9 மாவட்ட ஊரக உள்ளாட்சித் தேர்தல்... அரசியல் கட்சிகளுடன் தேர்தல் ஆணையம் இன்று ஆலோசனை..!

சென்னை: 9 மாவட்டங்களில் ஊரக உள்ளாட்சித் தேர்தல் நடத்துவது குறித்து அங்கீகரிக்கப்பட்ட அரசியல் கட்சிகளுடன் மாநில தேர்தல் ஆணையம் இன்று ஆலோசனை நடத்துகிறது.

தமிழகத்தில் கடந்த 2019-ம் ஆண்டு டிசம்பர் மாதம் 27 மாவட்டங்களில் மட்டும் ஊரக உள்ளாட்சித் தேர்தல் நடைபெற்றது. எஞ்சிய 9 மாவட்டங்களில் வார்டு வரையறை பணிகள் முடிவடையாததால் தேர்தல் நடத்தப்படவில்லை.

இந்நிலையில் செப்டம்பர் 15-ம் தேதிக்குள் விடுபட்ட 9 மாவட்டங்களிலும் ஊரக உள்ளாட்சித் தேர்தலை நடத்தி முடிக்க வேண்டும் என உச்சநீதிமன்றம் உத்தரவிட்டுள்ளது. இதையடுத்து அதை செயல்படுத்துவதற்கான முன்னெடுப்புகளை தமிழக அரசு மேற்கொண்டுள்ளது. அதன் ஒரு பகுதியாக அரசியல் கட்சி பிரதிநிதிகளுடன் மாநில தேர்தல் ஆணையம் இன்று ஆலோசனை நடத்துகிறது.

ஊரக உள்ளாட்சித் தேர்தல் நடத்தப்பட வேண்டிய காஞ்சிபுரம், செங்கல்பட்டு, கள்ளக்குறிச்சி, வேலூர், ராணிப்பேட்டை, திருப்பத்தூர், நெல்லை, தென்காசி, ஆகிய 9 மாவட்டங்களில் தேர்தல் பணிகளை தீவிரப்படுத்தியுள்ளது தேர்தல் ஆணையம். இதனிடையே மேற்கண்ட 9 மாவட்ட திமுக நிர்வாகிகளுடன் முதலமைச்சரும், திமுக தலைவருமான மு.க.ஸ்டாலின் நேற்று ஆலோசனை நடத்தினார்.

9 மாவட்டங்களிலும் தேர்தல் நடத்தும் அலுவலர்கள் மற்றும் உதவி அலுவலர்களுக்கு பயிற்சி அளிக்கப்பட்டுள்ளதுடன் வாக்காளர் பெயர் சேர்ப்பு, திருத்தம், முகவரி மாற்றம் உள்ளிட்ட பணிகளையும் மாநில தேர்தல் ஆணையம் செய்துள்ளது. இதுமட்டுமல்லாமல் கடந்த மாதம் 31-ம் தேதியே இறுதி வாக்காளர் பட்டியலையும் வெளியிட்டுள்ளது.

காஞ்சிபுரம், செங்கல்பட்டு, கள்ளக்குறிச்சி, வேலூர், ராணிப்பேட்டை, திருப்பத்தூர், நெல்லை, தென்காசி, ஆகிய 9 மாவட்டங்களில் 76 லட்சத்து 59 ஆயிரத்து 720 பேர் வாக்காளர்களாக உள்ளனர். மேலும், சட்டமன்றத் தேர்தலை போல் வாக்குப்பதிவு நேரத்தின் போது கொரோனாவால் பாதிக்கப்பட்டவர்களுக்கு மாலை 6 மணி முதல் 7 மணி வரை பிரத்யேகமாக நேரம் ஒதுக்கீடு செய்ய மாநில தேர்தல் ஆணையம் முடிவெடுத்துள்ளது.

கொரோனா பரவலை கருத்தில் கொண்டு அதற்கேற்ற வகையில் தேர்தல் ஏற்பாடுகளை மாநில தேர்தல் ஆணையர் பழனிசாமி மேற்கொண்டு வருகிறார். சென்னை அரும்பாக்கத்தில் உள்ள தமிழ்நாடு மாநில தேர்தல் ஆணையம் அலுவலகத்தில் இன்று நண்பகல் 12 மணியளவில் அங்கீகரிக்கப்பட்ட அரசியல் கட்சிகளுடன் ஆலோசனை நடத்தும் நிலையில், விரைவில் தேர்தல் தேதி அறிவிக்கப்படும் என எதிர்பார்க்கப்படுகிறது.

இதனால் திமுக, அதிமுக, பாஜக, காங்கிரஸ், உள்ளிட்ட அரசியல் கட்சிகள் மேற்கண்ட 9 மாவட்ட ஊரக உள்ளாட்சித் தேர்தல் பணிகளை தீவிரப்படுத்தி உள்ளது. வேட்பாளர் தேர்வு, பிரச்சாரம் உள்ளிட்ட பணிகளில் அரசியல் கட்சித் தலைமைகள் கவனம் செலுத்தத் தொடங்கியிருகின்றனர்.

English summary

Tamilnadu state Election Commission today consulted with political parties