சரிகமபவில் தேவயானியின் மகள் பாடியதற்கு நடுவர் ஸ்ரீநிவாஸ் சொன்ன வார்த்தை.. கண் கலங்கிய இனியா உருக்கம்

Updated: Monday, September 29, 2025, 13:23 [IST]

Subscribe to Oneindia Tamil

சென்னை: தமிழ் சினிமாவில் பல ஆண்டு காலமாக ரசிகர்களின் மனதில் நீங்கா இடம் பிடித்திருக்கும் நடிகை தேவயானியின் மகள் இனியா, ஜீ தமிழின் பிரபலமான இசை நிகழ்ச்சியான 'சரிகமப சீனியர்ஸ் 5' மேடையில் தனது அபாரமான குரலால் அனைவரையும் ஆச்சரியப்படுத்தியிருக்கிறார். சமீபத்தில் நடந்த 'பஞ்சபூதச் சுற்றில்' அவர் பாடிய பாடலுக்கு, நடுவர்கள் வழங்கிய பெருமைமிக்க பாராட்டு, இனியாவை ஆனந்தக் கண்ணீரில் ஆழ்த்தியுள்ளது.

இனியாவின் சுயமுயற்சி

பொதுவாக, சினிமா பின்னணியில் இருந்து யார் வந்தாலும், அவர்களுக்கு அந்தக் குடும்பத்தின் 'துணை' (Support) இருந்ததால்தான் எளிதில் வாய்ப்பு கிடைத்தது என்று மக்கள் நினைப்பது வாடிக்கை. நடிகை தேவயானி எவ்வளவு பெரிய நடிகையாக இருந்தாலும், தன் மகள் இனியா, தனது சொந்த முயற்சியால் மட்டுமே முன்னேறிச் செல்ல வேண்டும் என்றுதான் விரும்பினார். இனியாவும் அதே வைராக்கியத்துடன், எந்தவிதமான சிபாரிசும் இன்றி, இந்த இசை மேடைக்கு வந்துள்ளார்.

'சரிகமப' நிகழ்ச்சியின் பல சுற்றுகளைத் தாண்டி வந்த இனியா, ஒவ்வொரு வாரமும் தனது வித்தியாசமான பாடல்கள் மூலம் நடுவர்கள் மற்றும் ரசிகர்களின் கவனத்தை ஈர்த்து வருகிறார்.

பஞ்சபூத சுற்றில் இனியாவின் உழைப்பு

சமீபத்தில், 'சரிகமப' நிகழ்ச்சியில் 'பஞ்சபூதச் சுற்று' வெகு விமர்சையாக நடைபெற்றது. நீர், நிலம், நெருப்பு, காற்று, ஆகாயம் ஆகிய ஐந்து அம்சங்களை பிரதிபலிக்கும் விதமாகப் பாடல்கள் பாடப்பட்டன. இந்தப் போட்டியில், தேவயானியின் மகள் இனியா பாடிய பாடல் "மேகம் கறுக்குது". இந்த பாடலை அவர் பாடிய நேர்த்தி, நடுவர்களை மட்டுமன்றி, அரங்கில் இருந்த அனைவரையும் புல்லரிக்க வைத்தது. அவருடைய அர்ப்பணிப்பு, பாடலின் வரிகளில் வெளிப்பட்டதாக நடுவர்கள் மட்டுமல்லாமல் ரசிகர்களும் பீல் பண்ணினர்.

நடுவர் ஸ்ரீனிவாஸ் அவர்கள், "இனியா, இன்று நீ பாடிய பாடல் உன்னுடைய உழைப்பை காட்டுகிறது. உன் முன்னேற்றத்தைக் காட்டுகிறது" என்று மனம் திறந்து பாராட்டினார்.

நடுவரின் பெருமை

பாடகர் ஸ்ரீனிவாஸ் போன்ற ஒரு மூத்த நடுவர் வாய் திறந்து பாராட்டியது, இனியாவுக்கு ஒரு பெரிய அங்கீகாரமாக அமைந்தது. அப்போது தொகுப்பாளினி அர்ச்சனா, மேடையில் ஒரு முக்கியமான கேள்வியைக் கேட்டார். அவர், "இனிமேல் நீ தேவயானி - ராஜ்குமார் பிள்ளை இல்லை. ராஜ்குமார் - தேவயானிதான் இனியாவுடைய பெற்றோர் என்ற பெயரை இந்த மேடையில் நடுவர்கள் வாயால் கூறியது எவ்வளவு மகிழ்ச்சியாக இருக்கிறது?" என்று கேட்டார்.

இந்த வார்த்தைகளைக் கேட்ட இனியா, அப்படியே கண்ணீர் விட்டு அழுதார். தான் பட்ட உழைப்புக்குக் கிடைத்த மிகப்பெரிய பரிசு இதுதான் என்பதை அவர் உணர்ந்தார். கண்கலங்கிக்கொண்டே பேசிய இனியா, "என் அம்மா எனக்கு நிறைய சப்போர்ட்டாக இருந்திருக்கிறார். ஆனால், நான் இந்த மேடையில் என்னுடைய சுய முயற்சியால் தான் வந்தேன். இன்று இப்படி நடுவர்கள் கூறியதற்கு பெருமைப்படுகிறேன்" என்று உருக்கமாகக் கூறினார்.

நடுவர் ஸ்ரீனிவாஸ், இனியாவின் திறமையில் நம்பிக்கை வைத்து, அவரை இரண்டாம் சரணத்தையும் பாடும்படி கேட்டுக்கொண்டார். இனியாவின் அபாரமான வளர்ச்சி, அந்தப் பாடல் வரிகளில் மேலும் சிறப்பாகத் தெரிந்தது, அவருக்குப் பெருமைக்குரிய கோல்டன் பெர்பாமன்ஸ் அங்கீகாரத்தையும் வாங்கி கொடுத்தது.

ரசிகர்கள் மத்தியில் இனியாவுக்கு வரவேற்பு

இனியாவின் இசைப் பயணம், சினிமாப் பின்புலத்தின் நிழலை விட்டு விலகி, தனிப்பட்ட திறமையால் மட்டுமே ரசிகர்களின் மத்தியில் பெரிய வரவேற்பைப் பெற்றுள்ளது. அவருடைய இயல்பான குரல் மற்றும் உணர்வுபூர்வமான பாடலால், ரசிகர்கள் அவருக்குத் தொடர்ந்து வாழ்த்துக்களையும், பாராட்டுக்களையும் குவித்து வருகின்றனர். இனிமேல், அவர் தன் உழைப்பால் மட்டுமே அறியப்படும் ஒரு நட்சத்திரமாகத் திகழ்வார் என்பதில் எந்தச் சந்தேகமும் இல்லை.