ராஜ்நாத் நாளை சென்னை வருகிறார்... தொகுதி உடன்பாட்டை அறிவிக்கிறார்.. கூட்டணி இருக்குமா, உடையுமா?

Published: Monday, March 17, 2014, 10:18 [IST]

Subscribe to Oneindia Tamil

சென்னை: பாஜக தலைவர் ராஜ்நாத் சிங் நாளை சென்னை வருகிறார். பாஜக கூட்டணிக் கட்சிகளுடன் ஏற்படுத்தப்பட்டுள்ள தொகுதி உடன்பாட்டு விவரத்தை அவர் வெளியிடுகிறார்.

இதை கூட்டணிக் கட்சிகள் ஏற்குமா அல்லது தனித் தனியாக பிரிந்து செல்லுமா என்பது அவரது பேட்டிக்குப் பிறகு தெரிய வரும்.

ஏற்கனவே தேமுதிகவும், பாமகவும் கடுமையாக முறைத்துக் கொண்டுள்ளன. கொங்குநாடு மக்கள் தேசியக் கட்சியும் கோபமாக உள்ளது. இந்த நிலையில் ராஜ்நாத் சிங் நாளை சொல்லப் போவது குறித்து எதிர்பார்ப்பு ஏற்பட்டுள்ளது.

வானவில் கூட்டணி

பாஜக முதல் முறையாக தனது முழு முயற்சியில் ஒரு புதிய கூட்டணியை தமிழகத்தில் உருவாக்கியுள்ளது. வெளியிலிருந்து பார்த்தால் இதுதான் பலமான கூட்டணியாகத் தோன்றும். ஆனால் கட்சிகளின் தலைவர்கள்தான் விதம் விதமாக தினுசு தினுசாக செயல்படுகிறார்கள்.

கூட்டணியில் யார் யார்

பாமக, மதிமுக, தேமுதிக, கொங்குநாடு மக்கள் தேசியக் கட்சி, இந்திய ஜனநாயகக் கட்சி, அகில இந்திய என் ஆர் காங்கிரஸ், புதிய நீதிக் கட்சி ஆகியவை இதில் இடம் பெற்றுள்ளன.

யார் யாருக்கு எத்தனை சீட்

இந்தக் கூட்டணியில் யார் யாருக்கு எத்தனை சீட் என்பது தொடர்பாக பல மாதங்களாக பேச்சு நடந்தும் கூட இந்த நிமிடம் வரை சுமூகமான ஒரு உடன்பாடு ஏற்பட்டதாக தெரியவில்லை.

தொகுதிகளில் சிக்கல்

கடைசியாக கிடைத்த தகவலின்படி தேமுதிகவுக்கு 14, பாஜக, பாமகவுக்கு தலா 8, மதிமுகவுக்கு 7,. இந்திய ஜனநாயகக் கட்சி, கொங்குநாடு மக்கள் தேசிய கட்சி, என். ஆர். காங்கிரஸ் ஆகியவற்றுக்குத் தலா ஒரு தொகுதி ஒதுக்கப்பட்டுள்ளதாக தெரிகிறது. புதிய நீதிக் கட்சிக்கு சீட் தரப்படவில்லை. ஆனால் தொகுதிகளிலும், எண்ணிக்கையிலும் பாமக அதிருப்தி அடைந்துள்ளது. அதேபோல போலத்தான் பிற கட்சிகளும். மதிமுக அமைதியாக இருக்கிறது.

நாளை ராஜ்நாத் சிங் அறிவிப்பு

இந்தப் பட்டியலை உத்தேச பட்டியல் என்று பாஜக தெரிவித்துள்ளது. எனவே நாளை ராஜ்நாத் சிங் வெளியிடும் பட்டியல்தான் இறுதியானாக இருக்க முடியும். எனவே நாளைய ராஜ்நாத் சிங்கின் அறிவிப்புக்குப் பின்னர்தான் பாஜக கூட்டணி கட்டுக்குலையாமல் நீடிக்குமா அல்லது கட்சிகள் பிரியுமா என்பதைக் கணிக்க முடியும்.