சென்னையில் அசத்தல்.. கின்னஸ் சாதனை படைத்த திமுகவின் கருணாநிதி நினைவு மாரத்தான்.. எப்படி தெரியுமா?

சென்னை: சென்னையில் இன்று அதிகாலையில் நடந்த கருணாநிதி நினைவு மாரத்தான் போட்டி கின்னஸ் சாதனை படைத்து அசத்தி உள்ள நிலையில் அதுபற்றிய முக்கிய தகவல்கள் வெளியாகி உள்ளன.

மறைந்த முன்னாள் முதல்வர் கருணாநிதியின் நூற்றாண்டு விழாவை திமுக கொண்டாடி வருகிறது. இதன் ஒருபகுதியாக சென்னையில் இன்று கருணாநிதி நினைவு பன்னாட்டு மாரத்தான் போட்டி நடத்தப்பட்டது.

மொத்தம் 4 பிரிவுகளில் போட்டிகள் நடந்தன. 5 கிமீ, 10 கிமீ, 21 கிமீ, 42 கிமீ என்ற அளவில் தனித்தனியே மாரத்தான் போட்டி நடந்தது. இந்த போட்டியை அமைச்சர்கள் கேஎன் நேரு, உதயநிதி ஸ்டாலின் பச்சை கொடியசைத்து தொடங்கி வைத்தனர்.

சென்னை மெரினா கடற்கரையில் உள்ள கருணாநிதியின் நினைவிடத்தில் இருந்து போட்டி தொடங்கியது. அதன்பிறகு காமராஜர் சாலை, கலங்கரை விளக்கம், பட்டினப்பாக்கம், முத்து லெட்சுமி பார்க், பெசன்ட் நகர், இந்திரா நகர், ஓ.எம்.ஆர்.சாலை, வாலாஜா சாலை, சிவானந்தா சாலை வழிகளில் நடைபெற்றது. இந்த போட்டியில் வெற்றி பெற்றவர்களுக்கு முதல்வர் ஸ்டாலின் பரிசு வழங்கினார்.

42 கிமீ, 21 கிமீ பிரிவில் ஓடி வென்றவர்களுக்கு முதல் பரிசாக ரூ.1 லட்சம், 2ம் பரிசாக ரூ.50 ஆயிரம், 3ம் பரிசாக ரூ.25 ஆயிரம் வழங்கப்படுகிறது. 10 கிமீ பிரிவில் முதல் பரிசாக ரூ.50 ஆயிரம், 2ம் பரிசாக ரூ.25 ஆயிரம், 3ம் பரிசாக ரூ. 15 ஆயிரம் வழங்கப்படுகிறது. 5 கிமீ பிரிவில் வென்றவர்களுக்கு முதல் பரிசாக ரூ.25 ஆயிரம், 2ம் பரிசாக ரூ.15 ஆயிரம், 3ம் பரிசாக ரூ.5 ஆயிரம் பரிசு வழங்கப்பட்டது.

இதற்கிடையே இந்த போட்டி கின்னஸ் சாதனை படைத்துள்ளது. இதற்கான சான்றிதழ் பரிசு வழங்கும் விழாவின்போது முதல்வர் ஸ்டாலினிடம் வழங்கப்பட்டது. அதாவது இந்த கருணாநிதி நூற்றாண்டு மாரத்தான் போட்டியில் இந்த ஆண்டு முன்பதிவு கட்டணமாக ரூ.3.42 கோடி கிடைத்த நிலையில் போட்டியில் அரசு அதிகாரிகள், திருநங்கைகள், ஆண்கள், பெண்கள், வெளிநாட்டைச் சேர்ந்தவர்கள் என 73,206 பேர் பங்கேற்று இலக்கை நோக்கி ஓடினர்.அந்த வகையில் கின்னஸ் சாதனை படைக்கப்பட்டுள்ளது என்பது குறிப்பிடத்தக்கது.

இந்த போட்டியால் இன்று சென்னை மெரினா கடற்கரை மற்றும் அதனை சுற்றிய பகுதிகளில் போக்குவரத்து மாற்றம் செய்யப்பட்டு இருந்தது குறிப்பிடத்தக்கது. பரிசு வழங்கும் விழாவில் மூத்த அமைச்சர்கள், எம்எல்ஏக்கள், கட்சி நிர்வாகிகள் என ஏராளாமனவர்கள் பங்கேற்றனர்.

English summary

Karunanidhi Memorial Marathon held early this morning in Chennai has created a Guinness World Record and important information about it has come out.