இது உ.பியின் டைம்! 1 டிரில்லியன் பொருளாதாரம்தான் இலக்கு.. 5 ஆண்டுகள் டார்கெட் வைத்த யோகி ஆதித்யநாத்

லக்னோ: உத்தரப் பிரதேசத்தின் பொருளாதாரத்தை ஒரு டிரில்லியன் டாலர் பொருளாதாரமாக மாற்ற வேண்டும் என்று முதலமைச்சர் யோகி ஆதித்யநாத் தொடர்ந்து வலியுறுத்தி வருகிறார். இந்நிலையில், இதற்கு 5 ஆண்டுகளை டார்கெட்டாக பிக்ஸ் செய்திருக்கிறார்.

உத்தரப் பிரதேசத்தில் யோகி ஆதித்யநாத் தலைமையில் பாஜக ஆட்சி நடைபெற்று வருகிறது. லக்னோவில் இந்த ஆண்டு தொடக்கத்தில் நடைபெற்ற உலக முதலீட்டாளர்கள் மாநாட்டின் மூலம் ரூ.34 லட்சம் கோடி வரை புரிந்துணர்வு ஒப்பந்தம் மேற்கொள்ளப்பட்டுள்ளது. இது மாநிலத்தின் வேலை வாய்ப்பை அதிகரிக்கும் என எதிர்பார்க்கப்படுகிறது.

அதேபோல சமீபத்தில் நடைபெற்ற பட்ஜெட் கூட்டத்தொடரிலும் கூடுதல் நிதி ஒதுக்கீடு செய்யப்பட்டுள்ளது. இந்த வரிசையில் மற்றொரு நிகழ்வும் இடம் பிடித்துள்ளது. அதாவது, உ.பி முதலமைச்சராக யோகி ஆதித்யநாத் பொறுப்பேற்று 6 ஆண்டுகள் ஆகியிருக்கிறது. இதுவரை இம்மாநிலத்தில் யாரும் தொடர்ச்சியாக 6 ஆண்டுகள் முதலமைச்சராக நீடித்ததில்லை. இதனை மாநில அரசு சிறப்பாக கொண்டாடி வருகிறது.

இந்நிலையில் மாநிலத்தின் பொருளாதாரத்தை உயர்த்த வேண்டும் என யோகி தொடர்ந்து கூறி வந்தார். இப்படி இருக்கையில் நேற்று யோகி தலைமையில் ஆய்வு கூட்டம் ஒன்று நடைபெற்றது. இதில் அனைத்து துறைகளின் பிரதிநிதிகளும் பங்கேற்றிருந்தனர். அதில் சிறப்புரையாற்றிய யோகி ஆதித்யநாத் "நமது இலக்கு 1 டிரில்லியன் பொருளாதாரம்தான். இதனை அடைய நமக்கு 5 ஆண்டுகள் போதும். 2027ம் ஆண்டுக்குள் மாநிலத்தின் பொருளாதாரத்தை உயர்த்த வேண்டும்.

அதிகாரிகள் இதற்கான முக்கிய துறைகளில் கவனம் செலுத்த வேண்டும். உற்பத்தி, IT & ITES (தகவல் தொழில்நுட்பம் இயக்கப்பட்ட சேவைகள்), மத சுற்றுலா மற்றும் விவசாயம் ஆகிய துறைகளில் அதிகாரிகள் உரிய கவனம் செலுத்த வேண்டும். அதேபோல, எரிசக்தி, சுகாதாரம், நகர்ப்புற மேம்பாடு, கல்வி, உணவு பதப்படுத்துதல் மற்றும் MSME போன்ற துறைகளிலும் சிறப்பு கவனம் செலுத்த வேண்டும். மாநிலத்தில் உள்ள முக்கிய பெருநகரங்களை பல்வேறு துறைகளுக்கான மையங்களாக மேம்படுத்த திட்டமிடப்பட்டுள்ளது.

இந்த வரிசையில், லக்னோவை நாட்டின் முதல் "AI நகரமாக" மாற்றுவதற்கான ஏற்பாடுகள் நடந்து வருகின்றன. மாநிலத்தை பசுமை எரிசக்தி மையமாக மாற்றுவது குறித்தும் ஆலோசனை மேற்கொள்ளப்பட்டு வருகிறது" என்று கூறியுள்ளார்.

English summary

Chief Minister Yogi Adityanath has been insisting on transforming Uttar Pradesh's economy into a trillion dollar economy. In this case, he has fixed 5 years as a target.