பிரதமரே.. இதுதான் திராவிட மாடல்.. மோடியை மேடையில் வைத்துக்கொண்டே ‘க்ளாஸ்’ எடுத்த முதல்வர் ஸ்டாலின்!

Updated: Thursday, May 26, 2022, 19:12 [IST]

Subscribe to Oneindia Tamil

சென்னை : தமிழ்நாட்டின் வளர்ச்சி என்பது பொருளாதாரத்தை மட்டும் சார்ந்தது அல்ல. சமூக நீதி, சமத்துவம், பெண்கள் நீதியை உள்ளடக்கியது. அனைத்தையும் உள்ளடக்கிய வளர்ச்சியே திராவிட மாடல் எனப் பேசினார் முதலமைச்சர் மு.க.ஸ்டாலின்.

தொண்டர்கள் ஆர்ப்பரிப்பு

இந்த விழாவில் வரவேற்புரை ஆற்றிய மத்திய அமைச்சர் எல்.முருகன், முதலமைச்சர் மு.க.ஸ்டாலின் பெயரைச் சொன்னதும், திமுக தொண்டர்கள் ஆர்ப்பரித்தனர். இதனால் அவர் சற்று இடைவெளி விட்டுப் பேசினார். பின்னர் முதல்வர் ஸ்டாலின் பேச எழுந்ததும் மீண்டும் தொண்டர்கள் உற்சாக ஆரவாரம் செய்தனர்.

முதல்வர் பேச்சு

முதல்வர் மு.க.ஸ்டாலின் பேசுகையில், "தமிழ்நாட்டு மக்களின் பேராதரவுடன் திமுக ஆட்சி ஏற்ற பிறகு பிரதமர் மோடி பங்கேற்கும் முதல் விழா இது. தமிழ்நாட்டில் திட்டங்கள் துவங்க வருகை தந்துள்ள பிரதமர் நரேந்திர மோடிக்கு மக்கள் சார்பில் நன்றி. ஒட்டுமொத்த இந்திய நாட்டின் வளர்ச்சியில் தமிழ்நாட்டு மக்களின் பங்களிப்பு மிக மிக முக்கியமானது. மாநிலங்களுக்கு ஒன்றிய அரசு வழங்கும் நிதிப்பங்கீடு காலப்போக்கில் மாறும். ஒன்றிய அரசின் திட்டங்களில் மாநில அரசின் பங்கு அதிகம்.

ஜிஎஸ்டி நிலுவை

ஒன்றிய அரசின் நிதி குறைப்பால் மாநிலங்களுக்கு நிதிச்சுமை ஏற்படுகிறது. தமிழ்நாட்டுக்கு வழங்க வேண்டிய ஜி.எஸ்.டி. நிலுவைத்தொகை ரூ.14,000 கோடியை விரைந்து வழங்க வேண்டும். தமிழ்நாட்டின் பங்களிப்புக்கு ஏற்ப, நிதி ஒதுக்கீடு அதிகரிக்க வேண்டும்.

திராவிட மாடல்

பொருளாதார வளர்ச்சியில் இந்தியாவில் தமிழ்நாடு முன்னிலையில் உள்ளது. தமிழ்நாட்டின் வளர்ச்சி என்பது பொருளாதாரத்தை மட்டும் சார்ந்தது அல்ல. கல்வி, பொருளாதாரம், மருத்துவம், சமூக நீதி, சமத்துவம், பெண்கள் நீதியை உள்ளடக்கியது தான் தமிழ்நாட்டின் வளர்ச்சி. அனைத்தையும் உள்ளடக்கிய வளர்ச்சியையே திராவிட மாடல் என்று கூறுகிறோம்" எனப் பேசினார். பிரதமர் மோடி பங்கேற்றிருக்கும் மேடையிலேயே மத்திய பாஜக அரசை "ஒன்றிய அரசு" என முதல்வர் ஸ்டாலின் தொடர்ந்து பேசியதற்கு திமுக தொண்டர்கள் ஆரவாரம் செய்தனர். மேலும் பிரதமரே என்று அழைத்தபடி, திராவிட மாடல் குறித்து ஸ்டாலின் விளக்கி கூறியதை திமுகவினர் சமூக வலைத்தளங்களில் பாராட்டி வருகிறார்கள்.