விவசாயிகளே நல்ல செய்தி.. மாடு வளர்க்குறீங்களா.. ஆவின் எடுத்த சூப்பர் முடிவு

சென்னை: கறவை மாடுகள் மற்றும் பால் முகவர்களுக்கு காப்பீடு வழங்கும் திட்டத்தை செயல்படுத்த ஆவின் முடிவு செய்துள்ளது. அதற்காக பால் முகவர்களை அழைத்து ஆலோசனை நடத்தவும் ஆவின் திட்டமிட்டுள்ளது.

கறவை மாடுகள் திடீரென இறந்து போனால் விவசாயிகள் பெரிய அளவில் பாதிக்கப்படுகிறார்கள். குறிப்பாக சிறிய அளவிலான பால் உற்பத்தி செய்யும் குடும்பத்தினர், கறவை மாடுகள் வாங்க வசதி இல்லாமல் அந்த தொழிலையே கைவிடும் நிலைக்கு தள்ளப்படுகிறார்கள்.

மேலும் கால்நடைகள் இழப்பால் பால் உற்பத்தியாளர்கள், விவசாயிகளுக்கு பெரிய இழப்பும் ஏற்படுகிறது. அந்த இழப்பில் இருந்து மீண்டுவர வேண்டும் என்றால், கறவை மாடுகள் வாங்க கண்டிப்பாக பணம் வேண்டும். எனவே இப்படியான சூழலில் கறவை மாடுகள் மற்றும் பால் முகவர்களுக்கு காப்பீடு வழங்கும் திட்டத்தை செயல்படுத்த ஆவின் நிர்வாகம் முடிவு செய்துள்ளது.

தற்போதைய நிலையில் கால்நடைகளுக்கான காப்பீட்டு திட்டத்தை, மத்திய அரசு நாடு முழுவதும் செயல்படுத்தி வருகிறது. இதில், பசு, எருமை, ஆடுகள், கோழிகள் உள்ளிட்டவற்றுக்கு காப்பீடு செய்யப்படுகிறது,

இந்நிலையில், கறவை மாடுகளுக்கு காப்பீடு வழங்க ஆவின் நிர்வாகம் திட்டமிட்டிருக்கிறது. அதற்கான செயல்முறை பணியை மேற்கொண்டு வருகிறது. காப்பீடு கட்டணமாக, ரூ.600 முதல் ரூ.700 வரை வசூல் செய்யப்படும் என்று தகவல்கள் வெளியாகி உள்ளன.

இதில், 25 சதவீதம் மானியம் வழங்கப்படும் என்றும் இந்த மானியத்தை மத்திய, மாநில அரசுகள் பகிர்ந்து கொள்ளும் என்றும் கூறப்படுகிறது. இதில் குறிப்பிடத்தக்க விஷயம் என்னவென்றால், மாடு வளர்க்கும் ஆதிதிராவிடர் மற்றும் பழங்குடியினருக்கு கூடுதல் மானியம் வழங்கப்படும். நடப்பாண்டு, 50 சதவீத கறவை மாடுகளுக்கு காப்பீடு வழங்க ஆவின் நிர்வாகம் திட்டமிட்டுள்ளது.

கறவை மாடுகளுக்கு காப்பீடு தருவது குறித்து ஆவின் அதிகாரிகளுக்கு பயிற்சி அளிக்கப்பட்டுள்ளது. நந்தனத்தில் உள்ள தலைமை அலுவலகத்தில் தான் இந்த பயிற்சி அளிக்கப்பட்டுள்ளது. இதேபோல, ஆவின் பால் முகவர்களுக்கும் ஆயுள் மற்றும் விபத்து காப்பீடு வழங்க அதிகாரிகள் ஆலோசித்து வருகிறார்கள்.

இதுகுறித்து வங்கிகளிடம் கருத்து கேட்கப்படவுள்ளதாகவும் கூறப்படுகிறது.இதனிடையே முதல்கட்டமாக, சென்னையில் உள்ள பால் முகவர்களை அழைத்து ஆலோசிக்க திட்டமிடப்பட்டுள்ளது.

English summary

Aavin has decided to implement a scheme to provide insurance to dairy cows and milk agents. For this, Aavin plans to call milk agents and hold consultations.