பாஜகவிற்கே முதல்வர் கொடுத்து இருக்காரு! ஒரே போடாக போட்ட பொன்முடி.. அப்பாவு அடித்த பரபர கமெண்ட்!

சென்னை: அரசு கல்லூரிகள் அமைப்பது பற்றிய அதிமுக எம்எல்ஏ கேபி முனுசாமியின் கேள்விக்கு உயர்கல்வித்துறை அமைச்சர் பொன்முடி இன்று பதில் அளித்தார்.

தமிழ்நாடு சட்டசபை கூட்டதொடர் விறுவிறுப்பாக நடந்து கொண்டு இருக்கிறது. இன்று சட்டசபையில் இலங்கை தமிழர்களுக்கு தமிழ்நாடு அரசு சார்பாக உதவி பொருள் அனுப்புவது தொடர்பாக தீர்மானம் நிறைவேற்றப்பட்டது.

இலங்கை மக்களுக்கு மனிதாபிமான அடிப்படையில் பொருளாதார உதவி செய்ய அனுமதி கோரும் தீர்மானத்தை தமிழக சட்டசபையில் இன்று முதல்வர் மு.க.ஸ்டாலின் கொண்டு வந்தார். அவையில் இன்று பல்வேறு கேள்விகளுக்கு அமைச்சர்கள் பதில் அளித்து பேசினர்.

கல்லூரி கேள்வி

அதிமுக எம்எல்ஏ கேபி முனுசாமி, வேப்பனஹள்ளியில் தொழில்நுட்ப கல்லூரிகளை அமைக்க வேண்டும் என்று கோரிக்கை வைத்தார். எங்கள் தொகுதியில் அரசு தொழில்நுட்ப கல்லூரிகள் இல்லை. மாணவர்கள் இதனால் வெளியூரில் சென்று படிக்க வேண்டிய நிலை இருக்கிறது. அதை சரி செய்யும் வகையில் அங்கு பல்துறைகளின் அரசு தொழில்நுட்ப கல்லூரிகளை அமைக்க வேண்டும் என்று கோரிக்கை வைத்தார்.

பொன்முடி பதில்

இதற்கு பதில் அளித்த அமைச்சர் பொன் முடி, 10 மாதங்களில் 31 கல்லூரிகளை அறிவித்து இருப்பவர் தமிழ்நாடு முதல்வர். அங்கு அரசு கல்லூரி இல்லாத பட்சத்தில் அதை சோதனை செய்து கண்டிப்பாக உங்கள் கோரிக்கையை பரிசீலனை செய்வோம். நீங்கள் எதிர்க்கட்சி உறுப்பினர் என்றும் கூட பார்ப்பது இல்லை. காங்கிரஸ் உறுப்பினர் கோரிக்கை வைத்தார் என்று ஒரு கல்லூரி கொடுக்கப்பட்டுள்ளது.

பாஜக உறுப்பினர்

பாஜக உறுப்பினர் கேட்டார் என்று சென்ற ஆண்டே கல்லூரி கொடுக்கப்பட்டது. பாஜகவிற்கே கொடுத்துள்ளார். அவரின் கோரிக்கை போன வருடமே நிறைவேற்றப்பட்டது. பாமக மணி கேட்டார் என்று கல்லூரி கொடுக்கப்பட்டுள்ளது. மனித நேய மக்கள் கட்சி உறுப்பினர் கேட்டார் என்று கல்லூரி கொடுத்துள்ளோம். சிபிஐ உறுப்பினர் கேட்டார் என்று கல்லூரி கொடுத்து இருக்கிறோம். இப்போது நீங்கள் கேட்டு இருக்கிறீர்கள்.

அப்பாவு கமெண்ட்

அதையும் கொடுக்க போகிறோம். முதல்வரிடம் பேசுகிறேன். உங்கள் தொகுதியில் அரசு கல்லூரி, அரசு உதவி பெறும் கல்லூரிகள் இல்லை என்றால் கண்டிப்பாக அதை கட்டித்தர ஏற்பாடு செய்வோம். இதில் என்ன இருக்கிறது. அடுத்த வருடத்தில் கட்டித்தர ஏற்பாடு செய்கிறோம் என்று பொன்முடி பதில் அளித்தார். இதை கேட்ட சபாநாயகர் அப்பாவு, எல்லா கட்சிக்காரர்களுக்கும் ஒரே நேரத்தில் பதில் சொல்லிட்டீங்க என்று கூறி சிரித்தார்.

English summary

Tamil Nadu Minister Pon Mudi replies to AIADMK K P Munusamy in assembly today.