இல்லத்தரசிகளுக்கு தித்திப்பான நியூஸ்.. சிலிண்டர் விலை அதிரடியாக குறைந்தது.. மத்திய அரசு மேஜர் முடிவு

டெல்லி: வீட்டு உபயோக கேஸ் சிலிண்டரின் விலையில் ரூ. 200 குறைக்க மத்திய அமைச்சரவைக் கூட்டத்தில் ஒப்புதல் அளிக்கப்பட்டுள்ளது.

சர்வதேச சந்தையில் நிலவும் கச்சா எண்ணெய் விலை மற்றும் டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் பெட்ரோல், டீசல், சமையல் எரிவாயு சிலிண்டர் விலையை எண்ணெய் நிறுவனங்களே இந்தியாவில் நிர்ணயம் செய்து கொள்கின்றன. அந்த வகையில் பெட்ரோல், டீசல் விலை தினசரி அடிப்படையிலும் சமையல் எரிவாயு சிலிண்டர் விலை மாதத்திற்கு ஒரு முறை விலை நிர்ணயம் செய்து அறிவிப்பு வெளியாகிறது.

ஒவ்வொரு மாதமும் மாதத்தின் முதல் நாள் சமையல் எரிவாயு சிலிண்டர் விலையை சந்தை நிலவரத்திற்கு ஏற்ப நிர்ணயம் செய்து எண்ணெய் நிறுவனங்கள் வெளியிட்டு வருகின்றன. அந்த வகையில், கடந்த 1 ஆம் தேதி மத்திய அரசு வெளியிட்ட அறிவிப்பில், வணிக பயன்பாட்டுக்கான 19 கிலோ எடை கொண்ட சமையல் கியாஸ் சிலிண்டர் விலை ரூ.92.50 குறைக்கப்பட்டு ரூ.1,852.50-க்கு விற்பனை செய்யப்படும் என அறிவிக்கப்பட்டது.

இதனால் வணிகர்கள் மகிழ்ச்சி அடைந்தனர். அதேநேரம், வீட்டு உபயோக சிலிண்டர் விலையில் எந்த மாற்றமும் இல்லை. வீட்டு உபயோக சமையல் கியாஸ் சிலிண்டர் ஒன்று சென்னையில் ரூ.1,118.50-க்கு விற்பனை ஆனது. இந்த நிலையில், வீட்டு உபயோகத்திற்கு பயன்படுத்தப்படும் சமையல் எரிவாயு சிலிண்டர் அதாவது 14 கிலோ எடை கொண்ட சிலிண்டரின் விலையை ரூ.200 குறைக்கப்படுவதாக மத்திய அரசு அறிவித்துள்ளது. ரக்‌ஷா பந்தன் பண்டிகையை முன்னிட்டு நாட்டு மக்களுக்க்கு பரிசாக விலை குறைக்கப்பட்டுள்ளதாக மத்திய அமைச்சர் அனுராக் தாகூர் தெரிவித்துள்ளார்.

பணவீக்கம் காரணமாக அத்தியாவசிய பொருட்களின் விலை அதிகரித்துள்ளதால், சாமானிய மக்கள் கடுமையாக பாதிக்கப்பட்டுள்ளனர். இதனால், மக்களின் சுமையை குறைக்கும் வகையில் சமையல் எரிவாயு சிலிண்டர் விலை குறைக்கப்பட்டுள்ளதாக கூறப்படுகிறது. எனினும், இந்த ஆண்டு இறுதியில் மத்திய பிரதேசம், ராஜஸ்தான், தெலுங்கானா உள்பட 5 மாநில சட்டமன்ற தேர்தலும் அடுத்த ஆண்டு ஏப்ரல் மே மாதங்களில் நாடாளுமன்ற தேர்தலும் நடைபெற உள்ளது.

எனவே தேர்தலை மனதில் வைத்தே வாக்காளர்களை கவரும் விதமாக விலை குறைப்பு நடவடிக்கையை மத்திய அரசு எடுத்து இருப்பதாகவும் தெரிகிறது. வீட்டு உபயோக சமையல் எரிவாயு சிலிண்டர் விலை குறைக்கப்படுவதன் மூலம் மக்களின் மாதாந்திர செலவு ஓரளவு குறையும். ஜூலை மாதம் பணவீக்கம் 7.44 ஆக இருந்தது. கடந்த 15 மாதங்களில் நிலவிய அதிகபட்ச பணவீக்கம் இதுவேயாகும். உணவுப்பொருட்கள் விலை உயர்வால் சில்லறை விலை பணவீக்கம் கடுமையாக உயரக்காரணம் என்று பொருளாதார நிபுணர்கள் கூறும் தகவலாக உள்ளது.

English summary

A domestic gas cylinder is priced at Rs. 200 has been approved in the central cabinet meeting.