டிரம்ப்க்கு செக் வைத்த அமெரிக்கா உச்சநீதிமன்றம்.. எந்தெந்த வரிகள் ரத்து?

Published: Friday, February 20, 2026, 23:09 [IST]

Subscribe to Oneindia Tamil

வாஷிங்டன்: அமெரிக்கா அதிபராக டொனால்டு டிரம்ப் பொறுப்பேற்ற பல்வேறு அதிர்ச்சிகர நடவடிக்கையில் ஈடுபட்டார். குடியேற்ற கொள்கை திருத்தம், மானியங்கள் ரத்து உள்ளிட்டவற்றை செயல்படுத்தினார். அதுமட்டுமல்லாமல் ரெசிப்ரோக்கல் வரியை டிரம்ப் கையில் எடுத்த போது, உலக நாடுகள் மிகப்பெரிய பாதிப்பை சந்தித்தன. தங்களின் பேச்சை கேட்காத நாடுகள் மீது உச்சக்கட்ட வரியை விதிக்க தொடங்கினார்.

இதனால் இந்தியா, சீனா, கனடா, மெக்சிகோ உள்ளிட்ட ஏராளமான நாடுகள் கடுமையான பாதிப்பை சந்தித்தன. ரஷ்யாவிடம் இருந்து கச்சா எண்ணெய் வாங்குவதால், இந்தியாவுக்கு கூடுதல் வரியை விதிப்பதாக அறிவித்தார். இந்த வரிகளை விதிப்பதற்கு டொமால்டு டிரம்ப், சர்வதேச அவசர பொருளாதார அதிகார சட்டம் 1977ஐ பயன்படுத்தினார்.

அமெரிக்காவின் வருவாயை அதிகரிக்கவும், வர்த்தக பேச்சுவார்த்தையில் மற்ற நாடுகளுக்கு அழுத்தம் கொடுக்கவும் ந்த வரி விதிப்பு நடவடிக்கையில் ஈடுபடுவதாக தெரிவித்திருந்தார். இதற்கு அமெரிக்காவிலும் எதிர்ப்பு கிளம்பியது. இதனால் டிரம்ப் நடவடிக்கை எதிராக பல்வேறு தரப்பினரும் நீதிமன்றத்தை நாடினர்.

டிரம்ப் நடவடிக்கைகளால் இறக்குமதி பொருட்களை நம்பியுள்ள வணிக நிறுவனங்களின் செயல்பாடுகள் சீர்குலைந்து, விலையேற்றம் மற்றும் பணி நீக்க நடவடிக்கைகளுக்கு வழிவகுத்ததாக வாதிடப்பட்டது. இந்த நிலையில் அமெரிக்கா உச்சநீதிமன்றம், டிரம்ப் விதித்த வரி விதிப்புகள் செல்லாது என்று தீர்ப்பு வழங்கி இருக்கிறது.

அதுமட்டுமல்லாமல் சர்வதேச அவசர பொருளாதார அதிகார சட்டம் 1977 சட்டத்தின் கீழ் அமெரிக்க அதிபர் தனிப்பட்ட முறையில் வரியை விதிக்க எந்தவித உரிமையும் இல்லை. அவசர நிலை என்ற பெயரில் அரசியலைப்பின் அதிகாரத்தை மீற முடியாது. போர் அச்சம், அமெரிக்கா பாதுகாப்புக்கு அச்சுறுத்தல் இருந்தால் மட்டுமே இத்தகைய வரி அமெரிக்க அரசால் விதிக்க முடியும்.

அமெரிக்கா ஒன்றும் 100க்கும் அதிகமான நாடுகளுடன் போரில் இல்லை. அமெரிக்க அதிபர் டொனால்டு டிரம்ப் தனது அதிகாரத்தை மீறி இந்த ரெசிப்ரோக்கல் வரியை விதித்துள்ளார் என்று தீர்ப்பளிக்கப்பட்டுள்ளது. அமெரிக்கா உச்சநீதிமன்றத்தின் இந்த தீர்ப்பு காரணமாக, சர்வதேச அவசர பொருளாதார அதிகார சட்டம் 1977 கீழ் விதித்த வரிகள் செல்லாது என்று பார்க்கப்படுகிறது.

ஆனால் டொனால்டு டிரம்ப் மற்ற விதிகளை பயன்படுத்தியும் சில வரிகளை விதித்திருக்கிறார். வர்த்தக விரிவாக்க சட்டம் 1962 பிரிவு 232ஐ பயன்படுத்தி பல்வேறு வரிகளை விதித்திருக்கிறார். எஃகு மற்றும் அலுமினியம், கார்கள், தாமிரம், சமையலறை அலமாரிகள், குளியலறை சாதனங்கள், மெத்தைகள் உள்ளிட்டவற்றுக்கு இந்த வதியை பயன்படுத்தி இருப்பது குறிப்பிடத்தக்கது.

Published On February 20, 2026