மகாராஷ்டிரா சட்டசபை தேர்தல்: சயான் கோலிவாடா தொகுதியில் கேப்டன் தமிழ்ச்செல்வன் 3-வது முறையாக போட்டி!
மும்பை: மகாராஷ்டிரா சட்டசபை தேர்தலில் சயான் கோலிவாடா தொகுதி பாஜக வேட்பாளராக மீண்டும் களமிறங்குகிறார் கேப்டன் தமிழ்ச்செல்வன். சயான் கோலிவாடா தொகுதியில் 2014, 2019-ம் ஆண்டு சட்டசபை தேர்தல்களில் போட்டியிட்டு எம்.எல்.ஏ.வான தமிழ்ச்செல்வன், தமிழ்நாட்டின் புதுக்கோட்டை மாவட்டத்தைப் பூர்வீகமாகக் கொண்டவர். மகாராஷ்டிராவில் வார்டு கவுன்சிலராக இருந்து எம்.எல்.ஏ.வானவர் தமிழ்ச்செல்வன்.
மகாராஷ்டிராவில் மொத்தம் உள்ள 288 தொகுதிகளில் பாஜக 150 முதல் 156 தொகுதிகளில் போட்டியிட திட்டமிட்டுள்ளது. பாஜக, ஏக்நாத் ஷிண்டே சிவசேனா, அஜித்பவார் தேசியவாத காங்கிரஸ் ஆகியவை தொகுதிப் பங்கீட்டு பேச்சுவார்த்தையை நடத்தி வருகின்றன. இந்த நிலையில் மகாராஷ்டிரா சட்டசபை தேர்தலில் போட்டியிடும் 99 வேட்பாளர்களை பாஜக நேற்று முதல் கட்டமாக அறிவித்தது. அனைத்து அரசியல் கட்சிகளைவிட பாஜக முந்திக் கொண்டு வேட்பாளர்களை அறிவித்துள்ளது. மகாராஷ்டிரா துணை முதல்வர் தேவேந்திர பட்னாவிஸ், நாக்பூர் தென்மேற்கு தொகுதியில் போட்டியிடுகிறார். இந்த பட்டியலில் 13 பெண்களுக்கும் வாய்ப்பு வழங்கப்பட்டுள்ளது.
பாஜக நேற்று வெளியிட்ட முதல் கட்ட வேட்பாளர் பட்டியலில் தமிழரான கேப்டன் தமிழ்ச்செல்வனுக்கு மீண்டும் போட்டியிட வாய்ப்பளிக்கப்பட்டுள்ளது. சயான் கோலிவாடா தொகுதியில் பாஜக வேட்பாளராக 3-வது முறையாக களம் காண்கிறார் தமிழ்ச் செல்வன் எம்.எல்.ஏ. தமிழ்நாட்டின் புதுக்கோட்டை மாவட்டம் கறம்பக்குடி அருகே உள்ள பிலா விடுதியைச் சேர்ந்தவர் கேப்டன் தமிழ்ச்செல்வன். சயான் கோலிவாடா கவுன்சிலராக பணியாற்றிய நிலையில் 2014-ம் ஆண்டு பாஜக வேட்பாளராக போட்டியிட்டு வென்றார். 2019-ம் ஆண்டு சயான் கோலிவாடா தொகுதியில் மீண்டும் போட்டியிட்டு எம்.எல்.ஏ.வானார் கேப்டன் தமிழ்ச் செல்வன்.
3-வது முறையாக சட்டசபை தேர்தலில் போட்டியிடுவது தொடர்பாக கேப்டன் தமிழ்ச் செல்வன் கூறுகையில், என் மீது நம்பிக்கை வைத்து பிரதமர் மோடி உள்ளிட்டோர் இந்த வாய்ப்பை வழங்கி உள்ளனர். தேவேந்திர பட்னாவிஸ், அமித்ஷா உள்ளிட்டா அனைவருக்கும் என் நன்றியைத் தெரிவித்துக் கொள்கிறேன். மகாராஷ்டிராவில் மகாயுதி கூட்டணி மீண்டும் வெற்றி பெற்று ஆட்சி அமைக்கும் என்பது உறுதி. தமிழர்களின் ஆதரவுடன் 3-வது முறையாக வெல்வேன் என்கிற நம்பிக்கை உள்ளது என்றார்.
Click it and Unblock the Notifications
Sign in with Google