சிறைக்குள்ளும் பரவிய கொரோனா.. திருச்சி மத்திய சிறையில் ஆயுள் தண்டனை கைதிக்கு தொற்று உறுதி

திருச்சி: திருச்சி மத்திய சிறையில் அடைக்கப்பட்டுள்ள திண்டுக்கல்லை சேர்ந்த ஆயுள் தண்டனை கைதிக்கு கொரோனா தொற்று உறுதி செய்யப்பட்டுள்ளது.

திருச்சி மத்திய சிறையில் விசாரணை கைதிகள், ஆயுள் தண்டனை கைதிகள் என 600-க்கும் மேற்பட்டவர்கள் அடைக்கப்பட்டிருந்தனர். கொரோனா தொற்று பரவல் காரணமாக கைதிகள் பலர் பரோலில் வீட்டிற்கு அனுப்பி வைக்கப்பட்டனர். மேலும் சிறையில் இருக்கும் கைதிகளுக்கு கொரோனா மருத்துவ பரிசோதனைகளும் மேற்கொள்ளப்பட்டன.

இந்தநிலையில் திண்டுக்கல் மாவட்டத்தை சேர்ந்த கைதி ஒருவர், கடந்த 2015-ம் ஆண்டு கொலை வழக்கு ஒன்றில் ஆயுள் தண்டனை விதிக்கப்பட்டு, திருச்சி மத்திய சிறையில் அடைக்கப்பட்டிருந்தார். அவர் உள்பட 5 பேர் கடந்த மார்ச் மாதம் 12-ந்தேதி, அதாவது ஊரடங்கு அறிவிக்கப்படும் முன்பே சென்னை புழல் சிறைக்கு பயிற்சிக்காக அனுப்பி வைக்கப்பட்டனர். அங்கு அவர்களுக்கு, தண்டனை காலம் முடிந்த பின்னர், திருந்தி வாழ்வதற்கான வழிமுறைகள் குறித்தும், சுயதொழில் செய்வதற்கான பயிற்சியும் அளிக்கப்பட்டது.

பின்னர் கடந்த 22-ந்தேதியன்று, சென்னை புழல் சிறையில் இருந்து 5 பேரும் பயிற்சி முடித்து திருச்சி மத்திய சிறைக்கு திரும்பினர். இங்கு 5 பேருக்கும், சளி மற்றும் ரத்தம் பரிசோதனைக்காக எடுக்கப்பட்டது. அவர்களில் திண்டுக்கல் ஆயுள் தண்டனை கைதிக்கு நேற்று கொரோனா தொற்று உறுதி செய்யப்பட்டுள்ளது. எஞ்சிய 4 பேருக்கும் கொரோனா இல்லை என தெரியவந்துள்ளது.

English summary

life imprisonment prison infected covid 19 in Trichy Central Jail. alredy two prisoners affected coronavirus in cuddlaore jail