ஹெலிகாப்டர் ஒப்பந்தம் ரத்து.. இந்தியா சொல்லும் காரணம் சரியில்லை- பின்மெக்கானிக்கா

Published: Friday, January 3, 2014, 16:23 [IST]

Subscribe to Oneindia Tamil

டெல்லி: இத்தாலி நாட்டைச் சேர்ந்த பாதுகாப்பு தளவாட தயாரிப்பு நிறுவனமான பின் மெக்கானிக்கா, தனது அகஸ்டா வெஸ்ட்லேன்ட் ஹெலிகாப்டர் ஒப்பந்தத்தை இந்தியா ரத்து செய்திருப்பது குறித்து கருத்து தெரிவித்துள்ளது.

இந்திய அரசு இந்த ஒப்பந்தத்தை ரத்து செய்துள்ளதற்குத் தெரிவித்துள்ள காரணங்கள் சரிவர இல்லை என்று அது கூறியுள்ளது. பின்மெ்க்கானிக்காவுக்குச் சொந்தமான இங்கிலாந்து - இத்தாலி நாட்டு கூட்டு நிறுவனமான அகஸ்டாவெஸ்ட்லேண்ட் நிறுவனத்திடமிருந்து 12 பாதுகாப்பு ஹெலிகாப்டர்களை வாங்க இந்தியா ஒப்பந்தம் செய்திருந்தது.

இதில் பெரும் முறைகேடு நடந்திருப்பாகவும், லஞ்சம் கைமாறியிருப்பதாகவும் குற்றச்சாட்டுக்கள் எழுந்தன. இது இந்தியாவில் பெரும் சலசலப்பை ஏற்படுத்தியது. இதையடுத்து இந்த ஒப்பந்தத்தை ரத்து செய்ய ஐக்கிய முற்போக்குக் கூட்டணி அரசு முடிவு செய்து ஒப்பந்தம் ரத்து செய்யப்படுவதாக அறிவித்தது.

இதுகுறித்து பின்மெக்கானிக்கா கருத்து தெரிவித்துள்ளது. இதுகுறித்து அது கூறுகையில், இந்தியா தெரிவித்துள்ள காரணங்கள் போதுமானதாக இல்லை. அடிப்படை இல்லை. எங்களது நிறுவனத்திற்கு எதிராக நடவடிக்கை எடுக்க எந்தவிதமான முகாந்திரத்தையும் இந்தியா காட்டவில்லை.

எங்களது ஒப்பந்தம் ரத்து செய்யப்படுவது தொடர்பாக மத்திய பாதுகாப்புத்துறை அமைச்சகம் எங்களுக்கு நோட்டீஸ் அனுப்பியுள்ளது. அதில் கூறப்பட்டுள்ள எந்தக் காரணத்திற்கும் அடிப்படை இல்லை.

இந்திய அரசுடன் தொடர்ந்து செயல்படவே நாங்கள் விரும்புகிறோம். இதுதொடர்பாக இந்திய அரசுடன் பேசுவோம். பிரச்சினையை சரி செய்ய முயற்சிப்போம். இந்திய அரசு கோருவதற்கேற்ப செயல்படத் தயாராக உள்ளோம்.

ஏற்கனவே் இந்தியாவுக்கு வழங்கி, அந்த நாட்டு விமானப்படையில் இணைக்கப்பட்டுள்ள 3 ஹெலிகாப்டர்களுக்குத் தேவையான சேவைக்குப் பிந்தைய ஒத்துழைப்பை நாங்கள் நிச்சயம் வழங்குவோம் என்று தெரிவித்துள்ளது.

தற்போது இந்தியா தனது ஒப்பந்தத்தை ரத்து செய்திருப்பதால் இதை அடிப்படையாக வைத்து இங்கலாந்தின் இயோவில் பகுதியில் அமைக்கப்பட்டுள்ள புதிய உற்பத்திப் பிரிவில் ஆள் குறைப்பு நடவடிக்கையில் ஈடுபடப் போவதாகவும் பின்மெக்கானிக்கா தெரிவித்துள்ளது.

மேலும் இயோவில் பிரிவில் பணியாற்றி வரும் தொழிலாளர்கள் இந்திய அரசின் ஒப்பந்தம் ரத்து அறிவிப்பால் அப்செட்டாகியுள்ளதாகவும் பின் மெக்கானிக்கா தெரிவித்துள்ளது.

Published On January 3, 2014