அப்பா இறந்த நாளும், எனது ஜெர்சி நம்பரும் ஒன்று.. பிளாஷ்பேக் சொன்ன விராட் கோலி!

சென்னை: இந்திய அணியின் நட்சத்திர வீரர் விராட் கோலி, எப்போதும் தனது ஜெர்சி எண்ணை 18ஆக மட்டுமே வைத்துக் கொள்வதற்கான காரணத்தை கூறியுள்ளது ரசிகர்களிடையே நெகிழ்ச்சியை ஏற்படுத்தியுள்ளது.

இந்திய அணியின் ஜாம்பவான் கிரிக்கெட் வீரர் விராட் கோலி. 2008ஆம் ஆண்டு யு-19 கிரிக்கெட் கேப்டனாக தொடங்கிய இவரது பயணத்தை யாராலும் தடுக்க முடியவில்லை.

சர்வதேச கிரிக்கெட்டில் இதுவரை 75 சதங்கள் விளாசியுள்ள விராட் கோலி, 25 ஆயிரத்திற்கும் அதிகமான ரன்களை குவித்துள்ளார். இன்னும் சொல்லப் போனால் சர்வதேச கிரிக்கெட்டில் கோலிக்கு நிகரான வீரர்கள் யாருமில்லை என்றே பார்க்கப்படுகிறது.

விராட் கோலி விளக்கம்

ஒவ்வொரு முறையும் விராட் கோலி அணிந்திருக்கும் ஜெர்சி நம்பரை கேமராவில் காட்டினால் கூட ரசிகர்களின் ஆரவாரம் உச்சத்தை தொடும். அந்த அளவிற்கு இந்திய ரசிகர்களின் உணர்வோடு விராட் கோலி கலந்துள்ளார். இந்த நிலையில் ஐபிஎல் தொடர் நெருங்கி வரும் சூழலில், விராட் கோலி தனது ஜெர்சி எண் 18 குறித்து சில முக்கியத் தகவல்களை பேசியுள்ளார்.

ஜெர்சி எண் ’18’

விராட் கோலியிடம் ஜெர்சி எண் 18ஐ தேர்ந்தெடுக்க என்ன காரணம் என்று கேள்வி எழுப்பிய போது, உண்மையை சொல்ல வேண்டுமென்றால் ஜெர்சி எண் 18ஐ நான் கேட்கவே இல்லை. நான் முதல்முறையாக எனக்கு யு-19 ஜெர்சி கொடுக்கப்பட்ட போது, அதில் 18 என்ற எண் தான் இருந்தது. அதேபோல் நான் முதல்முறையாக இந்திய அணிக்காக அறிமுகமானதும் ஆகஸ்ட் 18 தான்.

தந்தை மறைந்த நாள்

அதுமட்டுமல்லாமல் எனது தந்தை உயிரிழந்தது 18ம் தேதி தான். அதனால் அது சாதாரண எண் அல்ல. அந்த எண் என்னுடன் தொடர்ந்து கொண்டே இருக்கிறது என்று தெரிவித்துள்ளார். இது ரசிகர்களிடையே நெகிழ்ச்சியை ஏற்படுத்தியுள்ளது. விராட் கோலியின் தந்தை 2006ஆம் ஆண்டு டிசம்பர 18ஆம் தேதி உயிரிழந்தார்.

வாழ்வை மாற்றிய தருணம்

அப்போது 17 வயதில் டெல்லி அணிக்காக ரஞ்சி டிராபி கிரிக்கெட் போட்டியில் விளையாடிக் கொண்டிருந்த விராட் கோலிக்கு பேரிடியாக அமைந்தது. பின்னர் தந்தையின் இறுதிசடங்கில் பங்கேற்ற விராட் கோலி, அடுத்த நாளே களம் திரும்பினார். அந்தப் போட்டியில் விராட் கோலி டெல்லி அணிக்காக 90 ரன்களை விளாசினார். இதுகுறித்து விராட் கோலி கூறுகையில், தந்தை மறைந்த மறுநாள் நான் கிரிக்கெட் விளையாடியது தான் என் வாழ்க்கையை மாற்றியது என்று தெரிவித்துள்ளார்.

English summary

Virat Kohli, the star player of the Indian team, has given the reason for always keeping his jersey number 18 only, which has created a sensation among the fans.