ஆசிரியர் திட்டியதால் பள்ளியின் 4வது மாடியில் இருந்து குதித்து மாணவர் தற்கொலை - ஆசிரியர் கைது

மும்பை: மும்பையில் ஆசிரியர் திட்டியதால் மனமுடைந்த ஆறாம் வகுப்பு மாணவர் பள்ளியிலேயே தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது. இது தொடர்பாக மாணவரைத் தற்கொலைக்கு தூண்டியதாக ஆசிரியர் ஒருவர் கைது செய்யப்பட்டுள்ளார்.

நவி மும்பையில் இயங்கி வரும் பள்ளி ஒன்றில் ஆறாம் வகுப்பு மாணவர் கௌரவ் கன்க் (12). வழக்கம் போல நேற்று பள்ளிக்குச் சென்ற கௌரவை, வகுப்பறையில் குறும்பு செய்ததற்காக அவனது வகுப்பு ஆசிரியர் சோமயா மனோகரன் கண்டித்துள்ளார்.

இதனால் மனமுடைந்த அம்மாணவர் பள்ளியின் நான்காவது மாடிக்குச் சென்று, வகுப்பறை ஒன்றின் ஜன்னல் வழியே குதித்து தற்கொலை செய்து கொண்டான்.

தகவலறிந்து விரைந்து வந்த மாணவரின் பெற்றோர் கௌசிக்கின் உடலைக் கண்டு கதறி அழுதனர். பின்னர் அவர்கள், ‘தங்களது மகனைத் தற்கொலைக்குத் தூண்டியதாக' பள்ளி நிர்வாகத்தின் மீது போலீசில் புகார் அளித்தனர்.

இதற்கிடையேபள்ளி வளாகத்திலேயே மாணவர் ஒருவர் தற்கொலை செய்து கொண்ட தகவல் அறிந்த மற்ற மாணவர்களின் பெற்றோர், பள்ளி முன்பு குவிந்தனர். பள்ளி வளாகம் மாணவர்களுக்கு பாதுகாப்பற்றதாக இருப்பதாக அவர்கள் போராட்டத்தில் ஈடுபட்டனர்.

மாணவன் கௌசிக்கின் மரணத்திற்கு பள்ளி நிர்வாகத்தின் அலட்சியமே காரணம் எனக் குற்றம் சாட்டிய பெற்றோர், ஏற்கனவே தங்களது கோரிக்கையை ஏற்று வகுப்பறை ஜன்னல்களில் கம்பிகள் அமைத்திருந்தால் மாணவனின் மரணத்தைத் தடுத்திருக்கலாம் என்றனர்.

ஆனால், இது தொடர்பாக சம்பந்தப்பட்ட பள்ளியின் முதல்வர் செய்தியாளர்கள் மத்தியில் கூறுகையில், ‘இது எப்படி பள்ளியின் அலட்சியத்தால் நேர்ந்தது எனக் கூறமுடியும்? ஆனபோதும், இது தொடர்பாக விசாரணை மேற்கொண்டு வருகிறோம். வரும் காலத்தில் இது போன்ற சம்பவங்கள் ஏற்படா வண்ணம் நடவடிக்கை எடுக்கப் படும்' என்றார்.

கௌசிக்கின் பெற்றோர் அளித்த புகாரின் அடிப்படையில் விசாரணை மேற்கொண்ட போலீசார், மாணவரை தற்கொலைக்குத் தூண்டியதாக ஆசிரியர் சோமயா மனோகரனைக் கைது செய்துள்ளனர்.

English summary

A 12-year-old boy jumped to his death from his school building near Mumbai on Tuesday, allegedly after he was scolded by a teacher. The teacher, Somaya Manoharan, was arrested today and booked for abetment of suicide.