அட பாவமே மதுரை மீனாட்சியம்மன் கோயிலில் "பார்வதி"க்கு என்னாச்சு! இப்படி சாய்ந்துகிடக்குதே!
மதுரை: மதுரை மீனாட்சி அம்மன் கோயிலில் பராமரிக்கப்பட்டு வரும் யானை பார்வதிக்கு திடீரென உடல்நலக் குறைவு ஏற்பட்டுள்ளதால் அந்த யானைக்கு கால்நடை மருத்துவர்கள் சிகிச்சை அளித்து வருகிறார்கள்.
மீனாட்சி அம்மன் கோயிலுக்கு கடந்த 2000ஆம் ஆண்டு அருணாசல பிரதேசத்தில் இருந்து குட்டி யானை ஒன்று வாங்கப்பட்டது. அதற்கு பார்வதி என பெயர் சூட்டப்பட்டு அந்த யானை பராமரிக்கப்பட்டு வருகிறது.
இந்த யானைக்கு 27 வயதாகிறது. கடந்த 2015ஆம் ஆண்டு பார்வதிக்கு காலில் சிறிய காயம் ஏற்பட்டது. அதற்கு கால்நடை மருத்துவர்கள் சிகிச்சை அளித்தனர். அன்று முதலே பார்வதியை கால்நடை மருத்துவர்கள் கண்காணித்து வருகிறார்கள்.
இந்த நிலையில் 2020ஆம் ஆண்டு யானையின் இடது கண்ணில் பார்வை குறைபாடு ஏற்பட்டது. பரிசோதனையில் இரு கண்களிலும் கண்புரை, வெண் படலம் ஏற்பட்டு இடது கண் பார்வை பாதிக்கப்பட்டது தெரிந்தது. சென்னை, மதுரை கால்நடை மருத்துவர்கள் சிகிச்சை அளித்தும் முன்னேற்றம் இல்லாததால் தாய்லாந்து மருத்துவர்கள் வரவழைக்கப்பட்டு சிகிச்சை அளிக்கப்பட்டது.
பார்வதி தினந்தோறும் காலையிலும் மாலையிலும் கோயிலின் ஆடி வீதிகளில் நடைப்பயிற்சிக்கு செல்வது வழக்கம். அவ்வப்போது வயிற்றுப்போக்கு ஏற்படுவதும், சிகிச்சை அளிப்பதும் தொடர்ந்து வந்தது. இந்த நிலையில் கோயிலின் ஆவணி மூலத் திருவிழாவில் மீனாட்சி வீதியுலா வந்த போது பார்வதி யானை சென்று வந்தது.
இந்த நிலையில் இரு நாட்களுக்கு முன்பு வயிற்றுப்போக்கு ஏற்பட்டதை அடுத்து பார்வதியின் உடலில் நீர்ச்சத்து குறைந்து சோர்வடைந்தது. 3 நாட்களாக வயிற்றுப்போக்கு நீடிப்பதால் தொடர்ந்து குளுக்கோஸ் ஏற்றப்பட்டு வருகிறது. தற்போது பார்வதி ஓய்வு எடுத்து வருகிறது. கடந்த ஆண்டும் இதே போல் வயிற்றுப்போக்கு ஏற்பட்டு பார்வதி யானை நடக்க முடியாமல் இருந்தது குறிப்பிடத்தக்கது.
இந்த கோயிலில் பார்வதி யானை புத்துணர்வு பெறும் வகையில் ரூ 23.50 லட்சம் மதிப்பில் கட்டப்பட்ட குளியல் தொட்டியை நிதியமைச்சராக இருந்த பழனிவேல் தியாகராஜன் திறந்து வைத்தார். இந்த தொட்டியில் யானை பார்வதி மகிழ்ச்சியுடன் இறங்கி குதூகலமாக குளித்ததை மறக்க முடியுமா? பார்வதி யானை விரைவில் நலம் பெற வேண்டும் என்று பக்தர்கள் பிரார்த்தனை வைக்கிறார்கள். மேலும் பார்வதியை, கால்நடை மருத்துவ குழுவினர் தொடர்ந்து கண்காணிக்க வேண்டும் என்பதும் அவர்களது கோரிக்கையாக உள்ளது.
Click it and Unblock the Notifications
Sign in with Google