்புகளை இத்திட்டம் உருவாக்கும். இந்த புதிய ஆலை, டெஸ்க்டாப், லேப்டாப், சர்வர்கள் மற்றும் பிற கணினி அமைப்புகளுக்குத் தேவையான டி.ஆர்.ஏ.எம் மெமரி மாடுல்கள் மற்றும் ஃபிளாஷ் டிரைவ்களை உற்பத்தி செய்யும் என்று எதிர்பார்க்கப்படுகிறது.

மெமரி தொழில்நுட்பத்தில் உலகளவில் முக்கியத்துவம் வாய்ந்த ஒரு நிறுவனம் ஏடேட்டா. இந்தியாவில் மெமரி மாடுல்களை உற்பத்தி செய்யும் முதல் தைவான் நிறுவனமும் இதுதான். எனவே, ஏடேட்டாவின் வருகை, தமிழகத்தின் செமிகண்டக்டர் லட்சியங்களுக்கு ஒரு பெரிய மைல்கல்லாகப் பார்க்கப்படுகிறது.

இது குறித்துப் பேசிய தொழில்துறை அமைச்சர் ராஜா, "தமிழ்நாடு வெறும் உதிரிபாகங்களை ஒருங்கிணைக்கும் பணியை மட்டும் செய்யாமல், உலகளாவிய கணினி அமைப்புகளுக்குத் தேவையான அதிக மதிப்புள்ள பாகங்களை உற்பத்தி செய்வதில் கவனம் செலுத்துகிறது" என்று கூறினார்.

குறிப்பிடத்தக்கது என்னவென்றால், இந்தியாவின் மொத்த மின்னணு ஏற்றுமதியில் 41% பங்களிப்புடன் தமிழ்நாடு முன்னணியில் உள்ளது. ஏடேட்டாவின் இந்த முதலீடு, மாநிலத்தின் மின்னணு உற்பத்தித் திறனை மேலும் பலப்படுத்தும் என்று எதிர்பார்க்கப்படுகிறது.

English summary

India’s First Taiwanese Memory Plant: Taiwan-based Adata Technology has started its manufacturing operations in Tamil Nadu. The plant has been set up by its subsidiary Adata Semiconductor Private Limited.