ஒரு பக்கம் ED! மறுபக்கம் வங்கி கணக்கு, சொத்து கணக்கை கேட்கும் என்சிபி! அமீருக்கு மீண்டும் சம்மன்?
டெல்லி: இயக்குநர் அமீரை மீண்டும் விசாரணைக்கு வருமாறு டெல்லி போதை பொருள் தடுப்பு பிரிவு அதிகாரிகள் சம்மன் விடுத்ததாக கூறப்படுகிறது. இதற்கு கால அவகாசம் கேட்டு அமீரும், டெல்லி என்சிபி அதிகாரிகளுக்கு கடிதம் எழுதியுள்ளார்.
டெல்லியில் உணவு பொருள் டெலிவரி என்ற பெயரில் ரூ 2000 கோடி மதிப்பிலான போதை பொருள்களை டெல்லி போதை பொருள் தடுப்பு பிரிவு போலீஸார் பறிமுதல் செய்து அதை கொண்டு வந்த சிலரை கைது செய்தனர். அப்போது அவர்களிடம் விசாரணை நடத்தியதில் அந்த பொருள் ஜாபர் சாதிக்கிற்கு சொந்தமானது என தெரியவந்தது.
உணவு டெலிவரி என்ற பெயரில் நியூசிலாந்து உள்ளிட்ட வெளிநாடுகளுக்கு போதை பொருளை அவர் கடத்துவதும் விசாரணையில் தெரியவந்தது. இதையடுத்து ஜாபர் சாதிக்கை என்சிபி அதிகாரிகள் தேடி வந்த நிலையில் அவர் ராஜஸ்தான் மாநிலத்தில் பதுங்கியிருந்த போது பிடிபட்டார்.
ஜாபரிடம் நடத்தப்பட்ட விசாரணையில் இயக்குநர் அமீர், பாசித் புகாரி உள்ளிட்டோரின் பெயர்களை வாக்குமூலமாக தெரிவித்திருந்தாராம். இதையடுத்து போதை பொருள் தடுப்பு பிரிவினர், இயக்குநர் அமீர் உள்ளிட்ட 3 பேருக்கு சம்மன் அனுப்பினர். அதில் போதை பொருள்கள் கடத்தல் வழக்கு தொடர்பாக விசாரணை நடத்த வேண்டியிருப்பதால் ஏப்ரல் 2ஆம் தேதி நேரில் ஆஜராகுமாறு அழைத்தனர்.
அதன்பேரில் அமீர் உள்ளிட்டோர் தங்கள் வழக்கறிஞர்களுடன் டெல்லி அலுவலகத்தில் ஆஜராகினர். அப்போது அமீரிடம், " 2020-2023 ஆம் ஆண்டு கால கட்டத்தில் சொத்து கணக்கு ஆவணங்களையும் அந்த 3 ஆண்டு கால வங்கிக் கணக்கு தகவல்களையும் எடுத்துக் கொண்டு 5ஆம் தேதி ஆஜராகுமாறு அறிவுறுத்தியிருந்தனர்.
இந்த நிலையில் இன்றைய தினம் அமலாக்கத் துறையினர் ஜாபர் சாதிக் வீடு, அலுவலகம், இயக்குநர் அமீரின் வீடு அலுவலகம், பாசித் புகாரியின் வீடு, அலுவலகம் என சென்னையில் 30-க்கும் மேற்பட்ட இடங்களில் ரெய்டு நடத்தப்பட்டு வருகிறது. இந்த நிலையில் அமீர் வீட்டிலிருந்து சில ஆவணங்கள் கைப்பற்றப்பட்டதாகவும் தகவல்கள் வெளியாகியுள்ளன.
இதனிடையே டெல்லி போதை பொருள் தடுப்பு பிரிவு அதிகாரிகள் நேரில் ஆஜராகுமாறு அமீருக்கு மீண்டும் சம்மன் அனுப்பியதாக தெரிகிறது. இதற்கு அமீர் கால அவகாசம் கேட்டு அதிகாரிகளுக்கு கடிதம் எழுதியுள்ளதாகவும் கூறப்படுகிறது. இதற்கு என்சிபி என்ன முடிவு எடுக்கும் என தெரியவில்லை.
Click it and Unblock the Notifications
Sign in with Google