கடத்தப்பட்ட நைஜீரிய மாணவிகளை மீட்க நாம் போராட வேண்டும் – மலாலா அழைப்பு

கனோ: நைஜீரியாவில் போக்கோ ஹரம் தீவிரவாதிகளால் கடத்தப்பட்ட மாணவிகளுக்காக நாம் போராட வேண்டும் என்று பாகிஸ்தானில் தலிபான் தீவிரவாதிகளின் தாக்குதலுக்குள்ளாகி உயிர் பிழைத்து தற்போது லண்டனில் வசித்து வரும் மலாலா தெரிவித்துள்ளார்.

நைஜீரியா நாட்டில் உள்ள சிபோக் என்ற இடத்தில் விடுதியுடன் கூடிய பள்ளிக்கூடம் ஒன்று செயல்பட்டு வந்தது. இங்கு 500 க்கும் மேற்பட்ட மாணவிகள் படித்து வந்தனர்.

இங்கு புகுந்த அல் கொய்தா ஆதரவு தீவிரவாதிகள் இவர்களைக் கடத்திக் கொண்டு போய் விட்டனர்.

மாணவிகள் கடத்தல்:

இங்கு கடந்த மாதம் 14 ஆம் தேதி தீவிரவாதிகள் திடீரென நுழைந்து 200 க்கும் மேற்பட்ட மாணவிகளை கடத்தி சென்றனர். கடத்தப்பட்ட மாணவிகள் அனைவரும் 13 வயதில் இருந்து 17 வயதிற்கு உட்பட்டவர்கள்.

அடிமைகள் ஆக்குவோம்:

அவர்களை தீவிரவாதிகள் எங்கு வைத்திருக்கிறார்கள் என்று தெரியவில்லை. அந்த மாணவிகளை தீவிரவாதிகளுக்கு செக்ஸ் அடிமைகளாக விற்கப்போவதாக தீவிரவாதிகள் மிரட்டியுள்ளனர்.

மீட்புக் குழு:

நைஜீரியா படையினர் அந்த மாணவிகளை மீட்பதற்கு இதுவரை எடுத்த முயற்சி பலனளிக்கவில்லை. எனவே வெளிநாட்டு உதவிகளை நைஜீரியா நாடியுள்ளது. இதையடுத்து அமெரிக்கா, இங்கிலாந்து, பிரான்சு ஆகிய நாடுகள் வீரர்களையும், பிற மீட்புக் குழுக்களையும் நைஜீரியாவுக்கு அனுப்பி வைத்துள்ளன.

மலாலா வேண்டுகோள்:

இந்த நிலையில் பாகிஸ்தானில் தீவிரவாதிகளால் சுடப்பட்டு உயிர்பிழைத்த சிறுமி மலாலா நைஜீரியாவில் கடத்தப்பட்ட 200 மாணவிகளையும் தீவிரவாதிகள் விடுவிக்க வேண்டும் என்று வேண்டுகோள் விடுத்துள்ளார்.

இங்கிலாந்தில் தஞ்சம்:

மலாலா பெண் கல்விக்காக குரல் கொடுத்து வந்தார். இதனால் அவரை தலிபான் தீவிரவாதிகள் சுட்டனர். பலத்த காயம் அடைந்த அவர் தீவிர சிகிச்சைக்கு பின் உயிர் பிழைத்தார். தற்போது இங்கிலாந்து நாட்டில் அவர் தஞ்சமடைந்துள்ளார். அங்கிருந்தபடி இந்த வேண்டுகோளை அவர் விடுத்துள்ளார்.

காப்பாற்ற குரல் கொடுப்போம்:

அவர் மேலும் கூறும்போது, கடத்தப்பட்ட மாணவிகள் அனைவரும் நமது சகோதரிகள். அவர்களுக்காக அனைவரும் குரல் கொடுக்க வேண்டும். இந்த பிரச்சினையை எங்கோ நடக்கும் பிரச்சினையாக கருதி கண்டுகொள்ளாமல் விட்டுவிடக்கூடாது. இதில் நாம் அமைதியாக இருந்தால் இதுபோன்ற மேலும் பல பிரச்சினைகள் நடக்க தொடங்கிவிடும் என்றும் அவர் கூறியிருக்கிறார்.

English summary

Malala Yousafzai, the Pakistani schoolgirl who survived a shooting by Taliban insurgents, has said the world must not stay silent over the abduction of more than 200 girls in Nigeria.She told the BBC that "if we remain silent then this will spread, this will happen more and more and more".The girls were kidnapped more than three weeks ago by Islamist Boko Haram militants in north-east Borno state.