தாய்லாந்தில் அதிக சம்பளத்தில் ஐடி வேலை.. அப்படி அழைத்தால் ஆர்வத்தில் போயிடாதீங்க.. போலீஸ் வார்னிங்

கோவை : கோவை உள்பட தமிழ்நாட்டை சேர்ந்த தகவல் தொழில்நுட்பம் படித்த பட்டதாரி வாலிபர்களை, சமூகவலைத்தளம் மூலமாக மூளைச்சலவை செய்து, கம்போடியா, தாய்லாந்து, மியான்மர் உள்ளிட்ட வெளிநாடுகளுக்கு அழைத்துச்சென்று மோசடிக்கு பயன்படுத்துவதால் உஷாராக இருக்குமாறு கோவை போலீசார் வேண்டுகோள் விடுத்துள்ளனர்

கோவை மாநகர போலீசார் வெளியிட்ட செய்திகுறிப்பில் கூறியுள்ளதாவது: "-கோவை உள்பட தமிழ்நாட்டை சேர்ந்த தகவல்தொழில்நுட்பம் படித்த பட்டதாரி வாலிபர்களை, சமூகவலைத்தளம் மூலமாக மூளைச்சலவை செய்து கம்போடியா, தாய்லாந்து, மியான்மர் உள்ளிட்ட நாடுகளில் தகவல் தொழில்நுட்ப நிறுவனங்களில் அதிக சம்பளத்துடன் வேலைக்கு ஏற்பாடு செய்வதாக கூறி சுற்றுலா விசாவில் அழைத்துச் செல்கிறார்கள்.

பின்னர் அந்த வாலிபர்களை ஏமாற்றி கால்சென்டர் மோசடி, கிரிப்டோ கரன்சி மோசடி உள்ளிட்ட ஆன்லைன் மோசடிகளில் கட்டாயப்படுத்தி ஈடுபடுத்தப்படுவதாகவும், அதுபோன்ற மோசடியில் ஈடுபட மறுப்பவர்களை துன்புறுத்தப்படுவதாகவும் புகார்கள் வருகிறது.

இதுபோன்ற சம்பவங்கள் நிகழாமல் தடுக்க அயலக தமிழர் நலன் மறுவாழ்வுத்துறை ஆணையத்தால் அறிவுறுத்தப்பட்ட விவரங்களை அறிந்துகொள்ள வேண்டும். மத்திய அரசால் பதிவு செய்யப் பட்ட முகவர்கள் மூலம் வேலைக்கான விசா, முறையான பணி ஒப்பந்தம் என்ன பணி போன்ற விவரங்களை சரியாகவும், முழுமையாகவும் தெரிந்துகொள்ள வேண்டும்.

உரிய விவரங்கள் தெரியாவிட்டால் தமிழ்நாடு அரசின் அயலக தமிழர் நலத்துறை, அல்லது குடிபெயர்வோர் பாதுகாப்பு அதிகாரி அல்லது சம்பந்தப்பட்ட நாட்டில் உள்ள இந்திய தூதரகத்தை தொடர்பு கொண்டு தாங்கள் பணி செய்யும் நிறுவனங்களின் உண்மை தன்மையை உறுதி செய்து கொள்ள வேண்டும்.

வெளிநாட்டு பணி குறித்து இந்திய வெளியுறவுத்துறை மற்றும் வேலைக்கு செல்லும் நாடுகளில் உள்ள இந்திய தூதரகங்களின் இணைய தளங்களில் வெளியிடப்படும் அறிவுரைகளை வெளி நாட்டு வேலைக்கு செல்ல விரும்புவோர்கள் முழுமையாக படித்து தெரிந்துகொள்ள வேண்டும். பாதுகாப்பான முறையில் வெளிநாடு செல்வது குறித்து அங்கீகரிக்கப்பட்ட முகவர்களின் பட்டியல் www.emigrategov.in என்ற இணையதளத்தில் உள்ளதை பார்த்து தெரிந்து கொள்ள வேண்டும். அல்லது [email protected] என்ற இணையதளத்திலும் பொதுமக்கள் தங்கள் சந்தேகங்களுக்கு விளக்கங்களை பெறலாம்" இவ்வாறு அதில் கூறப்பட்டுள்ளது.

English summary

coimbatore Police request to be alert to gangs who take graduates abroad and use them for fraud