முதல்வர் ஸ்டாலின் கொரோனாவிலிருந்து குணமடைய ஓபிஎஸ் வாழ்த்து! எடப்பாடி மவுனம்! அரசியல் நாகரீகம் எங்கே?

Published: Wednesday, July 13, 2022, 16:39 [IST]

Subscribe to Oneindia Tamil

சென்னை: கொரோனா தொற்றிலிருந்து முதல்வர் ஸ்டாலின் குணமடைய வேண்டும் என ஓ.பன்னீர்செல்வம் வாழ்த்துத் தெரிவித்துள்ளார்.

முதல்வருக்கு கொரோனா

முதலமைச்சர் ஸ்டாலின் கொரோனா தொற்று காரணமாக சென்னையில் உள்ள தனது இல்லத்தில் தனிமைப்படுத்திக் கொண்டார். இந்நிலையில் அவருக்கு கொரோனா பாதிப்பு உறுதி செய்யப்பட்டது முதல் அரசியல் கட்சித் தலைவர்களும், அமைச்சர்களும், சட்டமன்ற உறுப்பினர்களும் முதல்வரின் உடல்நலம் பற்றி அக்கறையோடு கேட்டறிந்து வருவதோடு விரைவில் நலம்பெற வேண்டும் என்ற தங்கள் வாழ்த்துக்களை தெரிவித்து வருகின்றனர்.

எடப்பாடி பழனிசாமி

இந்நிலையில் அதிமுகவின் இடைக்கால பொதுச்செயலாளரும், பிரதான எதிர்க்கட்சித் தலைவருமான எடப்பாடி பழனிசாமியிடம் இருந்து இப்படி விசாரிப்புகளோ, வாழ்த்தோ வரவில்லை என்பது தான் இங்கு கவனிக்கத்தக்கது. தமிழகத்தில் தழைத்தோங்கி வந்த அரசியல் நாகரீகம் மீண்டும் கற்கால அரசியலை நோக்கி திரும்புகிறதோ என எண்ணத் தோன்றுகிறது. இதனிடையே எதிர்க்கட்சித் துணைத் தலைவர் ஓ.பன்னீர்செல்வம் முதல்வர் நலம் பெற வேண்டும் என்ற தனது விருப்பத்தை தெரிவித்திருக்கிறார்.

ஓபிஎஸ் நலம் விசாரிப்பு

இது தொடர்பாக அவர் தனது டிவிட்டர் பக்கத்தில் வெளியிட்டுள்ள பதிவில் கூறியிருப்பதாவது; ''மாண்புமிகு தமிழ்நாடு முதலமைச்சர் திரு.மு.க.ஸ்டாலின் அவர்களுக்கு கொரோனா தொற்று உறுதி செய்யப்பட்டுள்ள செய்தி அறிந்தேன். மு.க.ஸ்டாலின் அவர்கள் கொரோனா பாதிப்பிலிருந்து பூரண நலம் பெற்று மக்கள் பணியைத் தொடர, எல்லாம் வல்ல இறைவனை பிரார்திக்கிறேன்.'' இவ்வாறு அவர் கூறியிருக்கிறார்.

பாஜக தலைவர்

பாஜக மாநிலத் தலைவர் அண்ணாமலையும், ஆளுநர் ரவியும் முதலமைச்சர் ஸ்டாலின் கொரோனா தொற்றிலிருந்து விரைந்து நலம்பெற வேண்டும் என வாழ்த்துக் கூறியிருப்பது குறிப்பிடத்தக்கது. அதிலும் குறிப்பாக ஆளுநர் ரவி விடுத்த அறிக்கையில், முதல்வர் ஸ்டாலினை வலிமைமிக்க தலைவர் என்று கூறியிருப்பது கவனிக்கத்தக்கது.

Published On July 13, 2022