விருதுநகரில் அமையும் மினி டைடல் பூங்கா.. டெண்டர் கோரிய தமிழக அரசு.. இளைஞர்களுக்கு குட் நியூஸ்!
விருதுநகர்: தமிழ்நாடு பட்ஜெட்டில் விருதுநகர் மாவட்டத்தில் மினி டைடல் பூங்கா அமைக்கப்படும் என்று அமைச்சர் தங்கம் தென்னரசு அறிவித்திருந்தார். அதன்படி தற்போது விருதுநகரில் டைடல் பூங்கா அமைப்பதற்காக டெண்டரை தமிழக அரசு கோரி இருக்கிறது. அதுமட்டுமல்லாமல் வரைப்படம், வடிவமைப்பு ஆகியவற்றை தயார் செய்வதற்கான ஆலோசகர்களை தேர்வு செய்யவும் டெண்டர் கோரப்பட்டுள்ளது.
தமிழக பட்ஜெட் தாக்கலின் போது அமைச்சர் தங்கம் தென்னரசு, ஒசூரில் டைடல் பூங்கா அமைக்கப்படும் என்றும், விருதுநகர் மாவட்டத்தில் மினி டைடல் பூங்கா அமைக்கப்படும் என்றும் அறிவித்தார். விருதுநகர் மாவட்டத்தை சுற்றி ஏராளமான பொறியியல் கல்லூரிகள் இருந்தாலும், அங்கு படிக்கும் இளைஞர்கள் வேலைவாய்ப்புக்காக சென்னை, பெங்களூர் பகுதிகளுக்கு செல்ல வேண்டிய கட்டாயம் இருந்தது.
விருதுநகர் மாவட்டத்தை பொறுத்தவரை பட்டாசு தொழிற்சாலை, தீப்பெட்டி தொழிற்சாலை, டெக்ஸ்டைல் ஆகியவையே வேலைவாய்ப்பை அளித்து வருகிறது. இதனால் விருதுநகர் மாவட்டத்திற்கு என்று மினி டைடல் பூங்கா கொண்டு வரப்படும் என்ற அறிவிப்பு அப்பகுதி இளைஞர்களிடையே மிகப்பெரிய வரவேற்பை பெற்றது. இதன் மூலமாக ஏராளமான இளைஞர்கள் வேலைவாய்ப்பை பெற முடியும்.
மினி டைடல் பூங்கா அறிவிப்புக்கு பின், பணிகள் எப்போது தொடங்கும் என்ற எந்த அறிவிப்பும் வெளியாகவில்லை. இந்த நிலையில் விருதுநகரில் மினி டைடல் பூங்கா அமைக்க தமிழக அரசு டெண்டர் கோரி இருக்கிறது. வரைபடம், வடிவமைப்பு தயார் செய்வதற்கான ஆலோசகர்களை தேர்வு செய்ய டெண்டர் கோரி இருக்கிறது. அதேபோல் திட்ட மேலாண்மை ஆலோசகர்களை தேர்வு செய்யவும் டெண்டர் கோரப்பட்டுள்ளது.
இந்த பணிகள் முடிவடைந்த பின் விருதுநகரில் இடம் தேர்வு செய்யப்பட்டு, வரைபடம் மற்றும் வடிவமைப்பு ஒப்புதல் பெறப்படும். அதேபோல் சுற்றுச்சூழல் அனுமதி, கட்டட வடிவமைப்பு அனுமதி ஆகியவை பெற வேண்டும். இதன்பின் கட்டுமான பணிகள் தொடங்கப்படும் என்று எதிர்பார்க்கப்படுகிறது.
ஏற்கனவே வேலூர், நாமக்கல் ராசிபுரம் பகுதிகளில் அமைக்கப்பட்ட மினி டைடல் பூங்கா அந்தந்த மாவட்டங்களுக்கு மிகப்பெரிய வரமாக அமைந்துள்ளது. இதனால் மினி டைடல் பூங்கா கட்டுமான பணிகள் விரைவில் முடிவடைந்து அது அந்த மாவட்டத்தின் வளர்ச்சிக்கு மிகப்பெரிய பங்களிப்பை செய்யும் என்றும் எதிர்பார்க்கப்படுகிறது.
Click it and Unblock the Notifications
Sign in with Google