நிதியும் இல்லை நீதியும் இல்லை.. மக்கள் பார்த்துக்கிட்டே இருக்காங்க: பாஜக அரசு செயலால் ஸ்டாலின் கோபம்

சென்னை: மத்திய பாஜக அரசு, புயல் வெள்ள பாதிப்புகளுக்காக தமிழ்நாட்டிற்கு 276 கோடி ரூபாய் மட்டும் நிதி அறிவித்துள்ளதற்கு தமிழக முதல்வர் ஸ்டாலின் கண்டனம் தெரிவித்துள்ளார்.

கடந்த டிசம்பர் மாதம் மிக்ஜாம் புயல் காரணமாக சென்னையில் கடும் மழை வெள்ள பாதிப்புகள் ஏற்பட்டன. அதைத் தொடர்ந்து, தென் மாவட்டங்களில் ஏற்பட்ட கனமழையால் கடுமையான வெள்ள பாதிப்பு ஏற்பட்டது. தேசிய பேரிடர் நிவாரண நிதியிலிருந்து ரூபாய் 37,907 கோடி நிதி ஒதுக்க தமிழக அரசு கோரிக்கை விடுத்தது. தமிழக முதல்வர் ஸ்டாலின் கடிதம் வாயிலாக மத்திய அரசுக்கு கோரிக்கை விடுத்து வந்தார். திமுக எம்.பி டி.ஆர்.பாலு தலைமையில் கடந்த ஜனவரி மாதம் நாடாளுமன்ற உறுப்பினர்கள் குழு உள்துறை அமைச்சர் அமித் ஷாவை நேரில் சந்தித்து கோரிக்கை மனு வழங்கியது.

மத்திய குழு அறிக்கை வந்ததும் சில நாட்களில் நிதி ஒதுக்கப்படும் என்று உள்துறை அமைச்சர் கூறி இருந்தார். இந்நிலையில், மத்திய உள்துறை அமைச்சகம் மிக்ஜாம் புயல் நிவாரண நிதியாக ரூபாய் 115.49 கோடியும், டிசம்பர் மாதம் ஏற்பட்ட வெள்ள நிவாரண நிதியாக ரூபாய் 160.61 கோடியும் ஆக மொத்தம் ரூபாய் 276.10 கோடி நிதி ஒதுக்கப்பட்டிருப்பதாக அறிவிப்பு வெளியாகியுள்ளது.

புயல் வெள்ள நிவாரணமாக தமிழக அரசு சுமார் 38 ஆயிரம் கோடி நிதி கோரி இருந்த நிலையில், மாநில பேரிடர் நிவாரண நிதியில் உள்ள இருப்பு தொகையான ரூபாய் 406.57 கோடியை கழித்தது போக மீதியுள்ள 276.10 கோடியை மட்டுமே தமிழ்நாட்டுக்கு மத்திய அரசு ஒதுக்கியுள்ளது. இது தமிழ்நாட்டில் சலசலப்பை ஏற்படுத்தி உள்ளது.

இந்நிலையில், தமிழ்நாட்டிற்கான புயல் வெள்ள நிவாரண நிதியாக மத்திய அரசு 276 கோடி ரூபாய் மட்டும் அறிவித்துள்ளதற்கு தமிழக முதல்வர் மு.க. ஸ்டாலின் கண்டனம் தெரிவித்துள்ளார். தமிழ்நாட்டை மத்திய பாஜக அரசு வஞ்சிப்பதாக முதல்வர் ஸ்டாலின் குற்றம்சாட்டியுள்ளார்.

தமிழக முதல்வர் ஸ்டாலின் வெளியிட்டுள்ள சமூக வலைதள பதிவில், "மிக்ஜாம் புயல் மற்றும் வெள்ளப் பாதிப்புகளுக்கான நிவாரணமாகத் தமிழ்நாடு கோரியது 37,907 கோடி ரூபாய். பாதிக்கப்பட்ட மக்களுக்கு உடனடி நிவாரணமாகவும், உட்கட்டமைப்புகளை மறுசீரமைக்கவும் தமிழ்நாடு அரசு மாநிலப் பேரிடர் நிதியில் இருந்து இதுவரை செலவு செய்துள்ளது 2,477 கோடி ரூபாய்.

ஆனால், ஒன்றிய பா.ஜ.க அரசு தற்போது அறிவித்திருப்பதோ வெறும் 276 கோடி ரூபாய். இதுவும் நாம் உச்சநீதிமன்றத்தை நாடிய பிறகே அறிவிக்கப்பட்டுள்ளது. தமிழ்நாட்டுக்கு நிதியும் கிடையாது, நீதியும் கிடையாது என வஞ்சிக்கும் ஒன்றிய பாஜக அரசின் ஒவ்வொரு செயலையும் நம் மக்கள் பார்த்துக்கொண்டுதான் இருக்கிறார்கள்!" எனத் தெரிவித்துள்ளார்.

English summary

Tamil Nadu Chief Minister Stalin has condemned the central BJP government's announcement of Rs 276 crore as a fund for Tamil Nadu for michaung cyclone and flood damage.