பாரதியார் மட்டும் வாழ்ந்திருந்தால்.. பிரதமர் மோடியை புகழ்ந்து பாடியிருப்பாராம்.. சொல்கிறார் தமிழிசை!

Updated: Thursday, December 11, 2025, 13:14 [IST]

Subscribe to Oneindia Tamil

சென்னை: மகாகவி பாரதியார் வாழ்ந்திருந்தால், பிரதமர் நரேந்திர மோடியை வாழ்த்தி புகழ்ந்து பாடல் பாடி இருப்பார் என்று தமிழக பாஜக முன்னாள் தமிழிசை செளந்தரராஜன் தெரிவித்துள்ளார். அதேபோல் 2026ல் தமிழ்நாட்டில் தேசிய ஜனநாயகக் கூட்டணி ஆட்சி அமைந்த பின், பாரதியாருக்கு பிரம்மாண்டமாக அரசு விழா எடுக்கப்படும் என்றும் தெரிவித்துள்ளார்.

மகாகவி பாரதியாரின் 144வது பிறந்தநாள் விழா இன்று நாடு முழுவதும் கொண்டாடப்பட்டு வருகிறது. பிரதமர் மோடி, முதல்வர் ஸ்டாலின் உட்பட பல்வேறு அரசியல் தலைவர்களும் பாரதியாரை நினைவு கூர்ந்து கருத்துக்களை பதிவிட்டு வருகின்றனர். அந்த வகையில் சென்னையில் பாரதியார் சிலைக்கு ஆளுநர் ஆர்.என்.ரவி மற்றும் தமிழக பாஜக முன்னாள் தலைவர் தமிழிசை செளந்தரராஜன் ஆகியோர் மரியாதை செலுத்தினர்.

இதையடுத்து தமிழிசை செளந்தரராஜன் செய்தியாளர்களை சந்தித்து பேசுகையில், பாரதியாருக்கு வணக்கம் சொல்லும் நேரத்தில் பிரதமர் மோடிக்கு நன்றியை தெரிவித்து கொள்கிறேன். வந்தே மாதிரம் 150வது ஆண்டு விவாதத்தில் பாரதியார் மற்றும் வ.உ.சியை நினைவு கூர்ந்தார் பிரதமர் மோடி. இந்தியாவில் எந்த பிரதமரும் பாரதியாருக்கும், வ.உ.சி-க்கும் மரியாதை செலுத்தியதே கிடையாது.

ஒருவேளை பாரதியார் இருந்திருந்தால், பிரதமர் மோடியை வாழ்த்தி பாடி இருப்பார். ஏனென்றால் தேசியத்தையும், தெய்வீகத்தையும் முன்னிறுத்தி வருகிறார். அதேபோல் அண்ணா அறிவாலயத்தில் கடந்த சில ஆண்டுகளுக்கு முன்பு வரை தேசிய கொடியை கூட திமுக ஏற்றியதே இல்லை. ஆனால் தேசப்பற்று பற்றி பேசிக் கொண்டிருக்கிறார்கள்.

தேச பக்தர்கள் போல் திருச்சி சிவா போன்றோர் நாடகமாடி கொண்டிருக்கிறார்கள். ஆனால் பிரதமர் மோடி காசியில் தமிழ்ச் சங்கத்தை ஏற்படுத்தி இருக்கிறார். திருக்குறளை அனைத்து மொழிகளிலும் மொழிபெயர்த்துள்ளார். தமிழ் வளர்ச்சிக்கு ஏராளமான விஷயங்களை மத்திய அரசு செய்து வருகிறது. ஆனால் திமுக இதுவரை பாரதியாருக்கு அரசு விழாவை எடுக்கவில்லை.

2026ல் தேசிய ஜனநாயக கூட்டணி வென்ற பின், பாரதியாருக்கு பிரதமர் மோடி முன்னிலையில் பிரம்மாண்ட அரசு விழா நடத்தும். அதற்கான கோரிக்கை நிச்சயம் வைக்கப்படும் என்று தெரிவித்தார். அதேபோல் ஆர்எஸ்எஸ் தலைமை அலுவலகத்தில் 2 ஆண்டுகளுக்கு முன்பு வரை தேசியக் கொடி ஏற்றப்படவில்லை என்பதும் குறிப்பிடத்தக்கது.