7 மாதங்களில் இல்லாத உச்சம்.. ஒரே நாளில் 2,726 பேருக்கு கொரோனா தொற்று.. அச்சத்தில் தலைநகர் மக்கள்!

டெல்லி : தலைநகர் டெல்லியில் கொரோனா பாதிப்பு கடந்த 7 மாதங்களில் இல்லாத அளவுக்கு மீண்டும் வெகுவாக அதிகரிக்கத் தொடங்கியுள்ளது. இன்று (ஆகஸ்ட் 11) ஒரே நாளில் 2,726 பேருக்கு கொரோனா தொற்று பாதிப்பு ஏற்பட்டுள்ளதாகவும், ஆறு பேர் இறந்துள்ளதாகவும் சுகாதாரத் துறை பகிர்ந்துள்ள தரவுகள் தெரிவிக்கின்றன.

இந்தியாவில் பெரும்பாலான மக்களுக்கு தடுப்பூசி போடப்பட்டாலும் கடந்த சில நாட்களாக கொரோனா வைரஸ் மீண்டும் வேகமாகப் பரவத் தொடங்கியுள்ளது. குறிப்பாக தலைநகர் டெல்லியில் தினசரி பாதிப்பு எண்ணிக்கை தொடர்ந்து அதிகரித்து வருகிறது. இதேபோல் தமிழ்நாடு, மகாராஷ்டிரா, கர்நாடகா, தெலுங்கானா, கேரளா போன்ற மாநிலங்களிலும் கடந்த சில நாட்களாக கொரோனா பரவல் அதிகரித்து வருகிறது.

டெல்லியில் கடந்த 10 நாட்களில் மட்டும் 19,760 பேருக்கு கொரோனா பாதிப்பு உறுதி செய்யப்பட்டுள்ளது. அதேபோல், டெல்லியில் கட்டுப்படுத்தப்பட்ட பகுதிகள் எண்ணிக்கையும் 50 சதவீதம் அதிகரித்துள்ளது மக்களுக்கு அதிர்ச்சியை அளித்துள்ளது.

டெல்லியில் கடந்த ஆகஸ்ட் 1ஆம் தேதி கொரோனா தொற்று பரவல் விகிதம் 11.41 ஆக இருந்தது. 2 பேர் பலியாகி இருந்தனர். அடுத்த சில நாட்களில் தொற்று பரவல் இரு மடங்காக உயர்ந்துள்ளது. கொரோனா பரவல் விகிதமும் 17.83 சதவிகிதமாக உயர்ந்துள்ளது. கடந்த 10 நாட்களில் 40 பேர் உயிரிழந்துள்ளனர்.

கடந்த 6 மாதங்களில் இல்லாத அளவுக்கு ஒரே நாளில் ஆகஸ்ட் 10ஆம் தேதி கொரோனாவால் 8 பேர் உயிரிழந்தனர். ஆகஸ்ட் 11ஆம் தேதி ஒரே நாளில் 6 பேர் உயிரிழந்துள்ளனர். மேலும், 11ஆம் தேதி மட்டும் புதிதாக 2,726 பேருக்கு கொரோனா பாதிப்பு உறுதிசெய்யப்பட்டுள்ளது. இது கடந்த 7 மாதங்களில் இல்லாத அளவுக்கான உயர்வாகும். இன்றைய நிலவரப்படி, கொரோனாவால் பாதிக்கப்பட்டுள்ளவர்களின் எண்ணிக்கை டெல்லியில் 8,840 ஆக உள்ளது.

கடந்த பிப்ரவரி மாதம் 6ஆம் தேதி நிலவரப்படி டெல்லியில் கொரோனா தொற்றால் பாதிக்கப்பட்டிருந்தவர்களின் எண்ணிக்கை 8,869 ஆக இருந்தது. அதன்பிறகு படிப்படியாக தொற்று எண்ணிக்கை குறைந்து வந்த நிலையில், இன்று மீண்டும் அந்த நிலையை எட்டியுள்ளது. இது டெல்லி மக்கள் மத்தியில் அதிர்ச்சியையும், அச்சத்தையும் ஏற்படுத்தியுள்ளது.

English summary

Big spike in Covid-19 cases, Delhi on Thursday reported 2,726 fresh cases, the highest in nearly seven months, according to health department data.