ஐ.எஸ்.ஐ.எஸ். இயக்கத்தில் இணைய விரும்பிய அந்த 20 பேர்..... நிக்கி ஜோசப் சொன்ன 'திடுக்' தகவல்

ஹைதராபாத்: உலகின் மிகக் கொடூர தீவிரவாத இயக்கமான ஐ.எஸ்.ஐ.எஸ். இயக்கத்தில் இணைவதற்கு 20 பேர் தம்மை தொடர்பு கொண்டதாக அரபு எமிரேட்ஸிலிருந்து இந்தியாவுக்கு நாடு கடத்தப்பட்டு ஹைதராபாத் போலீசாரால் கைது செய்யப்பட்டுள்ள நிக்கி ஜோசப் என்ற ஆப்சா ஜபீன் திடுக்கிடும் தகவலை வெளியிட்டுள்ளார்.

ஆந்திராவைச் சேர்ந்த சல்மான் மொகிதீன் என்ற இளைஞர் ஐ.எஸ்.ஐ.எஸ். இயக்கத்தில் இணைவதற்காக செல்ல முயற்சித்த போது கைது செய்யப்பட்டார். அவரிடம் நடத்தப்பட்ட விசாரணையில் அரபு எமிரேட்ஸில் உள்ள நிக்கொ ஜோசப்பை தாம் காதலிப்பதாகவும் அதனால் முதலில் துபாய் சென்று அவரை திருமணம் செய்து கொண்டு பின்னர் சிரியாவில் ஐ.எஸ்.ஐ.எஸ். இயக்கத்தில் இணைய திட்டமிட்டதாக கூறியிருந்தார்.

இதனைத் தொடர்ந்து நிக்கி ஜோசப்பை அரபு எமிரேட்ஸில் இருந்து இந்தியாவுக்கு நாடு கடத்த நடவடிக்கைகள் மேற்கொள்ளப்பட்டன. இதனடிப்படையில் நாடு கடத்தப்பட்ட நிக்கி ஜோசப்பை ஹைதராபாத் போலீசார் கைது செய்து விசாரணை நடத்தி வருகின்றனர்.

நிக்கி ஜோசப்பின் உண்மையான பெயர் ஆஃப்ஷா ஜபீன் என்பதும் அவர் இஸ்லாம்- கிறிஸ்துவ மத மோதல்கள் தொடர்பான சமூக வலைதளங்களை நடத்தி வந்ததும் தெரியவந்தது. மேலும் இந்த விவாதங்களில் பங்கேற்ற 20க்கும் மேற்பட்டோர் தாங்கள் ஐ.எஸ்.ஐ.எஸ். இயக்கத்தில் சேர விரும்புவதாகவும் எப்படி அந்த இயக்கத்தில் இணைவது எனவும் அவரிடம் கேட்டிருக்கின்றனர். அதற்கு சில இணையதளங்களை நிக்கி ஜோசப் சுட்டிக்காட்டியிருக்கிறார்.

அத்துடன் ஐ.எஸ்.ஐ.எஸ். இயக்கத்தின் எந்த ஒரு நிர்வாகியுடனும் தமக்கு நேரடித் தொடர்பு எதுவுமே இல்லை என்றும் நிக்கி கூறிவருகிறார். அவரிடம் ஐ.எஸ்.ஐ.எஸ். இயக்கத்தில் சேர விருப்பம் தெரிவித்த 20 பேரின் விவரங்களை ஹைதராபாத் போலீசார் பெற்றுள்ளனர். ஆனால் அவர்கள் அனைவரும் இந்தியர் இல்லை எனவும் தெரியவந்துள்ளது.

இதனால் அந்த 20 வெளிநாட்டவரையும் விசாரணைக்கு கொண்டுவருவது தொடர்பாகவும் ஹைதராபாத் போலீசார் நடவடிக்கை மேற்கொள்ள உள்ளதாக கூறப்படுகிறது.

English summary

The Hyderabad police will look into a list of 20 names provided by Afsha Jabeen, the lady who was allegedly recruiting for the ISIS. The probe has revealed that she was acting suo motu and was not in touch with any of ISIS leaders.