நாடாளுமன்ற வளாகத்தில் வாயில் கருப்பு துணி கட்டி ராகுல் தலைமையில் காங். எம்.பிக்கள் போராட்டம்!
டெல்லி: மத்திய அமைச்சர் சாத்வி நிரஞ்சன் ஜோதியின் சர்ச்சை பேச்சுக்கு எதிர்ப்பு தெரிவித்து காங்கிரஸ் துணைத் தலைவர் ராகுல் உள்ளிட்ட அக்கட்சி எம்.பிக்கள் வாயில் கருப்புத் துணி கட்டியபடி நாடாளுமன்ற வளாகத்தில் இன்று தர்ணா போராட்டம் நடத்தினர். இப்போராட்டத்தில் திரிணாமுல் காங்கிரஸ் எம்.பிக்களும் பங்கேற்றனர்.
டெல்லியில் நிகழ்ச்சி ஒன்றில் பேசிய மத்திய அமைச்சர் சாத்வி நிரஞ்சன் ஜோதி, கிறிஸ்துவர்களும் முஸ்லிம்களும் ராமரின் பிள்ளைகள்; ராமர் பிள்ளைகள் டெல்லியில் ஆட்சியை செய்வார்கள்.. மற்றவர்களெல்லாம் முறையற்று பிறந்தவர்கள் என்று அதிர்ச்சி அளிக்கும் வகையில் பேசினார்.
இது நாடு முழுவதும் பெரும் சர்ச்சையை ஏற்படுத்தியது. இந்த விவகாரம் நாடாளுமன்றத்திலும் எதிரொலித்தது. இதனால் நாடாளுமன்ற இரு சபைகளின் நடவடிக்கைகள் முடங்கின.
இதனைத் தொடர்ந்து நாடாளுமன்ற இரு சபைகளிலும் தாம் பேசிய பேச்சுக்காக மத்திய அமைச்சர் சாத்வி நிரஞ்சன் ஜோதி வருத்தம் தெரிவித்தார். ஆனாலும் அவரை அமைச்சர் பதவியில் இருந்து டிஸ்மிஸ் செய்தாக வேண்டும் என்று எதிர்க்கட்சிகள் அனைத்தும் வலியுறுத்தி வருகின்றன.
இந்நிலையில் நாடாளுமன்றத்தில் இன்று பேசிய பிரதமர் நரேந்திர மோடி, அமைச்சர் சாத்வி நாடாளுமன்றத்துக்கு முதல் முறையாக தேர்வு செய்யப்பட்டவர். அமைச்சர்கள் பேசும் போது சுய கட்டுப்பாடு மிகவும் அவசியம். தமது பேச்சுக்கு வருத்தம் தெரிவித்துவிட்டார். இதனால் எதிர்க்கட்சிகள் சபையை சுமூகமாக நடத்த ஒத்துழைக்க வேண்டும் என்று வேண்டுகோள் விடுத்தார்.
ஆனால் எதிர்க்கட்சிகள் பிரதமரின் வேண்டுகோளை நிராகரித்து வெளிநடப்பு செய்தனர். பின்னர் காங்கிரஸ் கட்சி எம்.பிக்கள் ராகுல் காந்தி தலைமையில் நாடாளுமன்ற வளாகத்தில் உள்ள காந்தி சிலை அருகே தர்ணா போராட்டத்தில் ஈடுபட்டனர். அப்போது ராகுல் காந்தி உட்பட காங்கிரஸ் எம்.பிக்கள் அனைவரும் வாயில் கருப்புத் துணியை கட்டியிருந்தனர்.
மேலும் மதச்சார்பின்மையைப் பாதுகாக்க வேண்டும்; மத்திய அமைச்சர் பதவியில் இருந்து சாத்வியை டிஸ்மிஸ் செய்ய வேண்டும் என்ற கோரிக்கைகளுடன் கூடிய பதாகையை ஏந்தியவாறு காங்கிரஸ் எம்.பிக்கள் தர்ணா போராட்டம் நடத்தினர். ராகுல் தலைமையிலான இந்தப் போராட்டத்தில் திரிணாமுல் காங்கிரஸ் எம்.பிக்களும் கலந்து கொண்டது குறிப்பிடத்தக்கது.
Click it and Unblock the Notifications
Sign in with Google