கேரளா, கர்நாடகா, புதுவை உள்பட 24 மாநிலங்களுக்கு புதிய பொறுப்பாளர்கள்.. பாஜக தேசிய தலைமை அதிரடி

டெல்லி: கேரளா, கர்நாடகா, புதுவை உள்பட 24 மாநிலங்களுக்கான புதிய பொறுப்பாளர்களை நியமித்து பாஜக தலைமை அறிவித்துள்ளது. ஆனால், இந்த லிஸ்டில் தமிழகம் இடம் பெறவில்லை. கேரள மாநில மேலிட பொறுப்பாளராக பிரகாஷ் ஜவடேகர் நியமிக்கப்பட்டு இருக்கிறார்.

லோக்சபா தேர்தலில் பாஜக தனிப்பெரும்பான்மை பெறவில்லை. 350 இடங்களுக்கு மேல் வெற்றி பெற வேண்டும் என்ற டார்கெட்டுடன் தேர்தல் பிரசாரத்தை தொடங்கிய பாஜகவிற்கு 244 இடங்கள் மட்டுமே கிடைத்தது. இதனால், தற்போது ஐக்கிய ஜனதா தளம், சந்திரபாபு நாயுடு ஆகிய கட்சிகளின் ஆதரவுடன் கூட்டணி ஆட்சியை பாஜக நடத்தி வருகிறது. உத்தர பிரதேசம் உள்பட வடமாநிலங்களில் பாஜகவிற்கு சற்று பின்னடைவு ஏற்பட்டது.

கேரளாவில் முதல் முறையாக ஒரு தொகுதியை வென்றது. கர்நாடகாவிலும் பாஜக 17 இடங்களில் வெற்றி பெற்றது. ஆனாலும் கடந்த முறையை ஒப்பிடும் போது 8 எம்பிக்கள் குறைவாக கிடைத்துள்ளது. மத்தியில் ஆட்சியை பிடித்த போதும் பாஜகவிற்கு சில மாநிலங்களில் எதிர்பார்த்த வெற்றி கிடைக்கவில்லை. இதனால், தேர்தல் முடிந்த பிறகு பல்வேறு அதிரடி நடவடிக்கைகளை கட்சி தலைமை மேற்கொள்ளும் என எதிர்பார்க்கப்பட்டது.

Bharatiya Janata Party appoints State in-charge and Co-in charge for various States pic.twitter.com/p9gRmBmoJy

— ANI (@ANI) July 5, 2024

தேர்தல் முடிவுகள் வெளியாகி ஒரு மாதம் முடிந்துள்ள நிலையில், 24 மாநிலங்களுக்கு புதிய பொறுப்பாளர்கள், இணை பொறுப்பாளர்களை பாஜக தலைமை நியமனம் செய்துள்ளது. பீகார் மாநில பாஜக பொறுப்பாளராக வினோத் தாவ்டே நியமனம் செய்யப்பட்டுள்ளார். இணை பொறுப்பாளராக தீபக் பிரகாஷ் நியமனம் செய்யப்பட்டுள்ளார்.

இமாச்சல பிரதேச பொறுப்பாளராக ஸ்ரீகாந்த் சர்மாவும், ஜார்க்கண்ட் மாநில பொறுப்பாளராக லக்ஷ்மி காந்த் பஜ்பாலும் நியமனம் செய்யப்பட்டுள்ளனர். கர்நாடக மாநில பாஜக பொறுப்பாளராக ராதா மோகன் தாஸ் அகர்வாலும் இணை பொறுப்பாளராக சுதாகர் ரெட்டியும் நியமனம் செய்யப்பட்டுள்ளனர்.

கேரள மாநில பாஜக பொறுப்பாளராக பிரகாஷ் ஜவடேகரும் இணைபொருப்பாளராக அபரஜிதா சாரங்கியும் நியமிக்கப்பட்டுள்ளனர். மத்திய பிரதேசத்தில் மகேந்திர சிங் (பொறுப்பாளர்), இணை பொறுப்பாளராக சதீஷ் உபாத்யாய் நியமிக்கப்பட்டுள்ளனர். மணிப்பூர் பொறுப்பாளராக அஜீத் கோப்செத் நியமிக்கப்பட்டு இருக்கிறார்.

ஒடிசா பொறுப்பாளராக விஜயபால் சிங்க தோமரும், இணை பொறுப்பாளராக சுஷ்ரி லதா உசேண்டியும் நியமனம் செய்யப்பட்டு உள்ளனர். புதுவை பொறுப்பாளராக நிர்மல் குமார் சுர்னா நியமனம் செய்யப்பட்டு இருக்கிறார்.

தமிழகத்திற்கு பொறுப்பாளர் புதிதாக நியமனம் செய்யப்படவில்லை. தமிழகத்திற்கு தேர்தல் மேலிட பொறுப்பாளராக அரவிந்த் மேனனும், இணை பொறுப்பாளராக சுதாகர் ரெட்டியும் நியமித்து கடந்த ஜனவரி மாதம் பாஜக தேசிய தலைமை அறிவித்தது. தற்போது 21 மாநிலங்களுக்க்கு தேர்தல் பொறுப்பாளர்கள் லிஸ்ட் வந்துள்ள நிலையில், தமிழகத்திற்கு அறிவிக்கப்படவில்லை.

English summary

The BJP leadership has announced the appointment of new in-charges for 24 states including Kerala, Karnataka and Pudu. But, Tamil Nadu is not included in this list. Prakash Javadekar has been appointed as Kerala state in-charge.