குடியிருப்புகளில் குண்டு போட்ட ரஷ்யா.. உக்ரைனில் 7 அப்பாவிகள் பரிதாப பலி

Updated: Thursday, February 24, 2022, 14:33 [IST]

Subscribe to Oneindia Tamil

கிவ்: ரஷ்யாவின் தாக்குதலால் உக்ரைனை சேர்ந்த 7 பேர் கொல்லப்பட்டதாகவும் 9 பேர் காயமடைந்ததாகவும் உக்ரைன் அரசு தகவல் தெரிவித்துள்ளது.

உக்ரைன் மீது ராணுவ நடவடிக்கையை எடுக்குமாறு ரஷ்ய அதிபர் விளாடிமிர் புதின் உத்தரவிட்டதன் பேரில் இன்று அதிகாலை முதல் ரஷ்ய படைகள் உக்ரைனுக்குள் நுழைந்து தாக்குதல்களை நடத்தி வருகிறார்கள்.

உக்ரைனின் விமான தளங்கள், ராணுவ தளங்கள் மீது தாக்குதல் நடத்தி வருவதால் தங்கள் நாட்டை சேர்ந்த நூற்றுக்கணக்கான ராணுவ வீரர்கள் உயிரிழந்துவிட்டதாக உக்ரைன் அரசு தெரிவித்துள்ளது.

உக்ரைன் குடியிருப்பில் தாக்குதல்

உக்ரைனில் உள்ள ராணுவ தளங்கள் மற்றும் விமான தளங்கள் ஆகியவற்றின் மீது மட்டுமே ரஷ்யா தாக்குதல் நடத்தி வருவதாக விளக்கம் அளித்தது. ஆனால் தற்போது உக்ரைனில் குடியிருப்பு பகுதிகளில் ரஷ்யா குண்டு மழை பொழிந்ததால் அப்பாவி மக்கள் 7 பேர் உயிரிழந்ததாகவும் 9 பேர் காயமடைந்ததாகவும் தகவல்கள் வெளியாகியுள்ளது. போடில்ஸ்கில் ராணுவ தளம் மீது தாக்குதல் நடத்தப்பட்டது. ஒடேஸாவில் நடந்த தாக்குதலில் 6 பேர் பலியாகிவிட்டனர். மரியூபோலில் நடந்த தாக்குதலில் ஒருவர் உயிரிழந்தார். 19 பேரை காணவில்லை என உக்ரைன் அரசு தெரிவித்துள்ளது.

2 நகரங்களை கைப்பற்றியது ரஷ்யா

உக்ரைனின் கிழக்கு பகுதியில் 2 நகரங்களை ரஷ்ய கிளர்ச்சியாளர்கள் கைப்பற்றியதாக தெரிவித்துள்ளனர். ரஷ்யாவின் நட்பு நாடான பெலாரஸில் ராணுவ பயிற்சிகளை கொடுப்பதற்காக ரஷ்ய துருப்புகள் குவிந்துள்ளன. அதுபோல் ரஷ்யா நடத்திய வான்வழி தாக்குதலில் கார்கிவ்வில் உள்ள ஒரு அபார்ட்மென்ட் மீது தாக்குதல் நடத்தப்பட்டது.

இந்தியர்கள் தவிப்பு

கிவ்வில் ரஷ்ய படைகள் நுழைந்துள்ளதால் அங்குள்ள இந்திய மாணவர்கள், இந்தியர்கள் நாடு திரும்ப கிவ் விமான நிலையத்திற்கு வந்தனர். ஆனால் கிவ்வை சுற்றியுள்ள பகுதிகளில் விமானங்கள் பறக்க தடை விதிக்கப்பட்டுள்ளதால் ஆயிரக்கணக்கான பேர் விமான நிலையத்தில் சிக்கி தவித்து வருகிறார்கள்.

5 ரஷ்ய விமானங்கள்

உக்ரைன் அரசு 5 ரஷ்ய விமானங்களை சுட்டு வீழ்த்தியது. உக்ரைன் கிழக்கு பகுதியில் வெடி பொருட்களின் சப்தம் தொடர்ந்து கேட்டுக் கொண்டே வருகிறது. ரஷ்யாவும் விடாமல் தொடர்ந்து தாக்குதல் நடத்தி கொண்டே இருக்கிறது. இந்த போரை நிறுத்துமாறு ரஷ்யாவுக்கு உலக நாடுகள் எச்சரிக்கை விடுத்துள்ளன.