தொடர் அட்டூழியம்.. தமிழக மீனவர்கள் 32 பேரை சிறைபிடித்த இலங்கை கடற்படை.. காங்கசேன் முகாமில் விசாரணை

புதுக்கோட்டை: நடுக்கடலில் விசைப்படகில் மீன்பிடித்து கொண்டிருந்த புதுக்கோட்டை மாவட்டத்தை சேர்ந்த 32 மீனவர்களை 5 விசைப்படகுகளுடன் இலங்கை கடற்படையினர் சிறைபிடித்து சென்ற சம்பவம் பெரும் பரபரப்பை ஏற்படுத்தி உள்ளது.

தமிழகத்தில் ராமநாதபுரம், புதுக்கோட்டை, தூத்துக்குடி மாவட்ட மீனவர்கள் நடுக்கடலில் மீன்பிடித்து வந்து விற்பனை செய்து வருகின்றனர். இவர்கள் இந்திய கடல் எல்லையில் மீன்பிடித்தாலும் கூட இலங்கை கடற்படையினர் மீனவர்களை மிரட்டுவது, துப்பாக்கி காட்டி மிரட்டுவது, அடித்து விரட்டுவது போன்ற செயல்களில் ஈடுபட்டு வருகின்றனர்.

மேலும் தமிழக மீனவர்கள் மீது துப்பாக்கிச்சூடு நடத்துவது, மீனவர்களை கைது செய்து படகுகளை சிறைப்பிடிப்பது, வலைகளை சேதப்படுத்துவது போன்ற சம்பவங்களுக்கும் அவ்வப்போது நடந்து வருகிறது. இந்நிலையில் தான் அதுபோன்ற ஒரு சம்பவம் நடந்துள்ளது.

அதாவது புதுக்கோட்டை மாவட்டத்தை சேர்ந்த மீனவர்கள் வங்கக்கடல் பகுதியில் இந்திய கடல் எல்லையில் மீன்பிடித்து கொண்டிருந்தனர். 5 விசைப்படகில் சென்ற மீனவர்கள் அங்கு மீன்பிடித்தனர். இந்த வேளையில் அங்கு வந்த இலங்கை கடற்படையினர் 32 மீனவர்களையும், 5 விசைப்படகுகளை சிறைபிடித்தனர். மேலும் மீனவர்களை கைது செய்த கடற்படையினர் எல்லை தாண்டி மீன்பிடித்ததாக கூறியுள்ளனர்.

இதையடுத்து 32 மீனவர்களையும், அவர்களின் 5 விசைப்படகுகளையும் இலங்கை கடற்படையினர் காங்கசேன் பகுதியில் உள்ள கடற்படை முகாமுக்கு கொண்டு சென்றனர். அங்கு அவர்கள் மீனவர்களிடம் தொடர்ந்து விசாரணை நடத்தி வருகின்றனர். தமிழக மீனவர்கள் மீது தொடர்ந்து இலங்கை கடற்படையினரை அத்துமீறி நடந்து கொள்ளும் நிலையில் அதற்கு முற்றுப்புள்ளி வைக்க மத்திய அரசு நடவடிக்கை எடுக்க வேண்டும் என மீனவர்கள் தரப்பில் தொடர்ந்து கோரிக்கை வைக்கப்பட்டு வருகிறது.

மேலும் தமிழக முதல்வர் சார்பிலும் மத்திய அரசுக்கு கடிதம் என்பது எழுதப்பட்டு வருகிறது. இருப்பினும் இந்த மீனவர் பிரச்சனைக்கு இன்று வரை தீர்வு என்பது காணப்படவில்லை. இதனால் தொடர்ந்து தமிழக மீனவர்கள் இலங்கை கடற்படையினரால் பாதிக்கப்பட்டு வருகின்றனர்.

English summary

The Sri Lankan Navy captured 32 fishermen from Pudukottai district who were fishing in a barge in the middle of the sea along with 5 barges.