ஆந்திராவின் தடையை உடைத்து.. பாலாற்றில் பாய்ந்த வெள்ளம்.. திருப்பத்தூரில் வெளுத்து வாங்கிய மழை

திருபத்தூர்: தமிழ்நாட்டில் கடந்த சில நாட்களாக பரவலாக மழை பெய்து வருகிறது. குறிப்பாக வட மாவட்டங்களில் தொடர் மழை காரணமாக பாலாற்றில் வெள்ளம் ஏற்பட்டுள்ளது.

தென்னிந்தியாவில் ஒவ்வொரு ஆண்டும் தென்மேற்கு பருவமழையானது மே மாத இறுதியிலும், ஜூன் மாதம் 1ம் தேதியும் தொடங்கும். ஆனால் இந்த முறை எதிர்பார்த்ததைவிட ஒரு வாரம் தாமதமாகவே தொடங்கியது. இந்த மழையால் முதலில் பயன்பெறும் மாநிலம் கேரளம்தான். அதன் பின்னர்தான் தமிழ்நாடு, கர்நாடகா, கோவா, மகாராஷ்டிரா உள்ளிட்ட மாநிலங்கள் பயன்பெறும்.

ஆனால் இந்த ஆண்டு தென்மேற்கு பருவமழை குறைந்ததால் பல இடங்களில் வெயில் வாட்டி எடுக்க தொடங்கியுள்ளது. குறிப்பாக ஆகஸ்ட் மாதத்தில் 90 சதவிகிதமும், அதற்கு முன்னர் ஜூன் மாதத்திலும் பருவமழை 65 சதவிகிதம் என மொத்தமாக இந்த முறை பருவமழை 45 சதவிகிதம் குறைந்திருக்கிறது. இதேபோல கர்நாடக மாநிலத்தை பொறுத்த அளவிலும் பருவமழை குறைந்ததால் கிருஷ்ணராஜ சாகர், கபினி உள்ளிட்ட அணைகளுக்கு போதுமான நீர் வரத்து குறைந்தது.

இருப்பினும் தமிழ்நாட்டில் ஆகஸ்ட் மாதத்தில் இயல்பைவிட அதிகமாக மழை பதிவாகியிருந்தது. அதேபோல இந்த மாதம் தொடக்கம் முதல் பருவமழையின் அளவு அதிகமாக இருந்தது. குறிப்பாக வேலூர், திருப்பத்தூர், ராணிப்பேட்டை உள்ளிட்ட வட மாவட்டங்களில் தொடர்ந்து பெய்து வந்தது. இந்நிலையில் தற்போது திருப்பதூர் மாவட்டம் வாணியம்பாடியில் பாலாற்றில் வெள்ளம் ஏற்பட்டுள்ளது.

தமிழக ஆந்திர எல்லை பகுதியில் உள்ள நீர் பிடிப்பு பகுதிகளில் கடந்த ஒரு வாரமாக பெய்த கனமழை காரணமாக திம்மம்பேட்டை, ஆவாரங்குப்பம், ராமநாயக்கன் பேட்டை, அம்பலூர், கொடையாஞ்சி உள்ளிட்ட பகுதிகளின் வழியாக ஓடும் பாலாற்றில் வெள்ளம் ஏற்பட்டுள்ளது. ஆந்திர அரசு பாலாற்றில் ஏற்கெனவே 33 கி.மீ தொலைவில் 23க்கும் மேற்பட்ட தடுப்பணைகளை கட்டி இருக்கிறது. எனவே பருவமழை காலங்களிலும் பாலாற்றில் தண்ணீர் வருவது அரிதாக இருக்கிறது.

இப்படி இருக்கையில்தான் தற்போது வாணியம்பாடி அருகே உள்ள பாலாற்றின் பகுதிகளில் வெள்ளம் பெருக்கெடுத்து ஓடுகிறது. இதுதான் விவசாயிகள் மகிழ்ச்சியடைந்துள்ளனர். இது ஒருபுறம் இருக்க மறுபுறம் திருப்பத்தூர், வேலூர் உள்ளிட்ட மாவட்டங்களில் இன்று கனமழை பெய்யும் என வானிலை ஆய்வு மையம் தெரிவித்துள்ளது. இது குறித்து வெளியிட்டுள்ள அறிக்கையில்,

"இன்று நீலகிரி, வேலூர் மற்றும் திருப்பத்தூர் மாவட்டங்களில் ஓரிரு இடங்களில் கன முதல் மிக கனமழையும், திருவள்ளூர், காஞ்சிபுரம், செங்கல்பட்டு, விழுப்புரம், இராணிப்பேட்டை, திருவண்ணாமலை, கிருஷ்ணகிரி, தர்மபுரி, சேலம் மாவட்டங்கள் மற்றும் கோயம்புத்தூர் மாவட்டத்தின் மலை பகுதிகளில் ஓரிரு இடங்களில் கனமழை பெய்யவாய்ப்புள்ளது.

நாளை தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 27.09.2023: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும்" என்று கூறியிருக்கிறது. இந்த கனமழை எச்சரிக்கையால் பாலாற்றில் வெள்ளம் மேலும் அதிகரிக்கும் என்று எதிர்பார்க்கப்படுகிறது.

English summary

It has been raining extensively in Tamil Nadu for the past few days. Especially in northern districts due to incessant rains there has been flooding in Palaru.