ஆக்சிஜன் தேவையா உடனே 104க்கு கூப்பிடுங்கள் - தமிழக அரசு அறிவிப்பு

தமிழகத்தில் ஆக்சிஜன் தேவைக்கு 104 என்கிற அவசர தொலைபேசி எண்ணை தொடர்பு கொள்ளலாம் என தமிழக அரசு அறிவித்துள்ளது.

சென்னை: தமிழக மருத்துவமனைகள், நர்சிங் ஹோம்களில் ஆக்சிஜன் தேவைப்படுவோர் உடனடியாக 104 என்ற எண்ணில் தொடர்பு கொள்ளலாம் என்று தமிழக அரசு தெரிவித்துள்ளது.

சென்னையில்கொரோனா தொற்று நாளுக்கு நாள் அதிகரித்து வரும் நிலையில் நேற்று 3 ஆயிரத்து 842 பேருக்கு தொற்று உறுதியானது. அத்துடன் அதிகபட்சமாக சென்னையில் மட்டும் 37 பேர் உயிரிழந்தனர்.குறிப்பாக ராஜீவ் காந்தி அரசு பொது மருத்துவமனையில் நோயாளிகளுக்காக ஏற்படுத்தப்பட்டுள்ள படுக்கைகளும் வேகமாக நிரம்பி வருகிறது.

இதுவரை 1,618 படுக்கை வசதிகள் ஏற்படுத்தப்பட்டு நிலையில் ஆயிரத்து 104 நோயாளிகள் சிகிச்சை பெற்று வருகின்றனர். இதில் 551 நோயாளிகள் ஆக்சிஜன் வசதியுடனும், 93 பேருக்கு தீவிர ஆக்சிஜன் , 72 பேர் அதிதீவிர ஆக்சிஜன் வசதி தேவைப்படும் நிலையில் சிகிச்சை பெற்று வருகின்றனர்.

கொரோனா அறிகுறி இல்லாமலோ, லேசான காய்ச்சல் உள்ளவர்களோ தேவைப்பட்டால் மருத்துவமனைக்கு வரலாம் என்றும் இல்லை என்றால் வீட்டிலேயே தங்களை தனிமைப்படுத்திக் கொள்ள வேண்டும் எனவும் மருத்துவர்கள் அறிவுறுத்தியுள்ளனர்.

தமிழகத்தில் நாளொன்றுக்கு தமிழ்நாட்டில் 400 டன் மற்றும் புதுச்சேரியில் 150 டன் உற்பத்தி செய்யப்படும் நிலையில், 1,167 டன் இருப்பு இருப்பதாக உயர்நீதிமன்றத்தில் தெரிவித்துள்ளது. தற்போதைய தேவை என்பது 250 டன் ஆக மட்டுமே உள்ளதாகவும்
தெரிவிக்கப்பட்டுள்ளது.

தமிழகத்தில் ஆக்சிஜன் பற்றாக்குறை இல்லை என்று மாநில அரசு தெரிவித்துள்ள நிலையில் ஆக்சிஜன் தேவைப்படுவோர் உடனடியாக 104 என்ற எண்ணில் தொடர்பு கொள்ளலாம் என்றும் தமிழக அரசு தெரிவித்துள்ளது.

கொரோனா நோயாளிகள் அதிகரித்து வருவதால் ஆக்சிஜன் தேவையும் அதிகரித்து வருகிறது. மருத்துவமனைகளில் சிகிச்சை பெறும் நோயாளிகளுக்கு தட்டுப்பாடின்றி உடனுக்குடன் ஆக்சிஜன் கிடைக்கும் வகையில் உதவி எண்ணை தமிழக அரசு அறிவித்துள்ளது.

English summary

The Tamil Nadu government has announced that you can call the emergency number 104 for oxygen needs in Tamil Nadu.