சுவாதியின் தந்தை கூறிய அந்த வார்த்தை என்னை உலுக்கியது.. ஸ்டாலின் உருக்கம்!

சென்னை: படுகொலை செய்யப்பட்ட இன்போசிஸ் ஊழியர் சுவாதியின் தந்தை தன்னிடம் விடுத்த கோரிக்கை தன்னை உலுக்கிவிட்டதாக எதிர்க்கட்சி தலைவர் மு.க.ஸ்டாலின் உருக்கமாக தெரிவித்தார்.

நுங்கம்பாக்கம் ரயில் நிலையத்தில் கடந்த வெள்ளிக்கிழமை காலை 6.30 மணியளவில், இன்போசிஸ் நிறுவன ஊழியர் சுவாதி, ஒரு வாலிபரால் சரமாரியாக வெட்டி கொலை செய்யப்பட்டார்.

இந்நிலையில் சூளைமேட்டிலுள்ள சுவாதியின் வீட்டுக்கு திமுக பொருளாளரும், எதிர்க்கட்சி தலைவருமான ஸ்டாலின் இன்று சென்று அவரது தந்தை உள்ளிட்ட குடும்பத்தாருக்கு ஆறுதல் கூறினார்.

ஆறுதல் கூறிய ஸ்டாலின்

அப்போது, சுவாதியின் தந்தை மட்டுமின்றி, அவரது நெருங்கிய உறவினர்களும் வீட்டில் இருந்தனர். அவர்களிடம் பேசி ஆறுதல் கூறினார் ஸ்டாலின்.

பேட்டி

இதன்பிறகு வீட்டுக்கு வெளியே, ஸ்டாலின் நிருபர்களுக்கு பேட்டியளித்தார். அப்போது அவர், தமிழகத்தில் சட்டம்-ஒழுங்கு சிறப்பாக இருப்பதாக ஜெயலலிதா கூறியதை சுட்டிக்காட்டி, அது தவறான தகவல் என்றார்.

பட்டியல்

சென்னையில் சமீபகாலமாக நடைபெற்ற கொலை குற்றங்களை ஸ்டாலின் வரிசையாக பட்டியலிட்டு படித்தார். நிலைமை இப்படி இருக்கும்போது, தமிழக அரசு இனியாவது விரைந்து குற்றங்களை குறைக்க நடவடிக்கை எடுக்க வேண்டும் என்று கேட்டுக்கொண்டார்.

உலுக்கிய கோரிக்கை

மேலும், சுவாதியின் தந்தை, சந்தான கோபாலகிருஷ்ணன் தன்னிடம் ஒரு வேண்டுகோள்விடுத்ததாகவும், அது தனது மனதை உலுக்கியதாகவும் ஸ்டாலின், நிருபர்களிடம் கூறினார்.

யாருக்கும் நடக்க கூடாது

சுவாதியின் தந்தைக்கு, அவரது மகளுக்கு நேர்ந்த கொடூரம் பற்றி ஒரு பக்கம் வருத்தம் இருந்தாலும், இனிமேல் இப்படி யார் ஒருவருக்கும் நடக்க கூடாது என்பதை என்னிடம், வலியுறுத்தி கூறினார். அவரது அந்த பெருந்தன்மை எனது மனதை உலுக்கி விட்டது. இவ்வாறு ஸ்டாலின் கூறினார்.

English summary

Swathi's father request has shakes him, leader of opposition Stalin says, after visiting her home.