10 மணிநேரத்தில் 41 செமீ.. ராமேஸ்வரத்தில் வரலாறு படைத்த மழை.. வெதர்மேன் தந்த ராமநாதபுரம் டேட்டா!

ராமநாதபுரம்: ராமநாதபுரம் மாவட்டம் ராமேஸ்வரத்தில் காலை 8 மணி முதல் மாலை 4 மணிக்குள் 10 மணிநேரத்தில் மொத்தம் 41 சென்டிமீட்டர் மழை பதிவாகி உள்ளது. ராமநாதபுரம் மாவட்டத்தை புரட்டிப்போட்ட இந்த மழை பற்றி தமிழ்நாடு வெதர்மேன் பிரதீப் ஜான் டேட்டா வெளியிட்டுள்ளார்.

தமிழகத்தில் வடகிழக்கு பருவமழை வெளுத்து வாங்கி வருகிறது. கடந்த வாரம் வரை சென்னை, செங்கல்பட்டு, திருவாரூர் உள்ளிட்ட மாவட்டங்களை குறிவைத்து பெய்த மழை தற்போது தென்தமிழகத்தை நோக்கி திரும்பி உள்ளது.

நேற்று இரவு முதல் தென்தமிழக மாவட்டங்களில் கனமழை பெய்து வருகிறது. ராமநாதபுரம் மாவட்டத்தில் இன்று காலை முதல் கனமழை பெய்து வருகிறது. குறிப்பாக மதியம் முதல் மாலை வரை ராமநாதபுரம் மாவட்டத்தில் பல இடங்களில் கனமழை வெளுத்து வாங்கியது.

குறிப்பாக ராமேஸ்வரம், தங்கச்சிமடம், பாம்பன் மற்றும் அதனை சுற்றிய இடங்களில் பேய்மழை பெய்தது. அதில் பாம்பனில் மேகவெடிப்பு ஏற்பட்டு கனமழை கொட்டித்தீர்த்தது. பாம்பனில் இன்று முற்பகல் 11.30 மணி முதல் பிற்பகல் 2.30 மணி வரை 19 சென்டிமீட்டர் மழை பதிவாகி உள்ளது.

ராமேஸ்வரத்தில் காலை 6 மணி முதல் மாலை 4 மணி வரையிலான 10 மணி நேரத்தில் ராமேஸ்வரத்தில் மொத்தம் 41 சென்டிமீட்டர் மழை பெய்துள்ளது. மதியம் 1 மணி முதல் 4 மணி வரை மொத்தம் 4 மணிநேரத்தில் ராமேஸ்வரத்தில் மட்டும் 36 சென்டிமீட்டர் மழை என்பது பதிவாகி உள்ளதாகவும் சென்னை வானிலை ஆய்வு மையம் தெரிவித்துள்ளது.

இந்நிலையில் தான் ராமநாதபுரம் மாவட்டத்தில் முக்கிய இடங்களில் இன்று காலை 8 மணி முதல் மாலை 4 மணி வரை பதிவான கனமழை தொடர்பான டேட்டாவை ஏரியா வாரியாக தமிழ்நாடு வெதர்மேன் பிரதீப் ஜான் வெளியிட்டுள்ளார். இதுதொடர்பாக தமிழ்நாடு வெதர்மேன் வெளியிட்டுள்ள எக்ஸ் பதிவில் கூறப்பட்டுள்ளதாவது:

ராமேஸ்வரத்தில் இன்று மாலை 4 மணி வரையுடன் முடிந்த 10 மணிநேரத்தில் மொத்தம் 411 மில்லி மீட்டர் மழை பெய்துள்ளது. தங்கச்சிமடத்தில் 322 மில்லி மீட்டர் மழை பெய்துள்ளது. இதுதவிர ராமேஸ்வரம் பெல்ட் பகுதியில் பெய்த வரலாற்று மழை விபரம் வருமாறு: இன்று காலை 6 மணி முதல் மாலை 4 மணி வரை ராமநாதபுரத்தில் 75 மில்லி மீட்டர், மண்டபத்தில் 261.40 மில்லி மீட்டர், ராமேஸ்வரத்தில் 411 மில்லி மீட்டர், தங்கச்சிமடத்தில் 322மில்லி மீட்டர், பாம்பனில் 237 மில்லி மீட்டர் மழை பெய்துள்ளது.

வாலிநோக்கத்தில் 65.60 மில்லி மீட்டர், முதுகுளத்தூரில் 48.20 மில்லிமீட்டர், கமுதியில் 45.80 மில்லி மீட்டர், பரமக்குடியில் 25.60 மில்லி மீட்டர், திருவாடனையில் 11.80 மில்லி மீட்டர், ஆர்எஸ் மங்களத்தில் 10.40 மில்லி மீட்டர், மழை பெய்துள்ளது. ஆர்எஸ் மங்களத்தில்10.40 மில்லி மீட்டர் மழை என்பது பதிவாகி உள்ளது. தொண்டியில் மழை பெய்யவில்லை’’ என்று தெரிவித்துள்ளார்.

English summary

A total of 41 cm of rain has been recorded in 10 hours between 8 am and 4 pm in Rameswaram of Ramanathapuram district. Tamil Nadu weatherman Pradeep John has released data about the rain that has lashed Ramanathapuram district.