ஜிப்மர் உத்தரவு! மத்திய அரசுக்கு ஏன் இந்த மொழி வெறி?.. இது நல்லதில்லை.. கனிமொழி கடும் தாக்கு

Published: Sunday, May 8, 2022, 8:27 [IST]

Subscribe to Oneindia Tamil

சென்னை: புதுவையில் உள்ள ஜிப்மர் மருத்துவமனையில் இந்தி மொழி கட்டாயமாக்கப்பட்டுள்ள உத்தரவை மக்களவை எம்பி கனிமொழி கடுமையாக விமர்சனம் செய்துள்ளார்.

புதுவையில் உள்ள ஜிப்மர் மருத்துவமனை. இங்கு மருத்துவக் கல்லூரியும் உள்ளது. இது மத்திய சுகாதாரத் துறையின் நேரடி கட்டுப்பாட்டில் உள்ளது. இந்த JIPMER என்பதன் முழு பெயர் ஜவஹர்லால் முதுகலை மருத்துவக் கல்வி மற்றும் ஆராய்ச்சி நிலையம் என்பதாகும்.

புதுவை என்பதாலும் இங்கு பிரென்ச் மக்கள் இன்னமும் வசித்துக் கொண்டிருப்பதாலும் முக்கியமாக இது ஒரு சுற்றுலா தலம் என்பதால் இந்த மருத்துவமனையில் இந்தியும், ஆங்கிலமும் ஆட்சிமொழியாக பயன்படுத்தப்படுகிறது.

அலுவல் மொழி

இந்த நிலையில் அலுவல் மொழியாக இந்தியை மாற்றுவது தொடர்பாக புதிய சுற்றிறிக்கையை ஜிப்மர் மருத்துவமனை மற்றும் மருத்துவக் கல்லூரியின் இயக்குநர் பிறப்பித்துள்ளார். அந்த அறிக்கையில் கூறியிருப்பதாவது: இதுவரை மத்திய அரசு அலுவலகங்களின் பதிவேடுகள் மற்றும் கோப்புகளில் இதுவரை இந்தியும் ஆங்கிலமும் பயன்படுத்தப்பட்டு வந்தது.

இந்தி

இந்கத நிலையில் இனி வரும் காலத்தில் அவற்றில் இந்தி மட்டுமே பயன்படுத்தப்படும் என உத்தரவில் கூறப்பட்டுள்ளது. ஏற்கெனவே இந்தி திணிப்பிற்கு எதிராக தென் இந்தியாவில் போராட்டம் நடைபெறும் நிலையில் இந்த உத்தரவு பலருக்கு பெரும் அதிர்ச்சியை ஏற்படுத்தியுள்ளது.

ஏ ஆர் ரஹ்மான்

கடந்த சில நாட்களுக்கு முன்னர் இந்திதான் ஆங்கிலத்திற்கு மாற்று மொழி என்றும் அதுதான் இணைப்பு மொழி என்றும் மத்திய அமைச்சர் அமித்ஷா கூறியிருந்தார். இதற்கு ஏ.ஆர்.ரஹ்மான் உள்ளிட்டோர் எதிர்வினையாற்றியிருந்தனர். இந்தி மொழி தொடர்பாக அஜய் தேவ்கனுக்கும் கன்னட நடிகர் சுதீப்புக்கும் இடையே சண்டையும் எழுந்தது.

ஏன் இந்தி வெறி

இந்த நிலையில் ஜிப்மர் உத்தரவுக்கு மக்களவை எம்பி கனிமொழி கடுமையாக விமர்சித்துள்ளார். அவர் ஜிப்மர் உத்தரவை குறிப்பிட்டு அதில் உள்ள Hindi Only என்பதை சிவப்பு பேனாவால் கோடிட்டு கூறுகையில், ஒன்றிய அரசுக்கு ஏன் இந்த மொழி வெறி? ஒன்றிய அரசு திணிக்க முயலும் இந்தி வேலையில்லா திண்டாட்டத்தைத் தீர்க்குமா? சமத்துவமின்மை மாறுமா? ஏதேனும் ஒரு சமூகப் பிரச்சனையையாவது திருத்துமா? விரிசல்களை ஆழப்படுத்துவது நல்லதில்லை என கண்டனம் தெரிவித்துள்ளார்.

Published On May 8, 2022