ஆம் ஆத்மி தலைவருக்கு எதிராக பாலியல் புகார் கூற, இளம் பெண்ணை தூண்டியது காங்கிரசா?
டெல்லி: ஆம் ஆத்மி தலைவர்களில் ஒருவரான குமார் விஷ்வாசுக்கு எதிராக பேட்டியளிக்கும்படி பெண்ணுக்கு காங்கிரஸ் நிர்வாகி பயிற்சியளிப்பது போல வெளியான வீடியோவால் இந்த பிரச்சினையில் புது திருப்பம் ஏற்பட்டுள்ளது.
ஆம் ஆத்மி மூத்த தலைவர்களில் ஒருவரான குமார் விஷ்வாசுக்கும், தனக்கும் தொடர்புள்ளதாக வதந்தி பரப்பப்படுவதாகவும், இதை அவர் மறுக்க வேண்டும் என்றும் அமேதி பகுதியை சேர்ந்த இளம் பெண் கூறிய புகார் தற்போது பரபரப்பாகியுள்ளது.
இந்நிலையில், காங்கிரஸ் நிர்வாகி ஒருவர், அந்த பெண்ணிடம், பேச்சுக்கொடுப்பது போலவும், பத்திரிகையாளர்களிடம் எதையெல்லாம் சொல்ல வேண்டும் என்பது குறித்து அவர் பயிற்சி கொடுப்பது போலவும் காட்சிகள் உள்ள வீடியோக்கள், சமூக வலைத்தளங்களில் பரவியுள்ளன.
இதுகுறித்து அந்த பெண்ணிடம் நிருபர்கள் கேட்டதற்கு, பத்திரிகைகளில் பேசி பழக்கம் இல்லையென்பதால், எனக்கு அந்த நிர்வாகி சொல்லிக் கொடுத்தார். மற்றபடி, அவர் சொல்லி நான் புகார் கூறவில்லை என்று தெரிவித்தார்.
இந்த சம்பவத்தை வைத்து பார்க்கும்போது, ஆம் ஆத்மி பெயரை கெடுப்பதற்காக காங்கிரஸ் கட்சி முயலுவது உறுதியாகியுள்ளதாக ஆம் ஆத்மி நிர்வாகிகள் தெரிவித்தனர்.