ஹரியானா அடியில் காங்கிரஸ் முழிச்சிடுச்சாம்.. மகாராஷ்டிரா 'தலைக'ளுக்கு வாய்ப்பூட்டு போட்ட டெல்லி!
மும்பை: ஹரியானா மாநில சட்டசபை தேர்தலில் பாஜகவை வீழ்த்த முடியாமல் தோல்வியைத் தழுவிய காங்கிரஸ், அடுத்த மாதம் தேர்தல் நடைபெற இருக்கும் மகாராஷ்டிரா பக்கம் உடனே கவனத்தை திருப்பி இருக்கிறது. மகாராஷ்டிராவில் காங்கிரஸ் தலைவர்கள் வழக்கம் போல ஆளுக்கு ஒருவராக முட்டி மோதும் போக்கை உடனே நிறுத்த வேண்டும் என உத்தரவு போடுவதற்காகவே மாநில பொறுப்பாளர் ரமேஷ் சென்னிதாலாவை நேற்றே மும்பைக்கு அனுப்பி வைத்திருக்கிறது காங்கிரஸ் மேலிடம்.
ஹரியானா சட்டசபை தேர்தலில் பாஜகவின் 10 ஆண்டுகால ஆட்சியை வீழ்த்த முடியாத பரிதாப நிலைக்கு தள்ளப்பட்டுவிட்டது காங்கிரஸ். பாஜக ஆட்சிக்கு எதிரான அதிருப்தி அலையை இலாவகமாக வளைத்துப் போடாமல் உட்கட்சி மோதலில் ஹரியானா தலைவர்கள் மும்முரம் காட்டியதால் கோட்டை விட்டுவிட்டனர்.
இந்த நிலையில் ஹரியானா தேர்தல் முடிவுகள் வெளியாகிக் கொண்டிருக்கும் போதே மகாராஷ்டிரா மாநில காங்கிரஸ் மேலிடப் பொறுப்பாளர் ரமேஷ் சென்னிதாலாவை உடனே மும்பைக்கு செல்ல உத்தரவிட்டதாம் காங்கிரஸ் மேலிடம். இதனையடுத்து மும்பைக்கு பறந்து வந்த ரமேஷ் சென்னிதாலா பல்வேறு கட்ட ஆலோசனைகளை நடத்தி வருகிறார். மேலும் காங்கிரஸ் தலைவர்கள், முதல்வர் வேட்பாளர் உள்ளிட்டவை தொடர்பாக ஆளுக்கு ஒரு கருத்தை தெரிவிக்கும் போக்கை உடனே நிறுத்தியாக வேண்டும் எனவும் கறாராக உத்தரவிட்டுள்ளாராம் ரமேஷ் சென்னிதாலா.
மகாராஷ்டிராவில் அடுத்த மாதம் தேர்தல் நடைபெற உள்ளது. இந்த தேர்தலில் மகா விகாஸ் அகாடி அணியில் உத்தவ் தாக்கரே சிவசேனா, சரத்பவார் தேசியவாத காங்கிரஸ் மற்றும் காங்கிரஸ் இடம் பெற்றுள்ளன. மகாராஷ்டிராவில் கூட்டணி கட்சிகள் ஆதரவு அவசியம் என்றாலும் காங்கிரஸுக்கும் கணிசமான வாக்கு வங்கி இருக்கிறது. மகாராஷ்டிராவில் பாஜகவுடன் பல தொகுதிகளில் காங்கிரஸ் நேரடியாக மோதுகிறது. ஆனால் காங்கிரஸ் தலைவர்களோ, முதல்வர் வேட்பாளர் யார் என்பது குறித்து ஆளுக்கு ஒரு கருத்தை சொல்லி வருகின்றனர். இதனால் காங்கிரஸ் கட்சிக்குள்ளும் மட்டுமல்லாமல் மகா விகாஸ் அகாடி அணியிலும் குழப்பம் தீவிரமானது. இத்தகைய போக்கினால்தான் மத்திய பிரதேசம், ஹரியானாவில் அடிவாங்கினோம் என்பதை உணர்ந்ததாலோ என்னவோ உடனே ரமேஷ் சென்னிதாலாவை மும்பைக்கு அனுப்பி வாய்ப்பூட்டு போட வைத்திருக்கிறதாம் டெல்லி காங்கிரஸ் மேலிடம்! ஓஹோ முழிச்சுடுச்சோ!
Click it and Unblock the Notifications
Sign in with Google