2014, 2019 மாதிரி இல்லையே "மோடி 3.0.." பாஜகவினரே எதிர்பார்க்கல.. அமைச்சரவையில் இதை கவனிச்சீங்களா?

டெல்லி: பிரதமர் மோடியின் அமைச்சரவையில் மொத்தம் 72 பேர் இடம் பெற்றுள்ளனர். கடந்த இரண்டு முறையிலும் அதாவது 2014, 2019-ல் மோடி அமைச்சரவையில் எத்தனை பேர் இடம் பெற்று இருந்தனர் என்ற விவரங்களை பார்க்கலாம்.

நடந்து முடிந்த 18-வது லோக்சபா தேர்தலில் பாஜக தலைமையிலான தேசிய ஜனநாயக கூட்டணி வெற்றி பெற்றது. 294 இடங்களில் தேசிய ஜனநாயக கூட்டணி வென்றது. பாஜகவிற்கு தனிப்பெரும்பான்மை கிடைக்காததால் கூட்டணி ஆட்சி அமைத்துள்ளது. பிரதமராக மோடி 3-வது முறையாக இன்று பதவியேற்றுக்கொண்டார்.

மோடியுடன் 30 கேபினட் அமைச்சர்கள் உள்பட 72 அமைச்சர்கள் பதவியேற்றுக்கொண்டனர். கூட்டணி ஆட்சி என்பதால் தெலுங்கு தேசம், ஐக்கிய ஜனதா தளம் கட்சியை சேர்ந்த தலா இரண்டு எம்பிக்கள் , லோக் ஜனசக்தி கட்சி, ஹிந்துஸ்தானி அவா மோர்ச்சா கட்சியை சேர்ந்த ஒரு எம்பிக்கும் கேபினட் பொறுப்பு வழங்கப்பட்டுள்ளது. கடந்த இரண்டு முறையை போல் அல்லாமல் இந்த முறை மோடியின் கேபினட்டில் அதிகம் பேர் இடம் பெற்றுள்ளனர்.

கடந்த 2014 ஆம் ஆண்டு பிரதமர் மோடி அமைச்சரவையில் 23 கேபினட் அமைச்சர்கள் தனிப்பொறுபுடன் கூடிய இணை அமைச்சர்கள் 10 மற்றும் இணை அமைச்சர்கள் 12 பேர் என மொத்தம் 45 பேர் இடம் பெற்று இருந்தனர். கடந்த 2019 ஆம் ஆண்டு மோடி தனது அமைச்சரவையில் 24 கேபினட் அமைச்சர்களும் தனிபொறுப்புடன் கூடிய இணை அமைச்சர்கள் 9 பேர் மற்றும் 24 இணை அமைச்சர்கள் என மொத்தம் 57 பேர் இடம் பெற்றனர்.

கடந்த இரண்டு முறையும் மோடியின் கேபினட்டில் 60 க்கும் கீழ் தான் இருந்தது. ஆனால் இந்த முறை மோடியின் அமைச்சரவையில் மோடி உள்பட 72 பேர் அமைச்சர்களாக பதவி ஏற்று இருக்கிறார்கள். கடந்த இரு முறையும் மோடி தனிப்பெரும்பான்மையுடன் ஆட்சி நடத்தினர். ஆனால் இப்போது கூட்டணி ஆட்சி அமைத்து இருப்பதால் கூட்டணி கட்சிகளுக்கும் அமைச்சரவையில் இடம் கொடுக்க வேண்டிய நிர்பந்தம் ஏற்பட்டது.

இதன் காரணமாகவே மோடி தனது அமைச்சரவையில் இந்த முறை 72 பேர் இடமளித்துள்ளதாக சொல்கிறார்கள். பாஜகவினரே எதிர்பார்க்காத அளவுக்கு கடந்த இருமுறைக்கும் மாறாக 72 பேருடன் கூடிய அமைச்சரவையை அமைத்து இருக்கிறார். விதிகளின் படி 81 பேருக்கு மிகாமல் அமைச்சரவை அமைக்கப்பட வேண்டியது அவசியம். மோடியின் 3.0 வில் இந்த எண்ணிக்கையை தொட வெறும் 9 எண்ணிக்கையே குறைவாக உள்ளது.

முன்னதாக பிரதமர் பதவியேற்பு விழாவில் 3வது முறையாக மோடி பிரதமராக பதவியேற்றுக்கொண்டார். மேலும் 71 அமைச்சர்களும் பதவியேற்றனர். அதன்படி, பாஜக தேசிய தலைவரான ஜேபி நட்டாவுக்கு அமைச்சர் பதவி கொடுக்கப்பட்டுள்ளது. இதேபோல் நிர்மலா சீதாராமன், பியூஷ் கோயல், நிதின் கட்காரி, ராஜ்நாத் சிங், அமித்ஷா உள்ளிட்டோர் அமைச்சர்களாக பதவியேற்றனர்.

இதேபோல் முன்னாள் முதல்வர்கள் சிவ்ராஜ் சிங் சவுகான், குமாரசாமி உள்ளிட்டோரும் அமைச்சர்களாக பதவியேற்றனர். இதில், ஆந்திராவின் தெலுங்கு தேசம் கட்சியை சேர்ந்த ராம் மோகன் நாயுடுவும் அமைச்சராக பதவியேற்றார்.

English summary

A total of 72 people have been included in Prime Minister Modi's cabinet. You can see the details of how many people were included in the Modi cabinet in the last two terms i.e. 2014 and 2019.