“எச்சரிக்கையாக இருக்க வேண்டும்..” சென்னை மக்களுக்கு பறந்த SMS! அலர்ட் கொடுத்த தமிழக அரசு!

சென்னை: டிட்வா புயல் சென்னையை நெருங்கி வரும் நிலையில், மழை தீவிரமெடுக்க தொடங்கியிருக்கிறது. இந்நிலையில் மக்கள் எச்சரிக்கையாக இருக்க வேண்டும் என்று தமிழ்நாடு அரசின் பேரிடர் மேலாண்மை ஆணையம் எஸ்எம்எஸ் மூலமாக அறிவுறுத்தியிருக்கிறது.

அதில், "டிட்வா புயல் காரணமாக கனமழை பெய்யக்கூடும் என்பதால், தாழ்வான பகுதியில் வசிக்கும் மக்கள் பாதுகாப்பான இடங்களுக்கு செல்லவும். பொதுமக்கள் பலவீனமான கட்டிடங்கள், மரங்களுக்கு கீழே நிற்க வேண்டாம். மாவட்ட நிர்வாகம் நிவாரண மையங்களுக்கு செல்ல அறிவுறுத்தினால் ஒத்துழைக்கவும். விழுந்த மின் கம்பிகள், ஈரமான மின் சாதனங்களைத் தொடாதீர்கள்" என்று எச்சரிக்கப்பட்டிருக்கிறது.

முன்னதாக செய்தியாளர்களை சந்தித்த வருவாய் மற்றும் பேரிடர் மேலாண்மை துறை அமைச்சர் கே.கே.எஸ்.எஸ்.ஆர்.ராமச்சந்திரன், "இந்த புயல் சென்னையில் கரையை கடக்காது. சென்னையை ஒட்டி வந்து, ஆந்திரா பக்கம் நெல்லூர் பக்கம் சென்று கரையை கடக்கும் என வானிலை மையம் தெரிவித்திருக்கிறது.

இருப்பினும் சென்னை மற்றும் அதனை ஒட்டியுள்ள மாவட்டங்களில் மழை பெய்யும். நாளை கனமழையாக கூட பெய்யலாம். எனவே பொதுமக்கள் கவனமாக இருக்க வேண்டும். குறிப்பாக வெளியே வர வேண்டாம். புயலால் பெரிய அளவுக்கு பாதிப்பு இருக்காது. புயல் அறிவிப்பு வந்த உடனேயே முதலமைச்சர் முன்னெச்சரிக்கை நடவடிக்கைகளை முடுக்கி விட்டிருக்கிறார்.

பாதிக்கப்பட்ட மக்களுக்கு விநியோகிக்க 5 கிலோ பாக்கெட்டுகளாக 5 லட்சம் கிலோ அரிசி பாட்கெட்டுகள் தயார் நிலையில் இருக்கின்றன. அதிகனமழை எச்சரிக்கை விடுக்கப்பட்ட மாவட்டங்களில் முன்னெச்சரிக்கை நடவடிக்கையை தீவிரப்படுத்தியிருக்கிறோம். தமிழ்நாட்டில் தற்போது வரை டிட்வா புயல் காரணமாக எந்த உயிரிழப்புகளும் இல்லை. 13 நிவாரண மையங்கள் அமைக்கப்பட்டு 1058 பேர் அதில் தங்க வைக்கப்பட்டுள்ளனர். இந்த புயலால் ஒரு உயிரிழப்பு கூட இருக்க கூடாது. அந்த வகையில் பொதுமக்கள் ஒத்துழைப்பு கொடுக்க வேண்டும்" என அறிவுறுத்தியிருந்தார்.

English summary

The Tamil Nadu State Disaster Management Authority has initiated SMS-based public alerts for Cyclone Ditwah, urging citizens to take immediate safety precautions and stay updated through official channels.