முடிவுக்கு வராத பஞ்சாயத்து.. அமெரிக்காவுடன் நேரடி பேச்சுவார்த்தைக்கு நோ சொன்ன ஈரான்!

Published: Saturday, April 25, 2026, 11:15 [IST]

Subscribe to Oneindia Tamil

இஸ்லாமாபாத்: அமெரிக்கா-ஈரான் இடையே தற்போது தற்காலிக போர் நிறுத்தம் ஏற்பட்டிருக்கிறது. இந்நிலையில், ஈரான் அதிகாரிகள் பாகிஸ்தானுக்கு வந்திருக்கிறார்கள். விரைவில் அமெரிக்க பேச்சுவார்த்தை குழுவும் பாகிஸ்தான் வர இருக்கிறது. இருப்பினும், அமெரிக்காவுடன் நேரடி பேச்சுவார்த்தை நடத்த எங்களுக்கு விருப்பமில்லை என ஈரான் அறிவித்திருக்கிறது.

ஈரான் வெளியுறவு அமைச்சகத்தின் செய்தித் தொடர்பாளர் இஸ்மாயில் பாகேய், அமெரிக்க அதிகாரிகளுடன் எந்தவிதமான நேரடிச் சந்திப்பும் திட்டமிடப்படவில்லை என்பதை உறுதிப்படுத்தியுள்ளார்.

ஈரான் சொன்ன விஷயம்

ஈரான் வெளியுறவு அமைச்சர் அப்பாஸ் அராக்சி தற்போது இஸ்லாமாபாத்தில் தங்கியிருந்தாலும், ஈரானின் கருத்துக்கள் பாகிஸ்தான் மூலமாகவே அமெரிக்காவிற்குத் தெரிவிக்கப்படும் என்று அவர் கூறியுள்ளார்.

இது குறித்து அப்பாஸ் அராக்சி கூறுகையில், "அமெரிக்காவால் திணிக்கப்பட்ட ஆக்கிரமிப்புப் போரை முடிவுக்குக் கொண்டுவரவும், பிராந்தியத்தில் அமைதியை ஏற்படுத்தவும் பாகிஸ்தான் எடுக்கும் சமாதான முயற்சிகளுக்கு ஈரான் ஒத்துழைப்பு அளிக்கிறது. எங்கள் அண்டை நாடுகளே எங்கள் முன்னுரிமை" என்று தெரிவித்திருக்கிறார். இது அமெரிக்காவுடன் நேரடியாகப் பேசுவதை விட பிராந்திய உறவுகளுக்கே ஈரான் முக்கியத்துவம் அளிப்பதைக் காட்டுகிறது.

பாகிஸ்தான் போகும் அதிகாரிகள்

அமெரிக்க அதிபர் டொனால்ட் ட்ரம்ப், தனது சிறப்புத் தூதர்களான ஸ்டீவ் விட்காஃப் மற்றும் ஜாரெட் குஷ்னர் ஆகியோரை இஸ்லாமாபாத்திற்கு அனுப்பியுள்ளார். பேச்சுவார்த்தையில் முன்னேற்றம் ஏற்பட்டால், அமெரிக்கத் துணை அதிபர் ஜே.டி. வேன்ஸ் நேரடியாகப் பாகிஸ்தான் செல்லவும் வாய்ப்புள்ளதாக வெள்ளை மாளிகை தெரிவித்துள்ளது.

பேச்சுவார்த்தை எப்படி போகுது?

அதேபோல, ஈரான் தரப்பில் இருந்து சில சலுகைகள் வருவதாகவும், தற்போது ஈரானில் யார் அதிகாரத்தில் இருக்கிறார்கள் என்பதைப் புரிந்துகொண்டு பேச்சுவார்த்தை நடத்தி வருவதாகவும் ட்ரம்ப் நம்பிக்கை தெரிவித்துள்ளார்.

மறுபுறம் ஈரான் ஊடகமான தஸ்னிம், அமெரிக்காவின் கோரிக்கைகளை ஈரான் முற்றிலுமாக நிராகரித்துவிட்டதாகக் கூறுகிறது. அமெரிக்காவின் அகங்காரப் போக்கு மற்றும் அத்துமீறல்கள் காரணமாக தற்போதைய சூழலில் பேச்சுவார்த்தைக்கு இடமில்லை என்பதே ஈரானின் நிலைப்பாடாக உள்ளது என்பது குறிப்பிடத்தக்கது.

Published On April 25, 2026