நாளை நாடாளுமன்ற பட்ஜெட் கூட்டத்தொடர்.. இன்று பிரதமர் மோடி தலைமையில் அனைத்து கட்சி கூட்டம்!
டெல்லி: நாளை நாடாளுமன்ற பட்ஜெட் கூட்டத்தொடர் தொடங்க இருக்கிறது. இந்நிலையில், இன்று அனைத்துக் கட்சி கூட்டம் பிரதமர் நரேந்திர மோடி தலைமையில் நடைபெறுகிறது.
2024-2025ம் ஆண்டுக்கான பட்ஜெட்டை பிப்.1ம் தேதி நிதியைமச்சர் நிர்மலா சீதாராமன் தாக்கல் செய்கிறார். முன்னதாக நாளை அதாவது ஜன.31ம் தேதி பட்ஜெட் கூட்டத்தொடர் தொடங்குகிறது. கூட்டத்தொடரின் முதல் நாளான நாளை, இரு அவைகளின் கூட்டுக்குழு கூட்டம் நடைபெறுகிறது. இதில் குடியரசுத் தலைவர் திரௌபதி முர்மு நாடாளுமன்றத்தில் உரையாற்றுகிறார். இந்த உரையின் மீது விவாதிக்க 3 நாட்கள் வழங்கப்பட்டிருக்கின்றன.
இந்த விவாதத்தின் மீது பிரதமர் மோடி பிப்.6ம் தேதி பதிலளித்து உரையாற்றுவார். இதனையடுத்து பிப்.13ம் தேதி கூட்ட தொடரின் முதல் கட்ட அமர்வு முடிவடைகிறது.
இந்நிலையில், கூட்டத்தொடரை அமைதியாக நடத்துவது குறித்து அனைத்து கட்சி கூட்டத்திற்கு இன்று நாடாளுமன்ற விவகாரத்துறை அமைச்சர் கிரண் ரிஜுஜு அனைத்து கட்சிகளுக்கும் அழைப்பு விடுத்திருக்கிறார். இந்த கூட்டம் இன்று பிரதமர் மோடி தலைமையில் நடைபெறுகிறது.
நிர்மலா சீதாராமன் தாக்கல் செய்யும் 8வது பட்ஜெட்டாக இது இருக்கும். இதில், வருமான வரி உச்சவரம்பு குறித்து பெரிதும் எதிர்பார்க்கப்பட்டிருக்கிறது. அதேநேரம், தொழிலாளர்களின் வேலை நேரம் குறித்த மாற்றங்களும் கூட இடம் பெறுவதற்கு வாய்ப்புகள் இருக்கிறது. ஏனெனில், சமீப காலமான இன்போசிஸ் நாராயணன் போன்றோர் 12 மணி நேரம் தொழிலாளர்கள் வேலை செய்ய வேண்டும் என்று பேசி வந்தனர்.
இதற்கு கடுமையான எதிர்ப்பு எழுந்த போதும், மத்திய அரசு முன்வந்து, "நாங்கள் இப்படி எந்த உத்தரவையும் போட மாட்டோம்" என்று கூறவில்லை. எனவே வேலை நேரம் குறித்து மாற்றம் வரும் என்றும் சொல்லப்படுகிறது.
மறுபுறம், வக்ஃபு சட்ட மசோதாவில் திருத்தங்கள் குறித்த பஞ்சாயத்தும் எதிர்க்கட்சிகள் தரப்பிலிருந்து வெடிக்க வாய்ப்பு இருக்கிறது. இந்த மசோதா நாடாளுமன்றத்தில் தாக்கல் செய்யப்பட்டபோது, எதிர்க்கட்சிகள் கடுமையாக சண்டை செய்தன. எனவே, மசோதா நாடாளுமன்ற கூட்டுக்குழு பரிசீலனைக்கு அனுப்பி வைக்கப்பட்டது. இந்த குழுவில் இடம் பெற்றிருந்த தாங்கள் கூறிய 44 திருத்தங்களையும், ஆளும் கட்சி உறுப்பினர்கள் ஏற்க மறுத்து மசோதாவை அவர்கள் விருப்பத்திற்கு ஏற்ப திருத்திக்கொண்டதாக எதிர்க்கட்சிகள் குற்றம்சாட்டியுள்ளன.
எனவே, இந்த பட்ஜெட் கூட்டத்தொடரில் இந்த விஷயமும் எதிரொலிக்கும் என்று சொல்லப்படுகிறது.
Click it and Unblock the Notifications
Sign in with Google