அன்று காவல் துறை.. நேற்று கூட்டுறவு துறை.. முக்கிய துறைகளில் முதல்வர் திடீர் விசிட்!.. பரபரத்த மதுரை

Updated: Sunday, October 3, 2021, 13:35 [IST]

Subscribe to Oneindia Tamil

மதுரை: மதுரை கே நாட்டாபட்டி கிராமத்தில் தொடக்க வேளாண்மை கூட்டுறவு கடன் சங்க அலுவலகத்தில் ஆய்வு செய்து பயனாளிகளுக்கு பயிர் கடனுக்கான காசோலைகளை முதல்வர் மு.க.ஸ்டாலின் வழங்கினார்.

முதல்வராக ஸ்டாலின் பதவியேற்றது முதல் திடீர் ஆய்வுகளை நடத்தி வருகிறார். ரேஷன் கடைகள், தடுப்பூசி முகாம்கள், கொரோனா வார் ரூம்கள் என அதிரடியாக செல்லும் முதல்வர் அங்கு பொதுமக்களிடம் குறைகளையும் கேட்டறிகிறார்.

அந்த வகையில் சேலத்தில் ஒரு நிகழ்ச்சியில் கலந்து கொண்ட முதல்வர் ஸ்டாலின், தருமபுரி மாவட்டம் அதியமான்கோட்டை காவல் நிலையத்தில் கடந்த இரு தினங்களுக்கு முன்னர் சென்றார்.

இன்ஸ்பெக்டர் நாற்காலியில் உட்கார்ந்த முதல்வர்

அங்கு காவல் துறை ஆய்வாளர் நாற்காலியில் உட்கார்ந்த முதல்வர் ஸ்டாலின் அங்கிருந்த கோப்புகளை ஆய்வு செய்தார். காவல் துறையினரிடமும் குறைகளை கேட்டறிந்தார். பொதுமக்களை இன்முகத்துடன் நடத்துமாறு அறிவுறுத்தினார். சுமார் 10 நிமிடங்கள் அங்கிருந்த முதல்வர் ஸ்டாலின் பின்னர் புறப்பட்டு சென்றார்.

திடீர் விசிட்

இந்த திடீர் விசிட் பொதுமக்களிடையே பெரும் வரவேற்பை பெற்றது. மேலும் அடுத்த நாள் ஒகேனக்கல் செல்லும்போது திடீரென அங்கு ஒரு அரசு பெண்கள் மேல்நிலைப் பள்ளியை பார்த்துவிட்டு வண்டியை நிறுத்துமாறு கூறினார். அங்கு மாணவிகளிடம் நலம் விசாரித்த முதல்வர் , நன்றாக படித்து உயர் பதவிகளை வகிக்க வேண்டும் என்றார்.

அரசு விடுதி

பின்னர் அவ்வழியாக இருந்த மாணவர்கள் அரசு விடுதிக்கு போன அவர் அங்கிருந்த உணவின் தரத்தை ஆய்வு செய்தார். அந்த விடுதியில் தங்கியிருந்த ஒரு மாணவனுக்கு அன்றைய தினம் பிறந்தநாள் என்பதால் அந்த மாணவருக்கு பிறந்தநாள் வாழ்த்துகளை கூறினார். இவ்வாறு தனது ஆய்வு பணிகளால் கடந்த இரு தினங்களாக முதல்வர் ஸ்டாலின் டிரென்டிங்கில் இருந்து வருகிறார்.

தொடக்க வேளாண்மை கூட்டுறவு கடன்

மதுரை மாவட்டம் பாப்பாப்பட்டியில் கிராம சபை கூட்டத்தில் கலந்து கொண்ட முதல்வர் ஸ்டாலின், செல்லம்பட்டி ஊராட்சி ஒன்றியம், கே நாட்டாபட்டி கிராமத்தில் உள்ள தொடக்க வேளாண்மை கூட்டுறவு கடன் சங்க அலுவலகத்துக்கு நேற்றைய தினம் நேரில் சென்று ஆய்வு மேற்கொண்டார். பின்னர் அங்கு தொடக்க வேளாண்மை கூட்டுறவு கடன் சங்க அலுவலகத்தில் பயனாளிகளுக்கு பயிர்க் கடனுக்கான காசோலைகளை முதல்வர் வழங்கினார்.