தமிழக மீனவர்கள் 75 பேர் கைது… மார்ச் 25ல் பேச்சுவார்த்தை நடைபெறுமா?

ராமேஸ்வரம்: புதுக்கோட்டை மற்றும் ராமேஸ்வரத்தை சேர்ந்த 75-க்கும் மேற்பட்ட மீனவர்களை இலங்கை கடற்படையினர் கைது செய்துள்ளனர்.

புதுக்கோட்டையை சேர்ந்த ஏராளமான மீனவர்கள் நூற்றுக்கும் மேற்பட்ட படகுகளில் இன்று கடலில் மீன்பிடிக்க சென்றனர். நெடுந்தீவு அருகே உள்ள காரைநகர் பகுதியில் மீன்பிடித்து கொண்டிருந்தபோது, 50 தமிழக மீனவர்களை இலங்கை கடற்படையினர் சுற்றிவளைத்து கைது செய்தனர்.

இதேபோல் ராமேஸ்வரம்-மண்டபம் பகுதியை சேர்ந்த 25-க்கும் மேற்பட்ட மீனவர்களும் கைது செய்யப்பட்டுள்ளனர். 17-க்கும் மேற்பட்ட விசைப்படகுகளும் சிறைபிடிக்கப்பட்டுள்ளன.

இதனையடுத்து, காங்கேசன் துறைமுகம் மற்றும் தலைமன்னாருக்கு கொண்டு செல்லப்பட்ட தமிழக மீனவர்களிடம் தீவிர விசாரணை நடைபெற்று வருகிறது.

தமிழகத்தைச் சேர்ந்த மீனவர்கள் எல்லை தாண்டி வந்து மீன்பிடிப்பதாக கூறி இலங்கை கடற்படையினரால் அடிக்கடி கைது செய்யப்படுகின்றனர். இதேபோல் இலங்கை மீனவர்களும் இந்திய கடல் எல்லைக்குள் வரும்போது கைது செய்யப்படுகின்றனர். இந்த பிரச்சினைக்கு முற்றுப்புள்ளி வைக்கும் வகையில் இரு நாட்டு மீனவ பிரதிநிதிகளுக்கிடையே பேச்சுவார்த்தை நடத்தப்பட்டது.

அதன்பின்னர் இருநாட்டு சிறைகளிலும் உள்ள மீனவர்கள் பரஸ்பரம் விடுதலை செய்யப்பட்டனர். இலங்கையின் பல்வேறு சிறைகளில் அடைக்கப்பட்டிருந்த 172 தமிழக மீனவர்கள் விடுதலை செய்யப்பட்டு தாயகம் திரும்பியுள்ளனர். அனைத்து மீனவர்களும் விடுதலை செய்யப்பட்ட நிலையில், தற்போது 75 மீனவர்கள் கைது செய்யப்பட்டுள்ளனர்.

இரு நாட்டு மீனவர்களிடையே இலங்கையில் வரும் 25-ஆம் தேதி பேச்சுவார்த்தை நடைபெறும் என்று அதிகாரபூர்வமாக அறிவிக்கப்பட்டது.

இந்நிலையில், தமிழக மீனவர்கள் மீண்டும் கைது செய்யப்பட்டுள்ள சம்பவத்தால் இந்த பேச்சுவார்த்தை திட்டமிட்டப்படி நடைபெறுமா? என்ற சந்தேகம் எழுந்துள்ளது.

English summary

Days after releasing all the arrested fishermen from Tamil Nadu, the Sri Lankan Navy today arrested 75 fishermen and seized their 18 mechanised fishing boats, Fisheries Department sources said.