அண்ணாமலை அரசியலில் நுனிப்புல் மேயக் கூடாது! இது ஆரோக்யமான அரசியலுக்கு அழகல்ல! காங்கிரஸ் புத்திமதி!

சென்னை: பாஜக மாநிலத் தலைவர் அண்ணாமலை நுனிப்புல் மேய்ந்து கருத்து கூறி வருவது ஆரோக்கியமான அரசியலுக்கு அழகல்ல என தமிழக காங்கிரஸ் அறிவுரை கூறியுள்ளது.

எதையும் ஆழ்ந்து -புரிந்து கருத்துக்களை கூறாமல், அவசர கோலத்தில் அள்ளித் தெளிக்கிற வகையில் அண்ணாமலை பேசி வருவதாக விமர்சித்துள்ளது.

அண்ணாமலைக்கு பதிலடி கொடுக்கும் வகையில் தமிழக காங்கிரஸ் கமிட்டி விடுத்துள்ள அறிக்கையில் கூறியிருப்பதாவது;

அரசியல் உள்நோக்கம்

இந்தியாவில் ஆட்சி மொழியாக இந்தியை எதிர்க்கிற தி.மு.க.வும், இந்தியை திணித்த காங்கிரஸ் கட்சியும் கூட்டணி வைத்திருப்பது எந்த அடிப்படையிலானது என்று தமிழக பா.ஜ.க. தலைவர் அண்ணாமலை பேசியிருக்கிறார். வரலாற்றை அறியாமல் அரசியல் உள்நோக்கத்துடன் திரிபுவாத கருத்துகளை கூறியிருக்கிறார்.

அறியாத அண்ணாமலை

பிரதமர் நேரு 1961 ல் கொடுத்த உறுதிமொழியின்படி, இந்தி பேசாத மக்கள் விரும்புகிற வரை ஆங்கிலமும் தொடர்ந்து ஆட்சி மொழியாக நீடிக்கும் என்று அறுதியிட்டுக் கூறியதை எவராலும் மறுத்திட இயலாது. அதோடு, பிரதமர் சாஸ்திரியும், பிரதமர் இந்திரா காந்தியும் ஆட்சி மொழிகள் சட்டத்தில் திருத்தம் கொண்டு வந்து ஆங்கிலம் தொடர்ந்து ஆட்சி மொழியாக நீடிப்பதற்கு பாதுகாப்பு வழங்கியதை அண்ணாமலை அறியாமல் போனது வியப்பைத் தருகிறது.

காவல் பணி

இந்தியக் காவல் பணியில் இந்தியை படிக்காமலேயே தேர்வு பெற்றதாக அண்ணாமலை புளகாங்கிதம் அடைந்திருக்கிறார். அவர் படித்த காலத்தில் இந்தி திணிக்கப்படவில்லை என்பதற்கு காங்கிரஸ் ஆட்சி தான் காரணமே தவிர, பா.ஜ.க. ஆட்சி அல்ல. ஏனெனில், அப்போது இந்தியாவை ஆண்டது காங்கிரஸ் கட்சி தான் என்பதை அண்ணாமலைக்கு நினைவுபடுத்த விரும்புகிறேன். தற்போது இந்திய காவல் பணியில் படிக்கிற நிலை ஏற்பட்டால் அவர் இந்தியை படிக்காமல் இருக்க முடியாது என்பதை அவர் நினைவில் கொள்ள வேண்டும்.

நுனிப்புல் மேயாதீர்

ஆட்சி மொழிக் குழு தலைவராக இருக்கிற அமித்ஷா கூறிய பரிந்துரைகளை படித்தால் அப்பட்டமாக ஆங்கிலத்தை அகற்றிவிட்டு இந்தியை மட்டுமே திணிக்கிற நடவடிக்கைகளை புரிந்து கொள்ள முடியும். பா.ஜ.க.வின் நோக்கம் ஒரே மொழி - ஒரே நாடு என்ற அடிப்படையில் இந்தியாவின் ஆட்சி மொழியான ஆங்கிலத்தை அகற்றிவிட்டு இந்தியை திணிப்பதற்கு தீவிர முயற்சிகள் எடுத்து வருவதை அண்ணாமலையால் மறுக்க முடியாது.

English summary

Tamil Nadu Congress has advised that BJP state president Annamalai comments are not good for healthy politics.