வெறும் தொடக்கம் தான்.. வரும் நாட்களில் இருக்கு.. மழை குறித்து வெதர்மேன் கொடுத்த ஜில் அப்டேட்

சென்னை: தமிழகத்தில் சுட்டெரித்த வெயிலுக்கு பிரேக் கொடுத்து பல்வேறு இடங்களில் பலத்த மழை பெய்தது. இதனால் வெப்பம் தணிந்து குளிர்ச்சியான சூழல் உள்ளது. இந்த நிலையில் இது வெறும் தொடக்கம் தான்.. வரும் நாட்களில் தான் மழை இருக்கிறது என்று தமிழ்நாடு வெதர்மேன் தெரிவித்துள்ளார்.

தமிழ்நாடு முழுவதும் கடந்த சில நாட்களாக வாட்டி வதைத்த கோடை வெயிலில் இருந்து மக்களுக்கு சற்று ஆறுதல் கொடுக்கும் விதமாக நேற்று பல இடங்களில் மழை கொட்டியது. இடி மின்னல் மற்றும் காற்றுடன் மழை பெய்தது. இதனால், வெப்பம் தணிந்ததால் மக்கள் மகிழ்ச்சி அடைந்தனர்.

தென் மாவட்டங்களில் மழை: நெல்லை, தென்காசி, தூத்துக்குடி, குமரி உள்ளிட்ட மாவட்டங்களில் இதுவரை இல்லாத அளவிற்கு வெயில் வாட்டி வதைத்தது. இதனால் நீர் நிலைகளில் தண்ணீர் விரைவாக வற்றியது. அணைகளிலும் நீர்மட்டம் மடமடவென குறைந்தது. இந்த நிலையில் தான் தகிக்கும் வெயிலுக்கு பிரேக் கொடுத்து பலத்த மழை பெய்தது. இதனால் வெப்பம் தணிந்து குளிர்ச்சியான சூழல் உள்ளது.

வெறும் தொடக்கம் தான்: இந்த நிலையில், இது வெறும் தொடக்கம் தான்.. வரும் நாட்களில் இன்னும் மழை பெய்ய வாய்ப்பு இருக்கிறது என்று ஜில்லான அப்டேட்டை தமிழ்நாடு வெதர்மேன் தெரிவித்துள்ளார். இது தொடர்பாக அவர் தனது எக்ஸ் தளத்தில் பதிவிட்டு இருப்பதாவது;-

"கன்னியாகுமரி, மதுரை, புதுக்கோட்டை, விருதுநகர், திருச்சி, பெரம்பலூர் என வெப்பத்தில் தவித்த இந்த அனைத்து பகுதிகளுக்கும் சற்று நிவாரணம் கிடைக்க உள்ளது. இன்று வெறும் தொடக்கம் தான். வரும் நாட்களில் இன்னும் மழை இருக்கிறது" என்று தனது எக்ஸ் தளத்தில் பதிவிட்டுள்ளார்.

வானிலை மையம்: முன்னதாக வானிலை ஆய்வு மையம் கூறியதாவது:- ஏப்.14 மற்றும் 15ம் தேதிகளில் தென் தமிழக மாவட்டங்கள் மற்றும் டெல்டா மாவட்டங்களில் ஓரிரு இடங்களிலும், காரைக்கால் பகுதியிலும் லேசானது முதல் மிதமான மழை பெய்யக்கூடும். ஏனைய பகுதிகளில் வறண்ட வானிலை நிலவக்கூடும். ஏப்.16 முதல் 18ம் தேதி வரை தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

அடுத்த ஐந்து தினங்களுக்கான அதிகபட்ச வெப்பநிலை பற்றிய முன்னறிவிப்பை பொறுத்த அளவில், 16ம் தேதி வரை அடுத்த இரண்டு தினங்களுக்கு தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் பெரிய மாற்றத்திற்கான வாய்ப்பு குறைவு. அதற்கு அடுத்து வரும் மூன்று தினங்களுக்கு அதிகபட்ச வெப்பநிலை படிப்படியாக உயரக்கூடும்.

வெப்பநிலை எப்படி?: அடுத்த இரண்டு தினங்களுக்கு அதிகபட்ச வெப்பநிலை வட தமிழகத்தில் ஒருசில இடங்களில் 2° - 3° செல்சியஸ் இயல்பை விட அதிகமாகவும், புதுவை மற்றும் காரைக்கால் பகுதிகளில் இயல்பை ஒட்டியும் இருக்கக்கூடும். தமிழக உள் மாவட்டங்களின் சமவெளி பகுதிகளில் அநேக இடங்களில் 38°-41° செல்சியஸ் மற்றும் கடலோரப்பகுதிகளில் பெரும்பாலான இடங்களில் 34°-38° செல்சியஸ் இருக்கக்கூடும்.

அடுத்த 7 நாட்கள்: அடுத்த 7 நாட்களை பொறுத்த அளவில், தென் இந்தியப்பகுதிகளின் மேல், வளிமண்டல கீழடுக்குகளில், காற்றின் திசை மாறுபடும் பகுதி நிலவுகிறது. அதேபோல குமரிக்கடல் மற்றும் அதனை ஒட்டிய பகுதிகளில் வளிமண்டல கீழடுக்கு சுழற்சி நிலவுகிறது. எனவே, இன்று தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் இடி மின்னல் மற்றும் பலத்த காற்றுடன் (மணிக்கு 30 கிலோமீட்டர் முதல் 40 கிலோமீட்டர் வரை) லேசானது முதல் மிதமான மழை பெய்யக்கூடும்.

சென்னையில் எப்படி?: சென்னை மற்றும் புறநகர் பகுதிகளுக்கான வானிலை முன்னறிவிப்பை பொறுத்த அளவில், வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 35-36 டிகிரி செல்சியஸை ஒட்டியும், குறைந்தபட்ச வெப்பநிலை 28 டிகிரி செல்சியஸை ஒட்டியும் இருக்கக்கூடும்.

அதேபோல, இரண்டு நாட்களுக்கு குமரிக்கடல் பகுதிகள், மன்னார் வளைகுடா மற்றும் அதனை ஒட்டிய தென் தமிழக கடலோரப்பகுதிகள் மற்றும் தெற்கு கேரள கடலோரப்பகுதிகளில் சூறாவளிக்காற்று மணிக்கு 40 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். மேற்குறிப்பிட்ட நாட்களில் மீனவர்கள் இப்பகுதிகளுக்கு செல்ல வேண்டாமென்று அறிவுறுத்த படுகிறார்கள்.

English summary

Heavy rains fell at various places in Tamil Nadu giving a break to the scorching sun. Due to this the heat is reduced and the environment is cool. At this stage, this is just the beginning.. Tamilnadu weatherman has said that there is rain in the coming days.