10 வருஷத்துல இப்போதான் மகளிர் தினம் வருதா? சிலிண்டர் விலை குறைப்பு குறித்து.. மோடிக்கு சீமான் கேள்வி
சென்னை: சர்வதேச மகளிர் தினத்தையொட்டி, சமையல் எரிவாயு சிலிண்டரின் விலை ரூ.100 குறைக்கப்படுவதாக பிரதமர் நரேந்திர மோடி அறிவித்திருந்தார். இந்நிலையில், இந்த அறிவிப்புக்கு சீமான் சரமாரியாக கேள்வி எழுப்பியுள்ளார்.
"இன்று மகளிர் தினத்தையொட்டி வீட்டு உபயோகத்துக்கான சமையல் எரிவாயு சிலிண்டர் விலையை ரூ.100 குறைக்க அரசு முடிவு செய்துள்ளது. இது நாடு முழுவதும் உள்ள பல லட்சம் குடும்பங்களின் நிதிச் சுமையை குறிப்பிடத்தக்க அளவுக்கு குறைக்கும். குறிப்பாக பெண் சக்திக்கு வலிமை தரும் சமையல் எரிவாயு சிலிண்டரை மேலும் எளிதாக வாங்கும் நிலையை உருவாக்குவதன் மூலம் குடும்பங்களின் நலனை உறுதி செய்வதோடு, ஆரோக்கியமான சுற்றுச்சூழலையும் உருவாக்கலாம்.
பெண்களுக்கு வலிமை சேர்ப்போம் என்ற எங்களின் வாக்குறுதிக்கு இணங்கவும், அவர்களின் வாழ்தலை எளிதாக்குவதை உறுதிப்படுத்தும் வகையிலும் இந்த அறிவிப்பு வெளியிடப்படுகிறது" என்று பிரதமர் நரேந்திர மோடி கூறியிருந்தார்.
லோக்சபா தேர்தல் நெருங்குவதால் இந்த அறிவிப்பு வெளியாகியுள்ளது என எதிர்க்கட்சிகள் இதற்கு கடும் கண்டனம் தெரிவித்திருந்தன. இந்நிலையில், நாம் தமிழர் கட்சியின் தலைமை ஒருங்கிணைப்பாளர் சீமான் இந்த அறிவிப்பு குறித்து சரமாரியாக கேள்வி எழுப்பியுள்ளார்.
இது குறித்து அவர் விடுத்துள்ள அறிக்கையில், "இந்திய பிரதமர் மோடி அவர்கள் மகளிர் நாளினை முன்னிட்டு எரிகாற்று உருளையின் விலையை ரூ.100 அளவிற்கு குறைத்திருப்பது வேடிக்கையாக உள்ளது.
எரிகாற்று உருளை என்பது மகளிருக்கு மட்டுமானதா? வீட்டுக்கானதில்லையா? குடும்பத்திற்கானதில்லையா? பாஜக ஆட்சிக்கு வந்த பத்தாண்டுகளில் இப்போதுதான் முதல்முறையாக மகளிர் தினம் வருகிறதா? கடந்த 5 ஆண்டுகளில் 58 முறை எரிகாற்று உருளையின் விலையை 45% உயர்த்திவிட்டு, இந்த ஆண்டு மட்டும் குறைப்பதற்கு காரணம் மகளிர் நாள் வருவதனாலா? இந்த ஆண்டு தேர்தல் நாள் வருவதனாலா?" என்று கேள்வி எழுப்பியுள்ளார்.
மத்திய அரசு ஊழியர்களுக்கு அகவிலைப்படி 4% உயர்வு, வங்கி ஊழியர்களுக்கான ஊதியம் 17% உயர்வு, உஜ்வாலா திட்டத்தின் கீழ் சிலிண்டர்களுக்கு வழங்கப்படும் ரூ.300 மானியம் மேலும் ஓராண்டுக்கு நீடிப்பு என கடந்த 2 நாட்களில் ஏராளமான அறிவிப்புகளை மத்திய அரசு வெளியிட்டு வருகிறது. இதன் தொடர்ச்சியாக சிலிண்டரின் விலையும் குறைக்கப்பட்டிருக்கிறது என்பது குறிப்பிடத்தக்கது.
Click it and Unblock the Notifications
Sign in with Google