கந்த சஷ்டி.. திருக்கார்த்திகை.. காலபைரவாஷ்டமி.. கார்த்திகையில் என்னென்ன விரத நாட்கள்

சென்னை: கார்த்திகை மாதம் விருச்சிக மாதம். நவ கிரகங்களின் தலைவன் சூரியன் தனது நீச்ச நிலையில் இருந்து விடுபட்டு விருச்சிக ராசியில் பயணம் செய்யும் மாதம். இந்த மாதத்தில் கந்த சஷ்டி, திருக்கார்த்திகை தீப திருநாள், கால பைரவாஷ்டமி போன்ற விஷேச நாட்கள் உள்ளன.

கார்த்திகை மாதம்: கருமையான மேகங்களைக் கொண்டு அதிகளவு மழைபொழியும் கார் காலம் ஆகும். காந்தள் பூக்கள் அதிகம் மலரும் மாதம். ஆதலால் இம்மாதம் கார்த்திகை எனப் பெயர் பெற்றது. கார்த்திகையில் நம்முடைய உடல் மற்றும் உள்ளத்தின் இயக்கம் சீராக இருக்கும். கார்த்திகையில் அதிகாலையில் நீராடி கடவுளை வழிபட்டால் துன்பங்கள் விலகும். கார்த்திகை முதல் நாளில் தர்ம சாஸ்தாவாகிய ஐயப்பனுக்கும் முருகப்பெருமானுக்கும் பக்தர்கள் மாலை அணிந்து விரதத்தை தொடங்குவார்கள்.

கார்த்திகை மாத விரதம்: கார்த்திகை மாதத்தில் மது, மாமிசம் சாப்பிடாமல் இறைவனை நினைத்து விரதம் அனுஷ்டிப்பவர் சகல பாவங்களிலிருந்தும் விடுபட்டு விஷ்ணு பாதத்தை அடைவார்கள். கார்த்திகை மாதத்தில் மாமிச ஆகாரத்தைக் கைவிடாதவர்கள் புழுப் பூச்சிகளாய் பிறவி எடுப்பார்கள் என்று பத்மபுராணம் கூறுகிறது.

மோட்ச நிலை: கார்த்திகை மாதத்தில் நாள்தோறும் சூரிய உதயத்தின் போது குளிப்பவர்கள், சகல புண்ணிய தீர்த்தங்களிலும் நீராடிய புண்ணிய பலனை அடைவார்கள். விஷ்ணு பகவானை கார்த்திகை மாதத்தில் புஷ்பங்களால் அர்ச்சித்து பூஜை செய்பவர்கள் தேவர்களும் அடைய அரிதான மோட்ச நிலையை அடைவார்கள் என்கிறது புராணம்.

பிரம்மஹத்தி தோஷம் நீங்கும்: கார்த்திகை மாதத்தில் விஷ்ணு பகவானை துளசி இலையால் அர்ச்சனை செய்பவர்கள் பகவானுக்கு சமர்ப்பிக்கும் ஒவ்வொரு துளசி இலைகளுக்கும் ஒவ்வொரு அசுவமேதயாகம் செய்த பலனை அடைவார்கள். கார்த்திகை மாதத்தில் விளக்கு தானம் செய்பவர்கள் பிரம்ம ஹத்தி முதலான தோஷங்களிலிருந்தும் விடுபடுவார்கள்.

துளசி கல்யாணம்: கார்த்திகை மாதத்தில் ஏகாதசிக்கு அடுத்த நாள் துளசி தேவியை மகாவிஷ்ணு மணந்ததாகப் புராணம் சொல்கிறது. மகாவிஷ்ணு நெல்லி மரமாகத் தோன்றியவர் என்பதால், கார்த்திகை ஏகாதசி அன்று துளசிச் செடியுடன், நெல்லி மரத்தடியில் பூஜை செய்ய வேண்டும். நெல்லி மரம் இல்லாத பட்சத்தில் வீட்டில் உள்ள துளசி மாடத்தில் நெல்லி மரத்தின் ஒரு சிறிய கிளையை வைத்துப் பூஜித்து துளசி கல்யாணம் செய்தால் திருமணமாகாத பெண்களுக்கு விரைவில் திருமணம் நடைபெறும்.

ஒளிமயமான எதிர்காலம்: கார்த்திகை மாதத்தில் சிவலிங்கத்தை நெய்யினால் அபிஷேகம் செய்து வில்வம் மற்றும் மரிக்கொழுந்தால் அர்ச்சனை செய்து வழிபட்டால் குடும்பத்தில் மகிழ்ச்சி பொங்கும். கார்த்திகை மாதத்தில் பவுர்ணமியோடு கூடி வரும் கார்த்திகை நட்சத்திரம் முருக வழிபாட்டிற்கேற்ற ஒன்றாகும்.

தீப திருவிழா: கார்த்திகைத் தீபத் திருநாளன்று தீபங்கள் ஏற்றி முருகனை, சிவபெருமானை வழிபடுவது சிறந்தது. கார்த்திகை மாதத்தில் ஆலயங்களில் திபம் ஏற்றி வைப்பதும், இல்லத்தில் இரு வேளைகளில் விளக்கேற்றுவதும் எல்லா மங்களங்களையும் தந்து வாழ்வை ஒளிமயமாக்கும். கார்த்திகை மாதம் தினமும் விளக்கேற்ற இயலாதவர்கள் துவாதசி, சதுர்த்தசி, பவுர்ணமி ஆகிய மூன்ற தினங்களில் மட்டுமாவது கண்டிப்பாக தீபம் ஏற்ற வேண்டும்.

சோமவார விரதம்: கார்த்திகையில் சோமாவார விரதம் இருப்பது சிறப்பு வாய்ந்தது. பல ஜென்ம பாவங்கள் நீங்கும். கணவன் மனைவி ஒற்றுமை அதிகரிக்கும். கார்த்திகை மாதம் காவேரியில் நீராடுவது, தீபம் தானம் செய்வது, வெங்கல பாத்திரம், தானியம், பழம் தானம் செய்தால் செல்வம் சேரும். கார்த்திகை புராணத்தை கேட்டால் நோய், ஏழ்மை அகலும். கார்த்திகை மாதம் செய்யும் தானத்துக்கு இரு மடங்கு பலன் உண்டு. கார்த்திகை மாதம் நெல்லிக்கனி தானம் செய்தால் உயர் பதவி கிடைக்கும்.

விரத நாட்கள்: கார்த்திகை முதல் நாள் முடவன் முழுக்கு இந்த நாளில் காவிரியில் நீராடினால் பல ஜென்ம பாவங்கள் போகும். கார்த்திகை 2ஆம் தேதி முருகன் ஆலயங்களில் கந்த சஷ்டி விழாவை முன்னிட்டு சூரசம்ஹாரம் நடைபெற உள்ளது. விரதமிருந்து முருகனை தரிசனம் செய்தால் நோய்கள், கடன் பிரச்சினைகள் நீங்கும்.

காலபைரவாஷ்டமி: கார்த்திகை 7ஆம் தேதி கைசிக ஏகாதசி, கார்த்திகை 10 சந்திர ஜெயந்தி, கார்த்திகை 10 திருவண்ணாமலை திருக்கார்த்திகை தீபத் திருவிழா. கார்த்திகை 19 காலபைரவாஷ்டமி விழா. நோய், எதிரி தொல்லை நீங்க காலபைரவரை வழிபடலாம்.

English summary

Karthigai masam pirappu: Importance viratham Days for the Tamil Month of Karthigai From Karthigai 1 to Karthigai 30.