புரட்டாசி பவுர்ணமி கிரிவலம்.. திருவண்ணாமலை செல்லும் பக்தர்களுக்கு குட் நியூஸ்

திருவண்ணாமலை: புரட்டாசி மாத பவுர்ணமியை முன்னிட்டு, பல்லாயிரக்கணக்கான பக்தர்கள் திருவண்ணாமலைக்கு கிரிவலம் செல்வார்கள். கூட்ட நெரிசலை தவிர்க்கும் வகையில் பயணிகளின் வசதிக்காக சென்னை உட்பட பல பகுதிகளில் இருந்து திருவண்ணாமலைக்கு கூடுதல் சிறப்பு பேருந்துகள் இயக்கப்படும் என்று அறிவிக்கப்பட்டுள்ளது. சென்னையில் இருந்து வேலூர் மார்க்கமாக 2 சிறப்பு ரயில்களும் இயக்கப்படும் என்று அறிவிக்கப்பட்டுள்ளது.

திருவண்ணாமலையில் உள்ள அருணாசலேஸ்வரர் கோயில் பஞ்ச பூத ஸ்தலங்களில் அக்னி ஸ்தலமாக விளங்குகிறது. நினைத்தாலே முக்தி தரும் திருவண்ணாமலையில் மலையையே சிவனாக வழிபடுவதால் அருணாசலேஸ்வரர் கோயில் பின்புறம் உள்ள மலையை சுற்றியுள்ள 14 கிலோ மீட்டர் தொலைவு கொண்ட கிரிவலப்பாதையில் பெளர்ணமி நாட்களில் ஆயிரக்கணக்கான பக்தர்கள் கிரிவலம் செல்வார்கள்.

இந்நிலையில் புரட்டாசி மாதத்திற்கான பெளர்ணமி கிரிவலம் செல்ல உகந்த நேரத்தை கோயில் நிர்வாகம் அறிவித்துள்ளது. பெளர்ணமி இன்று செப்டம்பர் 28 தேதி வியாழக்கிழமை மாலை 6.47 மணிக்கு தொடங்கி மறுநாள் 29ம் தேதி வெள்ளிக்கிழமை மாலை 4.34 மணிக்கு நிறைவடைகிறது. எனவே இன்று இரவு கிரிவலம் செல்ல உகந்தது என்று கோயில் நிர்வாகம் தெரிவித்துள்ளது.

பவுர்ணமி கிரிவலமானது விடுமுறை தினத்தையொட்டி வருவதால் பொதுமக்கள் மற்றும் பக்தர்களுக்கு தேவையான அடிப்படை வசதிகளை மேற்கொள்ளும் பணியில் மாவட்ட நிர்வாகத்தின் மூலம் அதிகாரிகள் தீவிரமாக ஈடுபட்டு வருகின்றனர்.

சென்னை உட்பட தமிழ்நாட்டின் முக்கிய நகரங்களில் இருந்து திருவண்ணாமலைக்கு சிறப்பு பேருந்துகள் இயக்கப்படுகின்றன. அதிக அளவு பக்தர்கள் வருவார்கள் என்பதால் அதற்கு ஏற்ப எல்லா ஏற்பாடுகளையும் மாவட்ட நிர்வாகம் மற்றும் கோயில் நிர்வாகத்தினர் செய்து வருகின்றனர்.

கூட்ட நெரிசலை தவிர்க்கும் வகையில் 2 சிறப்பு ரயில்களை தென்னக ரயில்வே அறிவித்துள்ளது. 28ம் தேதி சென்னை கடற்கரை ரயில் நிலையத்தில் மாலை 6 மணிக்கு புறப்பட்டு இரவு 12.05க்கு திருவண்ணாமலை சென்றடையும். 29ஆம் தேதி அதிகாலை 3.45க்கு திருவண்ணாமலையில் இருந்து புறப்படும் ரயில், காலை 9.05க்கு சென்னை வந்தடையும். பெளர்ணமி கிரிவலத்துக்காக இயக்கப்படும் 2 சிறப்பு ரயில்களும் வேலூர் வழியாக திருவண்ணாமலை செல்லும் என தெரிவிக்கப்பட்டுள்ளது.

English summary

Thousands of devotees visit Thiruvannamalai for the festival of Pelarnami in the month of Puratasi. It has been announced that additional special buses will be run to Tiruvannamalai from many areas including Chennai for the convenience of passengers in order to avoid crowding.