நாகர்கோவில்- பெங்களுர் தினசரி ரயிலை உடனே இயக்க பயணிகள் சங்கம் கோரிக்கை!
கன்னியாகுமரி: நாகர்கோவில் - பெங்களுர் தினசரி ரயிலை உடனே இயக்க வேண்டும் என குமரி மாவட்ட ரயில் பயணிகள் சங்கம் ரயில்வே நிர்வாகத்திற்கு கோரிக்கை விடுத்துள்ளனர்.
இது குறித்து, குமரி ரயில் பயணிகள் சங்கம் சார்பில் ரயில்வே நிர்வாகத்திற்கு அனுப்பியுள்ள கோரிக்கை மனுவில், கூறியுள்ளதாவது:
குமரி மாவட்டத்திலிருந்து பெங்களுர் மற்றும் ஓசூருக்கு மதுரை வழியாக தினசரி ரயில் வசதி இல்லாமல் பயணிகள் மிகவும் அவதிப்பட்டனர்.
கடந்த 15 வருடங்களாக இந்த வழி தடத்தில் தினசரி ரயில் இயக்க வேண்டும் என்பது இந்த பகுதி பயணிகளின் கோரிக்கை ஆகும். பல ஆண்டு கடுமையான போராட்டத்துக்கு பின் குமரி மாவட்ட பயணிகளின் கோரிக்கையை ஏற்று ரயில்வேதுறை 2010 ம் ஆண்டு ரயில் பட்ஜெட்டில் ரயில்வே அமைச்சர் மம்தா பானர்ஜி நாகர்கோவில் - பெங்களுர் வழி தடத்தில் வராந்திர ரயில் மதுரை, ஈரோடு, ஓசூர் வழியாக வாராந்திர அறிவித்து இயக்கப்பட்டு வருகிறது.
இந்த ரயில் பகல் நேர ரயிலாக இயங்கும் படியாக கால அட்டவணை அமைத்து இயக்குவதால் பெங்களுருக்கு செல்ல இந்த ரயிலால் குமரி மாவட்ட பயணிகளுக்கு சொல்லும் படியான எந்த பயனும் இல்லை.
இந்த ஆண்டு 2013-ம் ரயில் பட்ஜெட்டில் ரயில்வே அமைச்சர் பன்சால் அவர்களால் நாகர்கோவில் - பெங்களுர் வழித்தடத்தில் பிப்ரவரி மாதம் தாக்கல் செய்த பட்ஜெட்டில் புதிய தினசரி ரயில் நாமக்கல் வழியாக அறிவிக்கப்பட்டது.
பட்ஜெட் அறிவிப்பை தொடர்ந்து ஜுலை மாதம் வெளியிடப்பட்ட ரயில்கால அட்டவணையில் இந்த தினசரி ரயில் இயங்கும் காலஅட்டவணை வெளியிடப்பட்டது.
இந்த ஆண்டு பட்ஜெட்டில் அறிவித்த ரயில்களில் சென்னை - மானாமதுரை ரயில், சென்னை - வேளங்கண்ணி லிங் ரயில் , கோயம்பத்தூர் - மன்னார்குடி தினசரி ரயில், புதுச்சேரி - கன்னியாகுமரி ரயில் ஆகிய ரயில்கள் முதலில் இயக்கப்பட்டன. இந்த ரயில்கள் அந்த பகுதியில் உள்ள அரசியல்வாதிகளில் நிர்பந்தத்தின் அல்லது நெருக்கடி காரணமாக உடனடியாக இயக்கப்பட்டது.
பட்ஜெட்டில் அறிவித்த மற்ற ரயில்களில் சென்னை - பழநி, சென்னை -தஞ்சாவூர், கோவை -ராமேஸ்வரம் போன்ற ரயில்களும் படிப்படியாக இயக்கப்பட்டு விட்டது.
ஆனால், தென்தமிழ்நாட்டு பயணிகளுக்கு அதிக அளவு உபயோகப்படுத்தும் இந்த பெங்களுர் தினசரி ரயில் இதுவரையிலும் இயக்கப்படவில்லை, மற்ற ரயில்கள் இயக்கியது போன்று இந்த ரயிலையும் உடனடியாக இயக்க வேண்டும் என்று தென்தமிழக பயணிகள் எதிர்பார்க்கின்றனர் என கூறியுள்ளனர்.
Click it and Unblock the Notifications
Sign in with Google