சூப்பர்..! தமிழ்நாட்டில் 50ஆவது நாளாக குறையும் கொரோனா.. 3000 கீழ் சென்ற தினசரி வைரஸ் பாதிப்பு

Published: Saturday, July 10, 2021, 20:01 [IST]

Subscribe to Oneindia Tamil

சென்னை:தமிழ்நாட்டில் தினசரி கொரோனா பாதிப்பு தொடர்ந்து 50ஆவது நாளாகக் குறைந்துள்ள நிலையில், இன்று மாநிலத்தில் 2913 பேருக்கு மட்டுமே கொரோனா பாதிப்பு உறுதி செய்யப்பட்டுள்ளது.

தமிழ்நாட்டில் கடந்த மே மாதம் கொரோனா 2ஆம் அலை ஏற்பட்டது. அப்போது தினசரி வைரஸ் பாதிப்பு 35 ஆயிரம் வரை கூட சென்றது.

இதனால் நிலைமையைக் கட்டுப்படுத்த தமிழ்நாட்டில் ஊரடங்கு அமல்படுத்தப்பட்டது. ஊரடங்கிற்குப் பின்னரே மாநிலத்தில் வைரஸ் பாதிப்பு குறைந்துள்ளது

தினசரி கொரோனா பாதிப்பு

தமிழ்நாட்டில் கொரோனா ஊரடங்கிற்குப் பிறகு வைரஸ் பாதிப்பு தொடர்ந்து குறைந்து வருகிறது. அதன்படி இன்றும் 50ஆவது நாளாகத் தமிழ்நாட்டில் தினசரி வைரஸ் பாதிப்பு குறைந்துள்ளது. இன்று மாநிலத்தில் மொத்தம் 1.50 லட்சம் பேருக்கு கொரோனா பரிசோதனை செய்யப்பட்டது. அதில் வெளிமாநிலங்களில் இருந்து திரும்பிய 5 பேர் உட்பட 2,913 பேருக்கு கொரோனா கண்டறியப்பட்டுள்ளது.

கொரோனா உயிரிழப்புகள்

கொரோனா உயிரிழப்புகளும் மாநிலத்தில் தொடர்ந்து குறைந்து வருகிறது. இன்று தமிழ்நாட்டில் 49 பேர் மட்டுமே கொரோனாவால் பலியாகியுள்ளனர். அவர்களில் 43 பேர் அரசு மருத்துவமனைகளிலும் 6 பேர் தனியார் மருத்துவமனைகளிலும் சிகிச்சை பெற்று வந்தவர்கள் ஆகும். மேலும், இன்று உயிரிழந்தவர்களில் 9 பேர் எவ்வித இணை நோயும் இல்லாதவர்கள், 10 பேர் 50 வயதுக்கு குறைவானவர்கள். ஒட்டுமொத்தமாக மாநிலத்தில் இதுவரை 33,371 பேர் கொரோனாவால் உயிரிழந்துள்ளனர்.

ஆக்டிவ் கேஸ்கள்

கொரோனாவால் தற்போது சிகிச்சை பெற்று வருவோரின் எண்ணிக்கையும் தொடர்ந்து குறைந்து வருகிறது. மாநிலத்தில் தற்போது சிகிச்சை பெற்று வருவோரின் எண்ணிக்கை 32,767ஆக உள்ளது. இன்று ஒரே நாளில் மட்டும் 3,321 பேர் கொரோனா சிகிச்சை முடிந்து டிஸ்சார்ஜ் செய்யப்பட்டுள்ளனர். ஒட்டுமொத்தமாகத் தமிழ்நாட்டில் இதுவரை 24,49,873 பேர் கொரோனாவில் இருந்து குணமடைந்துள்ளனர்.

மாவட்ட ரீதியாக வைரஸ் பாதிப்பு

இன்று கோவை மாவட்டத்தில் 338 பேருக்கு கொரோனா உறுதி செய்யப்பட்டுள்ளது. தமிழ்நாட்டில் இப்போது கோவையில் தான் வைரஸ் பாதிப்பு அதிகம். அதேபோல ஈரோட்டில் 215 பேருக்கும், சென்னையில் 174 பேருக்கும் வைரஸ் பாதிப்பு உறுதி செய்யப்பட்டுள்ளது. செங்கல்பட்டு (148), சேலம் (180), தஞ்சை (174), திருப்பூர் (169), திருச்சி (116) ஆகிய மாவட்டங்களில் மட்டும் வைரஸ் பாதிப்பு 100க்கு மேல் உள்ளது

Published On July 10, 2021